Amosi 9
9
Lubeta lwa Mwami Leza
1Lino ndakabona Mwami kaimvwi acipaililo eelyo wakati, “Pwaya cipaililo mpocili atala kutegwa zikunguzyo zitenkaane. Kosoola mitwe yabantu boonse, aabo batisyaale ndabajaya apanga. Taakwe naba omwe uutitije, taakwe uunga wazwenga. 2Nokuba kuti basye cilindi cilamfu mane bakeenzye kwacimvumwe, ndiyoobagwisya ajanza lyangu. Nokuba kuti batante mane bakasike kujulu kwini, nkukonya ooko njoobaangula. 3Nokuba kuti bakayube atala aacilundu ca Kaameli, ndiyoobavwima kusikila nkabajate. Nokuba kuti bakandiyube kunsi aalwizi, ooko njoolailila nzoka kuti ikabalume. 4Nokuba kuti bakatolwe mubwaange abasinkondonyina, ooko njoolailila kuti bakajaigwe munkondo. Ndinooyoobalangilide kutegwa cibi cikabacitikile kutali cibotu pe.”
5Mwami, Mwami Leza Singuzuzyoonse, ooyo uunga aguma nyika yeenzemuka,
abaabo boonse bakkala mulinjiyo baleema, cisi coonse cilafuta
mbuli mulonga wa Nailo wamana ulayosa mbuli mulonga wamu Ijipiti.
6Nguuyaka maanda aakwe kujulu, nguubikka ntalisyo yawo ansi,
nguuita maanzi aamulwizi kwamana ulaatila atala aanyika, zina lyakwe ngu Mwami Leza.
7“Sena nywebo Nobaisilayeli tamuli mbuli bubede Bakusyi kulindime? Mbwaamba Mwami Leza. Sena tiindakagwisya Baisilayeli mu Ijipiti, Bafilisiti mu Kafuto a Baalamu kuzwa ku Kee? 8‘Kasimpe meso aa Mwami Leza alilangilide abwami bubyaabi.’ Ulati, ‘Ndiyoobunyonyoona kabutaciyoobonwi munyika, nikuba boobo nsikanyonyweedi limwi musyobo wa Jakobo, mbwaamba Mwami Leza.’
9“Nkaako ndiyoopa malailile, nkabela ndiyooseba musyobo wa Isilayeli mbuli busebwa maila acisebyo, pele taakwe kaseke nokaba komwe kayoowida ansi. 10Basizibi boonse akati kabantu bangu bayoojaigwa munkondo, boonse aabo baamba kuti, ‘Mapenzi tukaajane kuli, taakatusikili.’”
Kulekelelwa kwa Baisilayeli
11Mubuzuba oobo njoobukulusya tente lya Devedi lyakawa. Ndiyooyakulula masena aalyo aamwaidwe, kuyakulula matongo, ndiyooliyaka akulicita mbuli mbulyakabede, 12kutegwa bakalele bantu ba Edomu basyeede, amisyobo yoonse iibandwa zina lyangu. “Mbwaamba Mwami Leza, ooyo uuyoocita zintu eezi.”
13“Mazuba alasika, mbwaamba Mwami Leza, sikutembula nayooenzegwa asikulima,
asikusyanga nayooenzegwa asikulyatauka nsaansa. Waini mupya uuyooloka-loka
kuzwa muzilundu, akukunka kuzwa mutulundu toonse.
14Ndiyooleta bantu bangu Baisilayeli batoledwe mubwaange,
bayooyakulula minzi yabo iimwaidwe akuyookkala mulinjiyo.
Bayoosyanga myuunda yamisaansa akunywa waini wayo,
bayoopanda myuunda akulya zilyo zyayo.
15Njookkazika Baisilayeli munyika yabo beni,
tabakazyulwi limbi munyika eeyo njindakabapa.”
Mbwaamba Mwami Leza wanu.
Zur Zeit ausgewählt:
Amosi 9: Tonga96
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tonga Bible © United Bible Societies, 1994.