Nimlivolivon 10
10
Si Pite a kani Kenaylyo
1Amyan so asa ka tao do Kaysadiya a ili a meyngaran si Kenaylyo a panirsirngen da no asa lipenpenan a itaysang do Itadi. 2Tana beken a tao do Yotay ori am manoyong o nakenakem na ji Ama ta do to a ka nira asa ka vahay. Rako o sidongan na so ji makahakaw a tao do Yotay a kasangib na meynozi ji Ama ta do to. 3Ipisa do makoyab do ikatlo no toki am nimapacita jya o asa ka tinsi ni Ama ta do to. Maniring am, “Mo Kenaylyo.” 4To na nita o tinsi, ta ikamogaw na. Maniring am, “Mo Panirsirngen, ikongo mo ipanci ang.” Maniring o tinsi am, “Na imo manakem ni Ama do to, ta nimamizing na o inozi mo. Na katenngan o mo panidongan so ji makahakaw a tao. 5Am ori o ipanovoy mo so tao a mangay do Yepey a manci no meyngaran so Simong Pite a mai. 6Yamyan do vahay ni Simong a mapakapkapya so nihab da kolit no baka. Yamasngen do pasalan o vahay da.” 7Karwan na rana no tinsi am ipanci ni Kenaylyo o rarwa ka lamlamsoy na mai a kano asa ka itaysang do Itadi a manoyong so nakenakem ji Ama ta do to, 8kapanci na nya jira so ciring no tinsi a katovoy na sira mangay do Yepey.
9Mararaw do ikadwa na araw am masngen rana sira do Yepey o nitovoy ni Kenaylyo. Si Pite rana am meynozi do atep no vahay da. 10Makcin rana am naknakmen na o kakan na. Manotong pa sira am to ngyan so nipacita na jya ni Ama ta do to do akmey tateynep na. 11So nipakacita na so hanit a meywang a kakasan no akmey tontonen da milakayob do teyrahem. 12Do avak na am amyan so meycyamadadayan a omalalam a kano volay a kano meyyasasalap. 13Amyan so meyzezyak a manci nya. Maniring am, “Mo Pite, peytatanek rana kapanzakat mo so yakan mo.” 14Am maniring si Pite am, “Mo Panirsirngen, taosya, ta ji ko pa nikoman so sang, ta oya am ji namen ngangana a tao do Yotay.” 15Maniring pa jya am, “O ipanci ni Ama ta do to apya kanen am ji mo mancyan a ji ngangana an.” 16So nikeypitlo na makamizing sya makacita sya a kahap na rana sya ni Ama ta do to do teyngato.
17Naknakmen na ni Pite do onowned na o peypeypangayan no nimacita na am to sira makaranes o nitovoy na ni Kenaylyo a tao do vahay ni Simong. 18Maniring sira am, “Yamyan so asa ka tao a meyngaran so Simong Pite a yamisan do jya?”
19Naknakmen na pa ni Pite o peypeypangayan no nimacita na ori am maniring jya o Seyzi am, “Yamyan so yatatlo a ka tao a yakomala jimo. 20Meyhekas ka kapacihza mo jira. Ji mo a ratan, ta yaken o nitomovoy sira do jya.” 21Am ori o nipeyhekas na ni Pite. Maniring jira am, “Yaken o nyo kalahen ang. Ikongo nyo ipanci.” 22Maniring sira am, “Na nitovoy yamen ni Kenaylyo a panirsirngen da no asa lipenpenan a itaysang do Itadi. Iya rana am na iraralay si Ama ta do to. Da ikanig no tao do Yotay, ta tey yapya o nakenakem na so tao. Nipaziman na rana jya no asa ka tinsi o kai mo do vahay na. Ta amizngen na o inanao mo sya.” 23Am ori o nipasdepan na sira ni Pite a kapeysan na sira.
Ikadwa na araw am macihza jira si Pite a kano tatasa akma ney kakteh do cinai a meyili do Yepey. 24Ikatlo na araw am makaranes rana sira do Kaysadiya. Am amyan rana do dang si Kenaylyo a kano zipozipos na kano kagakagagan na amnanala sya. 25Somdep si Pite am mangay si Kenaylyo do tangain na kapeylilitod na amraralay nya. 26Maniring si Pite jya am, “Peytatanek rana. Ji ka akman sang, ta meyyangay ta tao.” 27So nipeysirisiring da somdep do vahay ni Kenaylyo. Meyratatang am macita na ni Pite o aro a tao a meylovolovot do sahad na. 28Maniring jira am, “Nyo katenngan an, ta do iwawalam namen a tao do Yotay am ji namen a mya o kangay namen a komawalam jinyo a beken a tao do Yotay. Am kanimanci na nya jyaken ni Ama ta do to no kakyab. Ta maniring am, ‘Ji mo a ratan sira o beken a tao do Yotay. Ta ji meycyapyapinpinan o nyamamaog ko a tao do karawan.’ 29Am ori o ko na ji raci so ko kapacikaop jinyo do jya. Am ikongo nyo pancyan nyaken a mai do jya.”
30Maniring si Kenaylyo am, “Yakapat araw rana o hanga na no nipeynozi ko do vahay namen do ikatlo no toki do makoyab am to ngyan so asa ka tao a maniray so ayob a meytatanek do tangain ko. 31Maniring am, ‘Mo Kenaylyo, na nimamizing ni Ama ta do to o inozi mo. Na katenngan imo a yamanidong so tao. 32So ipanovoy mo so tao a mangay do Yepey a manci no meyngaran si Simong Pite a mai. Iya rana am yamisan do vahay ni Simong a mapakapkapya so nihab da kolit no baka. Yamasngen do pasalan o vahay da.’ 33Am ori o nipanovoy ko so tao a manci nimo. Ko masaray, ta ka nimai rana. Yamen rana sicyaikwaya am namen malovot do tangain ni Ama ta do to a yaomamizing so nipanci na jimo a inanao na jyamen.”
Nipangnanao na ni Pite
34Maniring si Pite am, “Ko katenngan si Ama ta do to a mapeyyangangay so tao. 35Tana tao do Yotay a tana beken a tao do Yotay am miminen na sira ikaglaw o omraralay nya a tao a mangononong do ciring na. 36Nyo katenngan rana o Mapasaray a Ciriciring na ni Ama ta do to a nipeylimwang na jyamen a Isedi a tao. Ori rana am na ipanta yaten so ikapiya no onowned ta. So ikabo na rana no oyyan na nyaten ni Ama ta do to, ta nitovoy na si Yeso Kizisto a Panirsirngen no tao do peycyamahamahatawan na. 37Nyo na katenngan an, mateyka si Yowani a omononong do kapanaktak na am papwen na rana do Cyadidi a macinapnap do Yotay o keyyan no mapeyzokab a vazay. 38Nioyatan na no Seyzi si Yeso a tao do Nasale. So nilivolivon na mangiwakwak so meykeyngeyngen a tao a mamozwaw so kalamsoyan ni Satan a komovot do tao, do kapacikaop na jya ni Ama ta do to. 39Yamen rana am yongkad na, ta nimacita namen o vazay ni Yeso do Yelosaleng a kado peycyeylilyan na do Yotay. Nipadket da do jyojika si Yeso kawakwak na. 40Am ikatlo na araw am nivyay na ni Ama ta do to a kapacita na nya jyamen, 41a kapacihanghang namen jya koman no keypirwa na mavyay. Beken a mamimin o tao a nimakacita sya, ta yamen a nipamnekan ni Ama ta do to o nimakacita sya a meylimwang nya. 42Nipakoyokoy na jyamen o kapeylimwang namen no kanoyong na ni Yeso a nipamnekan ni Ama ta do to a mapacici so mavyay a kano nimawakwak a tao. 43Si Yeso o pakacirngan da so ciring da no panoyonoywan na so ciring ni Ama ta do to no kakwa. Ipanci da o ka si Yeso no makavonas so raraten no omanoyong jya tao.”
Nioyatan no Seyzi o beken a tao do Yotay
44Mangononong si Pite am oyatan no Seyzi o omamizing so ciring na tao. 45Am ori o nipeyzokab da no tao do Yepey a omraralay ni Yeso a nimacihza ji Pite, ta nipanta na sira ni Ama ta do to so Seyzi o beken a tao do Yotay. 46Ta nimamizing da o kapeyzezyak da so macitarek a ciring a apo do Seyzi a somaray ni Ama ta do to. Maniring si Pite am, 47“Yana nioyatan sira no Seyzi akman jyaten. Am ori o ji ta raci sira taktakan.” 48So pancyan na nira ni Pite a mangozay do ngaran ni Yeso Kizisto a tomaktak jira.
Valgt i Øjeblikket:
Nimlivolivon 10: snt
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Bible Society in Taiwan