Beliebte Verse in Roma 14

Teilen

Ura sa Butubutu Baṉara te Tamasa si lopu koa gua pa ginugua ginani na napo; ba na tinoṉoto, na binule, meke na qinetuqetu tu pa korapana sa Maqomaqo Hope. Ke asa sapu nabulu nia se Karisito pa siraṉa asa, si va qetua sa sa Tamasa, meke tava sosode tugo koari na tie, sapu leana si tavetia sa.

Be toa si gita, si toa pude va lavatia sa Baṉara; meke be mate si gita, si mate pude va lavatia tugo sa Baṉara. Ke be toa ba be mate si gita, ba tanisa Tamasa tugo si gita.

Gua asa, ke mada podeke sisigitia pude koa bule koari na tie doduru totoso. Mada koa varivari tokae na variva ṉiṉirai.

Ego, mada lopu varivari zutui si gita. Mada balabala ia pude lopu tavetia si keketoṉa sapu boka vata tubarae ia pa sinea si keke tasida koe Karisito.

Ura guahe sapu zama nia sa Kinubekubere Hope: “Na Tamasa toaqu si Rau, ke tozi va hinokarani gamu Rau, sapu kote kokotuṉu pa kenuqu Rau sari doduru tie, meke kote helahelae Nau rini sapu Arau sa Tamasa,” gua. Ke hopeke gita doduru si kote tozi vura ni koa sa Tamasa pa rane vinaripitui sari hopeke nada tinavete.

Mi baeria sa tie sapu malohoro pa nana rinaṉeraṉe, ba lopu zutua babe varitokei nia koari nana binalabala soti.

Esei si agoi pude zutua sa nabulu tana votiki tie? Sa nana palabatu soti mo telena si kaqu vizatia, sapu be toṉoto babe sea si asa, meke kote qetu nia tugo Tamasa, sina Asa tu kote boka toka nia pude tavete valeana si asa.