रोमी 16
16
व्यक्तिगत अभिवादन
1आब मै हमार बाबु फिबीसे टुन्हक चिनापर्ची करादेहटुँ, यी बाबु किंक्रियक मण्डलीम सेवक काम कर्ठी। 2यी धेर जहन सहायता कर्ली ओ महीह फे भारी सहायता कैरख्ली। उहओर्से परमेश्वरक मनैअस टुह्र फे प्रभुक नाउँम हुँकहीन स्वागत करो ओ हुँकहार खाँचोम स्याकल सहयोग करो।
3येशू ख्रीष्टक काम करबेर म्वार सँगसँग काम करुइया प्रिस्का ओ अकिलासह म्वार अभिवादन बा।#प्रे १८:२ 4मही बचाइक लाग हुँक्र डान्चेले नैमुल। मै हुँकन्हक भारी गुण सम्झलबाटुँ, मै केल नाही गैरयहूदीन्हक सब मण्डली हुँकन्हक गुण बिस्रैल नैहुइट। 5हुँकन्हक घरम जम्मा हुइना मण्डलीह फे म्वार अभिवादन बा। म्वार प्रिय सङ्घारी इपेनितसह, जे एशियक सबसे पहिल ख्रीष्टियन हुइट हुँकहीन फे अभिवादन बा।
6टुन्हक लाग भारी परिश्रम करुइया मरियमह फे अभिवादन बा।
7म्वारसँग जेलम परल म्वार यहूदी आफन्तहुँक्र एन्ड्रोनिकस ओ युनियसह म्वार अभिवादन बा। हुँकन्हक नाउँ प्रेरितन्हक बीचम चलल् बाटन, ओ महीसे आघहेँ हुँक्र येशू ख्रीष्टम विश्वास कैरख्लह।
8प्रभुम म्वार प्रिय भाइ एम्प्लीआतसह म्वार अभिवादन सुनादेओ।
9ख्रीष्टक लाग हमारसँग काम कर्ना उर्बानस ओ म्वार प्रिय सङ्घारी स्ताखुसह फे म्वार अभिवादन सुनादेओ।
10ख्रीष्टक दृष्टिम योग्य ठहरल अपेल्लेसह अभिवादन बा। अरिस्तोबुलसक परिवार सक्कुन अभिवादन सुनादेहो।
11म्वार आफन्त हेरोदियनह अभिवादन। प्रभुम विश्वास करुइया नर्किससक घरपरिवारन अभिवादन बा।
12प्रभुम धेर परिश्रम कर्ना बाबु त्रुफेना ओ त्रोफोसाह अभिवादन कैदेहो। प्रभुम धेर काम कर्ना प्रिय बाबु परसीह अभिवादन बा।
13प्रभुक र्वाजल रूफसह ओ हुँकहार डाईह अभिवादन बा। ऊ त म्वार फे डाई हुइटी।#मर्क १५:२१
14असिंक्रितस, फ्लेगन, हर्मेस, पत्रोबास, हर्मास ओ हुँकन्हकसँग रहल दादुभैयन फे म्वार अभिवादन बा।
15फिलोलोगस, युलिया, नेरियस ओ हुँकहार बहिन्या, ओ ओलिम्पास ओ हुँकन्हकसँग रहल सक्कु विश्वासीन म्वार अभिवादन बा।
16पवित्र मनसे ओ प्रेमसाथ एक-औरजहन अभिवादन करो। ख्रीष्टक सक्कु मण्डलीहुँक्र टुँहन अभिवादन पठारख्ल।
17दादुभैयहुँक्र, मै टुँहन बिन्ती करटुँ, फूट अन्ना ओ विश्वास बिथोल्ना मनैनसे होसियार रहो। हुँक्र टुन्हक पाइल शिक्षक विरोध कर्ठ। ओसिन मनैनसे सङ्गतऽ जिन करो। 18काकरकि असिन मनै हमार ख्रीष्ट प्रभुक नाही, तर आपनऽ प्याटिक सेवा कर्ठ ओ हुँक्र मीठ-मीठ बोली ओ बातले सीधासाधा मनैन ठग्ठ। 19टुन्हक आज्ञाकारितक बात सबजन थाहाँ पारख्ल, यी बातम महीह बहुत खुशी लागल बा। टुह्र खराब कामक लाग दूर हुइल्, ओ असल कामक लाग बुद्धिमान हुइल् मै चहठुँ।
20शान्ति देना परमेश्वर झट्टहेँ शैतानह टुन्हक पौलीक टर डबादेहुइयाबाट।
हमार प्रभु येशूक अनुग्रह टुन्हकम पलरह!
21म्वारसँग काम कर्ना तिमोथी फे टुँहन अभिवादन पठारख्ल। अस्तहँक म्वार यहूदी आफन्तहुँक्र लुकियस, यासोन ओ सोसिपात्रोसक फे टुँहन अभिवादन बा।#प्रे १६:१
22पावलक लाग यी चिठी लिखुइया मै तर्तियसक फे प्रभुम टुँहन अभिवादन बा।
23महीह ओ सारा मण्डलीह आपन घरम स्वागत कर्ना गायसक फे टुँहन अभिवादन बा। गायसक घरम जम्मा हुइना मण्डलीक तर्फसे फे अभिवादन बा। यी सहरक कोषाध्यक्ष इरास्तस ओ हमार भैया क्वार्टस फे टुँहन अभिवादन पठारख्ल।#प्रे १९:२९; १ कोर १:१४; २ तिमो ४:२०
24[हमार प्रभु येशू ख्रीष्टक अनुग्रह टुह्र सबजहनसे रह! आमेन।]
25हम्र सबजन परमेश्वरह आदर ओ सम्मान करी। उहाँ टुँहन विश्वासम स्थिर बनैनाम शक्तिशाली बाट। मै प्रचार करल खुशीक खबर ओ येशू ख्रीष्टक बारेम करल प्रचारले यिह बट्वैठा। युग-युगसे गुप्तम रहल यी खुशीक खबर आब प्रकट होरहल, 26ओ अगमवक्तन्हक लिखल किताबम छर्लङ्ग होरहल। आब अनन्त परमेश्वरक आज्ञा अनुसार सब जातिक मनै उहाँम विश्वास करहीँ ओ उहाँक आज्ञापालन करहीँ कैक यी खुशीक खबर चारिओर प्रचार कैजैटीबा। 27एक्कठो केल सर्वज्ञानी परमेश्वरह येशू ख्रीष्टद्वारा सड्डभर महिमा ह्वाए! आमेन।
Zur Zeit ausgewählt:
रोमी 16: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
