JUECES 6
QCHI04
6
Gedeonta Dios cayashcami
1Israelcunaca cutinllatajmi Mandaj Diospaj ñaupajpica millaita rurarcacuna. Chaimi Mandaj Diosca, madianitacuna canchis huatacunata llaquichichun paicunapaj maquipi churarca. 2Madianitacuna ashtahuan ashtahuan llaquichijpimi, israelcunaca paicunata manchashcamantaca urcucunapi jutcucunata rurashpa, machi ucucunapipish, pircacunapipish miticunata rurarcacuna. 3Israelcuna tarpushca chagracunatapish madianitacuna, amalecitacuna, inti llujshin llajtamanta runacunapish huichiyamushpami llaquichijcuna carca. 4Israelcunapaj allpacunapi carpa huasicunata shayachishpami, tandanalla granocunataca Gaza pueblocama tucuita chingachircacuna. Ovejacunatapish, huagracunatapish burrocunatapish tucuitami huañuchircacuna. Israelpica ima micuna illajtami saquirca. 5Paicunaca animalcunandij, paicunapaj carpa huasicunandij yallitaj gentecuna huichiyamushpami, langosta c'urucuna shina tucui llajtapi jundarircacuna. Paicunapish paicunapaj camellocunapish mana yupaipaj achcacuna shamushpami, ima tiyashcatapish tucuita chingachircacuna. 6Madianitacuna chashna llaquichijpimi, israelcunaca ima charinacunapish illaj saquirircacuna. Israelcunaca Mandaj Diostami caparishpa mañarcacuna.
7Madianitacuna llaquichicujpi, israelcuna Mandaj Diosta caparishpa mañajpimi, 8Mandaj Diosca shuj profetata cachajpi paica cashna nirca: “Israelcunata Mandaj Diosca cashnami nin: Egiptocunapajta huatashca shina paicunapajta rurashpa causacujpi chai llajtamantaca ñucami llujshichimurcani. 9Egiptocunapaj maquillamantaca mana llujshichircanichu. Ashtahuanpish tucui cancunata llaquichijcunapaj maquimantapishmi llujshichircani. Paicunata cancunapaj ñaupajmanta anchuchishpaca, paicunapaj allpataca cancunamanmi curcani. 10Amorreocunapaj llajtapi cancuna causacushpaca, paicunapaj dioscunataca ama manchanguichijchu. Ñucami cancunata Mandaj Dios cani nircanimi. Ashtahuanpish cancunaca ñuca rimashcataca manamari uyashcanguichijchu” ninmi nircami.
11Mandaj Diospaj ángel shamushpaca, Ofra pambapi caj encina yura ucupimi tiyarirca. Chai pambaca abiezeritacunapuramanta Joás runapajmi carca. Joaspaj churi Gedeonca madianitacuna quichunamantami uvata capina jutcupi trigota pacalla huajtacurca. 12Chaipi Mandaj Diospaj ángel ricurishpaca:
–Mandaj Diosca canhuanmari. Canca imata mana manchaj, c'ari c'arimi cangui– nircami.
13Chaimi Gedeonca:
–Aij, ñuca amito. Mandaj Dios ñucanchijhuan cajpica ¿ima nishpataj tucui caicunaca jahuanpi jahuanpi shamun? Ñaupa ñucanchij yayacunaca: Mandaj Diosca pi mana rurai tucushca mancharinacunata rurashpami Egiptomantaca llujshichimurca nishpami parlarcacuna. Cunanca ¿ima nishpashi mana chashna ruran? Ashtahuanpish cunanca madianitacunapaj maquipi churashpamari Mandaj Diosca ñucanchijmanta anchurishca– nircami.
14Chaimi Mandaj Diosca Gedeonpaj ñahuita ricurashpaca:
–Fuerzasapa runamari cangui. Madianitacunapaj maquimanta israelcunata llujshichigri. Chaipajmi cantaca cachagrini– nirca.
15Gedeonca Mandaj Diostaca:
–Aij, ñuca amito ñucaca ¿imahuantaj israelcunataca quishpichishari? Manasespaj aillupica ñucanchij familiamari tucuimanta yalli huajchacuna canchij. Ñuca yayapaj huasipipish ñucamari tucuicunapaj q'uipa cani– nircami.
16Mandaj Diosca Gedeontaca:
–Ama manchaichu, ñucamari canhuan casha. Madianitacunataca, shujllata shinamari canca jahualla mishangui– nircami.
17Gedeonca Mandaj Diostaca:
–Quiquinpaj ñaupajpi ñuca alli ricurishca cajpi, ñucahuan rimacuj quiquinpish Mandaj Diostaj cashpaca, shuj ricuchinata rurashpa ricuchi. 18Canman cuna cashcata, cambaj ñaupajpi churangapaj ñuca apashpa tigrangacama caimantaca amaraj ripangui– nijpimi Mandaj Diosca:
–Can tigramungacama caipi shuyacushallami– nirca.
19Gedeonca chaimanta rishpami, shuj malta chivota huañuchishpa, sumajta allichirca. Shuj efa cutahuanca levadura illajlla tandatami rurarca. Aichaitaca shuj canastapi churashpa, caldotaca shuj mangapi churashpami, encena yura ucuman apashpa Diospaj angelman curca.
20Chaipimi Diospaj angelca:
–Aichatapish, levadura illajlla tandatapish japishpa cai jatun rumi jahuapi churashpa, caldotaca chai jahuallapitaj talli– nijpi Gedeonca chashna rurarca.
21Mandaj Diospaj angelca chai aichatapish, levadura illajlla tandatapish pai charicushca caspi puntahuanmi tuparca. Chaimi chai rumimanta nina llujshishpa aichatapish levadura illajlla tandatapish tucui rupachirca. Chai q'uipaca Mandaj Diospaj angelca Gedeonpaj ñaupajmantaca chingarircallami.
22Mandaj Diospaj angeltaj cashcata ricushpami Gedeonca:
–Aij, Mandaj Jatun Dioslla, Mandaj Diospaj angeltamari ñahui ñahui ricushcani– nirca.
23Ashtahuanpish Mandaj Diosca:
–Ama manchaichu, mana huañunguichu, sumaj causaita cungapajmari shamurcani– nircami.
24Chaipica Gedeonca, Mandaj Diospaj shuj altarta shayachishpami: “Mandaj Diosca sumaj causaita cujmi” nishcata shutichirca. Abiezeritacuna causacun Ofra pueblopi shayachishca altarca cunancamami shayacunraj.
25Chai tutallatajmi, Mandaj Diosca Gedeontaca:
–Cambaj yayapaj huagracunamanta shuj torota japi. Cati torotaca canchis huatayuj torota japi. Baal diospaj cambaj yaya rurashca altarta urmachi. Chai altar c'uchupi shayacuj Asera shuti huarmi diosman rijchajta rurashcalla diostapish p'itishpa shitai. 26Chashna rurashpaca, cai rumi urcu jahuapi maipi alli canapi canta Mandaj Diospaj shuj altarta shayachi. Chaipica cati torota cushpa tucui rupachi. Chaitaca Asera shuti huarmi diosman rijchajta rurashca diosta ñutushca yantahuan rupachi– nircami.
27Chaimi Gedeonca, paipajta rurajcunapuramanta chunga runacunata pushashpa Mandaj Dios nishca shina rurarca. Paipaj yayapaj familiacunatapish, pueblopi causajcunatapish manchashcamantami, Mandaj Dios mandashcata punlla mana rurashpa tuta rurarca. 28Ofra pueblopi causajcuna cayandij tutamanta jatarishpaca, Baalpaj altartapish urmachishcatami ricurcacuna. Chai c'uchupi shayaj Asera huarmi diosman rijchajta rurashca diostapish p'itishcatami ricurcacuna. Gedeón rurashca altar jahuapica cati torota cushpa tucuita rupachishcatami ricurcacuna. 29Chaimantami: “¿Maijanshi caita rurarca?” nishpa caishuj chaishuj tapunacushpa mashcacushpalla Joaspaj churi Gedeonmari chaitaca rurashca ninacurcacuna. Chai pueblopi causajcunaca Joastaca:
30–Cambaj churita huañuchingapaj canllaman llujshichi. Paimari Baalpaj altarta urmachishca, chai c'uchupi shayacuj Asera huarmi diosman rijchajta rurashca diostapishmari p'itishca– nircacunami.
31Joasca paipaj c'uchupi tucui cajcunataca:
–Baalmantaca ¿cancunachu macanacushun ninguichij? ¿Cancunaca paimanta shayarijcunachu cashun ninguichij? Maijanpish Baalpaj randi shayarijca, cunan tutamantallataj huañuchun. Baalca Diostaj cashpaca, paipaj altarta urmachijtaca paillataj imatapish rurachun– nircami.
32Chai punllami Gedeontaca, Jerobaal shutita shutichircacuna. Chaica: “Baalpaj altarta urmachishcamantaca, Baalca diostaj cashpaca Gedeontaca paillataj llaquichichun” nisha ninmi.
33Madianitacunapish, amalecitacunapish, inti llujshin llajta runacunapish shuj shinalla tandanacushpami, Jordán yacuta ch'imbashpa, Jezreel pugru pambapi carpa huasicunata shayachishpa tiyarircacuna. 34Paicuna chashna tandanacujpimi Gedeonpaj jahuamanpish Mandaj Diospaj Espíritu shamujpi, gachupi tocajpica, abiezeritacunaca paihuan tandanacurcacuna. 35Manasespaj aillumanpish huillajcunata huillachun cachajpimi, paicunapish Gedeonhuan tandanacurcacuna. Aserpaj, Zabulonpaj, Neftalipaj aillumanpish huillajcunata huillachun cachajpimi, paicunapish Gedeonhuan tandanacungapaj llujshircacuna.
36Chaipimi Gedeonca Jatun Diostaca: “Can nishca shinallataj israelcunata llaquimanta ñuca maquihuan quishpichina cashcata yachangapajca, 37trillana pambapimi, oveja yura millmata churagrini. Caya tutamantapaj chai millma ñutu tamyahuan shutujyashca, pambaca chaquishca pacarijpica, can nishca shinallataj israelcunataca ñuca maquihuan can Dios quishpichina cashcatami yachasha” nircami.
38Chashna saquijpica, Gedeón mañashca shinallatajmi tucurca. Cayandij tutamanta utcata jatarishpa millmamanta yacuta capishpaca, shuj tasa junda yacutami llujshichirca. 39Gedeonca Jatun Diostaca cutinmi: “Shuj cutinhuan cashna rurai nijpica, ama nina sindirij shina p'iñaripangui. Alli yachangapajmi cunanca cashna rurapai nini. Cai tutaca pamballata ñutu tamyahuan shutujyachishpa, millmataca chaquishcata pacarichipai” nircami. 40Chai tutapish Jatun Diosca, Gedeón mañashca shinallatajmi rurarca. Millmaca chaquishcami pacarirca. Ñutu tamyaca allpallatami shutujyachirca.

Texto Bíblico © Sociedades Bíblicas Unidas, 1989.

Dios Rimashca Shimicunami © Sociedades Bíblicas Unidas, 1989.

Texto: Biblia en Quichua Chimborazo, 1989

Mehr über die Dios Rimashca Shimicunami erfahren