ACT 3
3
लंगड्यान शिंगार शेशेद
1मंग वगा नाड पेत्रड इंगा योहान मद्याना मुड वागता प्रार्थनाद वेळ आयन्याप्पुड फैनिक परमेश्वर भवनलोंग फोदुर. 2यल्ला वार परमेश्वर भवन देगार पोहचाशीर, वगा मनशीन यवाड फुट्टीननोट अपंग उंड्या, काही मंदी लोनीक येका फोदुर, धीन्नाम वान भवनलोन वगा कवाड बाजुक फेटदुर यादान सुंदर कवाड आंदुर. दिनिचांग की वाड भवनलोंग फोयेतोर मंदीन भिक आडगी शकाशी. 3पेत्रड इंगा योहान भवनलोंग फोयतुनार, इल्ला सुशी वाड वारनी भिक आडग्या. 4आप्पुड पेत्र, योहान जताक वान तीकुड एकटक सुशी, आन्या, “मा तीकुड सुड.” 5आप्पुड वार तीकेल येमाना शिक्की, इल्ला आशा फेट्टी वाड वार तीकुड सुशेदेंक आंट्या. 6इंगा पेत्र आन्या, “यंडी इंगा बंगार तर ना देगार लेद; पण ना देगार येम उंडाद. आदी निन निक इस्तान, नासोरी येशु ख्रिस्तन फेरता लेशी नडशेदेंक आंट.” 7इंगा वाड वानदी मंची शेई फट्टी वान लेप्या: आप्पुड लगेच वान काळाला इंगा मोकाळलु ताकत वच्या. 8इंगा वाड उडी मती नीला फड्या इंगा नडशेदेंक आंट्या, इंगा वाड नडस्का इंगा उडी मतका इंगा परमेश्वरदी स्तुती शेस्का वार जताक परमेश्वर भवनलोंग फोया. 9इप्पुड आंता मंदी वान नडशेताप्पुड इंगा परमेश्वरदी स्तुती शेशेताप्पुड सुशीर. 10इंगा यवाड परमेश्वर भवनलोन सुंदर फाटक देगार भिक आडगेदेंक कुसुंदु इड वाडे उंडाड इल्ला वार ओळखाशीर आप्पुड वान जताक येम आयन्या दानिचांग वारकी शेंगेम आश्चर्य आय्या इंगा वार यरस्कुनीर.
भवनला पेत्रद संदेश
11आप्पुड वाड पेत्रन इंगा योहान जताक उंड्या, आंता मंदी शेंगेम आश्चर्य शेस्केन शलमोनदी द्वार मंडप आनीने जागाला, वार तीकुड फारका वच्चीर. 12इदी सुशी पेत्रड आ मंदीन आन्या, “हे इस्राएललोन मंदीलाला, मीर इ मनशी तीकुड सुशी आश्चर्य येनटीक शेस्तार? इंगा इल्ला समजाशी मा तीकुड इल्ला येनटीक सुस्तुनार, की मिम मा सामर्थ्यता लेकाते सुभक्तीता इन नडवा मतीनाम? 13अब्राहाम, इसहाक, इंगा याकोब परमेश्वर, मा पुर्वजला परमेश्वर, वान सेवक येशुनदी गौरव शेशीनाड. यवान मीर फट्टी इच्चीन्टीर, इंगा पिलात वान इडस्काडेद ठराय मतीन्या पण मीर वान मुंदार येशुन नाकारीस्तीर. 14मीर तर यवाड पवित्र इंगा नितीमान उंड्या वान नाकारीस्तीर, इंगा घातक मनशीन मी इचांग इडस्काडाला आंका आडगुतीर. 15इंगा जीवन इच्चेतोनदी मीर जेम तिस्कुंटीर; पण परमेश्वर वान सच्चीनोर लोन्केल लेप्या दिनदी मिम साक्ष उंडाम. 16इंगा वान फेरता, वान फेर मिंदा उंडीने विश्वासता, इ मनशीक यवान मीर सुस्तुनार इंगा ओळखास्तार पण सामर्थ्य शिक्कीनाद; इंगा येशुन तीकेल शिक्कीने विश्वासताने मी आंदार मुंदार इनकी पुर्ण आरोग्य शिक्कीनाद.”
17“तर इप्पुड हे तम्मुळ्ळालाला नाक यरका उंडाद की अज्ञानता मीर इंगा मी अधिकारील पण इदी शेशीनार, 18पण या माटलान परमेश्वर आंदार संदेष्ट्याल नोरता पहिला शप्पीन्या, की वान ख्रिस्त दुख सहन शेशी, आय माटलु वाड इल्ला पुर्ण शेशीनाड. 19तर मी पापलु परमेश्वर तुडस्काडाला, आंका पश्चात्ताप शेयना, इंगा परमेश्वर तीकुड तिरगुना दिनिचांग की प्रभुन उपस्थितीला आत्मिक शांतीद वेळ दावाला; 20इंगा मी इचांग वाड पहिला निवडाशीने, ख्रिस्त येशुन आंपाला. 21युग सुरुवातकेल परमेश्वर वान पवित्र संदेष्ट्याल नोरता शप्पीने आन्नी माटलाद पुनर्स्थापना आय्यी नंताक ख्रिस्तक स्वर्गला निलवाने बेक आय्यी. 22यल्ला मोशेड शप्पीन्या की, ‘प्रभु परमेश्वर मी तम्मुळ्ळा लोन्केल मी इचांग ना लेका वगा संदेष्ट्यान नीला फडामती, वाड मिक येम पण शप्पी आदी आंता इनना.’ 23इंगा इल्ला आय्यी की यवाड पण आ संदेष्ट्यानदी इनाक फोई वाड मंदी लोन्केल नष्ट शेशेदेंक वच्ची.#अनुवाद 16:15-18. 24इंगा, शमुवेल केल मुंदारकी यंता संदेष्ट्याल माटलाडका वच्चीर, वार आंदार इ दिनमुला बद्दल शप्पीर. 25मीर संदेष्ट्याल इंगा आ अभिवचन बिळ्ळु उंडार, याद परमेश्वर मी पुर्वजलाक इच्चीन्या, इंगा अब्राहामनी आनीन्या की, ‘नी बिळ्ळा तीकेल पृथ्वी मिंदुडी आन्नी जातील आशिर्वादीत आय्यी.’#उत्पत्ती 12:3; 18:18; 22:18; 16:4. 26परमेश्वर वान सेवकनी येशुन सच्चीनोर लोन्केल लेपी पहिला मी तीकुड आंप्या, दिनिचांग की, मिमलान मी वाईट दावा मिंदकेल तिप्पी मिक आशिर्वाद इयाला.”
Zur Zeit ausgewählt:
ACT 3: WNT
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
