Amosi 2
2
Zya Bamowabu
1Mboobu mbwaamba Mwami Leza ulati, “Akaambo kazinyonyoono nzyobandicitila lyoonse bantu bamu Mowabu, nsikooleka kunyema pe. Akaambo kakuti bakatenta mafuwa aamwami waku Edomu mane aba mbuli mulambo, 2ndiyootumina mulilo kuli baku Mowabu ooyo uuyoosyukuta nkwakwa zya Keliyoti. Bamu Mowabu bayoopyopyongana kapati, bayookwemba akaambo kankondo akulila kwamweembo. 3Ndiyoonyonyoona baleli bacisi eeci, akujaya balupati-pati baco boonse bali mulincico,” mbwaamba Mwami Leza.
Zyabantu bamu Juda
4Mboobu mbwaamba Mwami Leza ulati, “Akaambo kazinyonyoono nzyobandicitila lyoonse bantu bamu Juda, nsikooleka kunyema pe. Nkaambo bakakaka mulawo wa Mwami Leza, alimwi tiibakabamba malailile aakwe, nkaambo baleza bamituni bakabacita kuti baleye, iiyi, baleza aabo basikale babo mbibakali kutobela, 5nkaako ndiyootumina mulilo kubantu bamu Juda ooyo uuyoosyukuta nkwakwa zya Jelusalemu.”
Leza mbwaakabeteka Isilayeli
6Mboobu mbwaamba Mwami Leza ulati, “Akaambo kazinyonyoono nzyobandicitila bamu Isilayeli, nsikooleka kunyema pe. Aaba bauzya baluleme ansiliva, babulide babauzya ndyasyo. 7Balyatauka mitwe yabacete mbuli kuti balyatauka lusuko lwaansi, balakaka kubacitila ziluleme badyaminidwe. Wisi amwanaakwe mulombe boonse boona aamusimbi omwe cakuti basofwaazya zina lyangu lisalala. 8Baloona kumbali aazipaililo zyoonse kulala amajansi ngobanyanga bantu kuba cijatilizyo muŋanda yaleza wabo, balanywa waini ngubakali kubbadezya bamwi.
9“Ndakanyonyoona Baamoli kabalibwenene, nokuba kuti bakali kulampa mbuli milombe, akuyuma mbuli mibanga. Ndakanyonyoona micelo yabo atala, akuzyula miyanda yabo kunsi aanyika. 10Nywebo ndakamugwisya mu Ijipiti, ndakamusolweda kwamyaka iili makumi one munkanda kuti nkamupe nyika ya Baamoli. 11Akati kabana banu ndakamupa basinsimi, aakati kabakubusi banu ndakamupa Banazili. Sena eeci tacili kasimpe nobantu ba Isilayeli? Mbwaamba Mwami Leza. 12Pele mwakanywisya Banazili waini akulailila basinsimi kuti batasinsimi pe. 13Nkaako lino ndiyoomupwaya mbuli ŋola mbwiipwayaula niizwide maila. 14Basiluno tabakakonzyi kutija, basinguzu tabakakonzyi kuliyumya, basilumamba tabakakonzyi kulivuna pe. 15Basimivwi tabakakonzyi kuzyandamana, basilumamba balapuka tabakatiji pe, awalo simabbiza takakonzyi kulivuna. 16Naba silumamba sicamba uyootija acintanda buzuba oobo.” Mbwaamba Mwami Leza.
Zur Zeit ausgewählt:
Amosi 2: Tonga96
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tonga Bible © United Bible Societies, 1994.
