Levítico 3
3
Li mayej re xcꞌambaleb rib saꞌ usilal riqꞌuin li Dios
1Cui te̱qꞌue li mayej re xcꞌambal e̱rib saꞌ usilal riqꞌuin li Dios, tento nak te̱mayeja chiru li Dios junak li cuacax tzꞌakal re ru, usta toro, usta ba̱c. 2Li ani tixqꞌue lix mayej cuacax, tento nak tixqꞌue li rukꞌ saꞌ xjolom ut tixcamsi saꞌ li oqueba̱l re li tabernáculo. Ut eb laj tij teꞌxrachrachi lix quiqꞌuel saꞌ xbe̱n li artal ut chixjun sutam. 3Li mayej re xcꞌambal rib saꞌ usilal riqꞌuin li Dios, aꞌan jun cꞌatbil mayej. Nak tixqꞌue li mayej aꞌan, tixqꞌue lix xe̱bul li cꞌamcꞌot ut chixjunil li xe̱b li cuan chi saꞌ. 4Tixqꞌue lix que̱nkꞌ cuib ut lix xe̱bul ut tixqꞌue ajcuiꞌ li xe̱b li cuan chixcꞌatk xsaꞌ. Ut tixqꞌue ajcuiꞌ li xe̱b li letzlo chiru lix chꞌochꞌ. 5Ut eb li ralal xcꞌajol laj Aarón teꞌxcꞌat li mayej aꞌan saꞌ li artal saꞌ xbe̱n li siꞌ. Ut aꞌanak jun li sununquil cꞌatbil mayej ta̱cuulak chiru li Ka̱cuaꞌ. 6Cui carner li tixqꞌue chokꞌ xmayej re xcꞌambal rib saꞌ usilal riqꞌuin li Ka̱cuaꞌ Dios, tento nak tixqꞌue junak tzꞌakalak re ru, usta te̱lom usta ixki carner. 7Cui tixqꞌue junak li sa̱j carner chokꞌ xmayej, tixqꞌue chiru li Ka̱cuaꞌ. 8Tixqꞌue li rukꞌ saꞌ lix jolom li xul ut tixcamsi chiru li oqueba̱l re li tabernáculo. Ut laj tij tixrachrachi lix quiqꞌuel saꞌ xbe̱n li artal ut chixjun sutam. 9Li mayej re xcꞌambal rib saꞌ usilal riqꞌuin li Ka̱cuaꞌ Dios, aꞌan jun cꞌatbil mayej. Tixqꞌue li xe̱b ut tixqꞌue lix ye chi jun. Tixyocꞌ toj saꞌ xto̱nal ut tixqꞌue ajcuiꞌ lix xe̱bul chixjunil li cꞌamcꞌot joꞌ ajcuiꞌ li cuan chi saꞌ. 10Tixqꞌue lix que̱nkꞌ cuib ut lix xe̱bul ut tixqꞌue ajcuiꞌ li xe̱b li cuan chixcꞌatk xsaꞌ. Ut tixqꞌue ajcuiꞌ li xe̱b li letzlo chiru lix chꞌochꞌ. 11Laj tij tixcꞌat chixjunil aꞌin saꞌ li artal. Li tzacae̱mk aꞌin, aꞌanak jun li mayej ta̱qꞌuehekꞌ chiru li Ka̱cuaꞌ. 12Cui tixyechiꞌi junak li chiba̱t chokꞌ xmayej, tixqꞌue chiru li Ka̱cuaꞌ. 13Tixqꞌue li rukꞌ saꞌ xbe̱n lix jolom li xul ut tixcamsi chiru li oqueba̱l re li tabernáculo. Ut laj tij tixrachrachi lix quiqꞌuel saꞌ xbe̱n li artal ut chixjun sutam. 14Nak tixqꞌue li cꞌatbil mayej aꞌin chiru li Ka̱cuaꞌ, tixqꞌue lix xe̱bul li cꞌamcꞌot ut tixqꞌue ajcuiꞌ li xe̱b li cuan chi saꞌ. 15Tixqꞌue lix que̱nkꞌ cuib ut lix xe̱bul ut tixqꞌue ajcuiꞌ li xe̱b li cuan chixcꞌatk xsaꞌ. Ut tixqꞌue ajcuiꞌ li xe̱b li letzlo chiru lix chꞌochꞌ. 16Laj tij tixcꞌat chixjunil aꞌin saꞌ li artal. Li tzacae̱mk aꞌin, aꞌanak jun li sununquil mayej ta̱cuulak chiru li Ka̱cuaꞌ. Chixjunil li xe̱b re li Ka̱cuaꞌ. 17Incꞌaꞌ te̱tzaca lix xe̱bul li xul chi moco lix quiqꞌuel. Aꞌin jun li chakꞌrab cua̱nk xcuanquil junelic. Yalak bar cua̱nkex la̱ex li naꞌbej yucuaꞌbej te̱ba̱nu li chakꞌrab aꞌin, joꞌ eb ajcuiꞌ le̱ ralal e̱cꞌajol li teꞌcua̱nk mokon.
Valgt i Øjeblikket:
Levítico 3: kek
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2019, Wycliffe Bible Translators. All rights reserved.