GENESIS 2
2
1Tuhcite vaaw te lae te tuh-e hae kya umpaw atyn-are kha rae kou athua vae. 2Te nin sarinaw nin khe Pachia nynh a lawpaw a ryalaw kha a thangsah, te a lawpaw a ryalaw balyn kyate nin sarinaw khe a haeung.#Exo 20.11 3Tukeiccuze Pachia nynh nin sarinaw nin kha hythuapya zah taekhia lante a thyaasah, pawccecize tuh-e nin khe Pachia nynh a raepaw raenaw balyn kha thangsah zah a haeung.
4Hynh-e hae tuh Pachia nynh vaaw te lae a raenaw konglang nynh thua.
Ccangpaw Raenaw Kong
Bawipaw Pachia nynh vaaw te lae kha a rae nin khe, 5laephi kya ramkaw e aku mah um loh khyh zah ccoukupaw aku mah um loh khyh, pawccecize Bawipaw Pachia nynh laephi vawlan khuaarawsah loh khyh, te laephi vawlan looh ccoukupaw rya a lahtu mah um loh khyh; 6thuasalama tui tuh laephi kyate pou zah laephi balyn kha a ciasah. 7Oute Bawipaw Pachia nynh laephi kya-e laenoi khate ccungccapaw kha a rae, hiinnaw hy kha a naduh lungkhu lang a sawnua; te ccungccapaw tuh ahiinpaw ahysuepaw lang yn tang.#1Ko 15.45
8Te Bawipaw Pachia nynh nithua langkhe Eden kya khokhu ccangkheit a rae; te a raepaw ccungccapaw kha tuin kya a umsah. 9Bawipaw Pachia nynh do ry umpaw te ae lan ahoypaw thingku miakaw kha laephi kyate a posah, khokhu ngaelung khe hiinnaw thingku kha mah a posah, te athya ahoy nynawpaw thingku mah a posah.#Bya 2.7, 22.2, 14
10Khokhu kha tui bu khylan Eden kyate vaw vakheit pou zah a lua, tuh-e vaw tuh tuin kyate vaw pali lang a phiakuh. 11Ccangkheitnaw vaw min tuh Pishon acikuh; tuh-e vaw tuh Havilah ram balyn po lekuh lan lua zah tuh-e kyatuin sui a pou; 12te tuh-e laelung kya-e sui tuh ahoy; amynkhuhpaw badelah thingphi te oniks lung mah a um. 13Ccangningnaw vaw min tuh Gihon acikuh; tuh-e vaw tuh Kush ram balyn po lekuh lan a lua. 14Ccangthumnaw vaw a min tuh Tigris acikuh, tuh-e vaw tuh Assiria ram nithua lang aluapaw nynh thua. Te ccangpalinaw vaw tuh Zufrates acikuh.
15 Bawipaw Pachia nynh ccungccapaw kha lah zah Eden khokhu kya ryalaw khylan te do-oih khylan tuin kya a nung. 16Te Bawipaw Pachia nynh ccungccapaw kha, “Nang nynh khokhu kya umpaw thingku miakaw kya-e athae hae hynh rythyte na ae cih; 17thuasalama athya ahoy nynawpaw thingku kya-e athae hynh tuh na ae lan khyh, hynh-e thingthae hynh na ae lanze, na ae nin khe nang tuh na chih cih,” cite kaw a pya.
18Oute Bawipaw Pachia nynh, “Ccungccapaw hynh amaw makhaete um lan hoy khyh; amaw hanlan angaekuhpaw bawmtu lu kheit ka raepah cih,” a ci. 19Tukeiccuze laephi kya-e sarangpaw miakaw te vaawlang e pavaw miakaw kha Bawipaw Pachia nynh laephi khate a rae, tuh-e hae tuh ccungccapaw nynh muih zah min a phu ccaw cite amaw kalan a cciakhae hae, ccungccapaw nynh ahiinpaw ahysuepaw miakaw kha min a phu thyhte min ccarou a hoi hae. 20Ccungccapaw nynh sahiin balyn, vaawlang e pavaw hae, te sarangpaw miakaw kha min a phu hae; thuasalama ccungccapaw hanlan angaekuhpaw bawmtu ccangkheit sanmah muih khyh. 21Tukeiccuze Bawipaw Pachia nynh ccungccapaw kha thuhbabi lan a isah; oute Pachia nynh a naru ccangkheit kha lah zah, tuh-e a lawnaw kyakhe ngesaw khate a pingsah. 22Te Bawipaw Pachia nynh ccungccapaw kyate a lawpaw naru khate ccungccanung kha rae zah ccungccapaw kalan a cciakhae. 23Oute ccungccapaw nynh,
“Hynh-e hynh ka ru kya-e ru thua zah
ka ngesaw kya-e ngesaw nynh thua;
Ccungccapaw kyate
lawpaw athua keiccuze
hynh-e hynh Ccungccanung cite
ko athua cih,” a ci.
24Tukeiccuze pisepaw nynh a nung te a paaw kha cciataw zah a zu te a umkheih hae, te minmin tuh pyn pynkheit lang a tang hae.#Mat 19.5; Mar 10.7-8; 1Ko 6.16; Efe 5.31 25Te pisepaw te a zu tuh mih ccakaete um hae zah mih maethah khyh.
Zur Zeit ausgewählt:
GENESIS 2: ZB16
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Zotung Bible © Bible Society of Myanmar, 2016.