MATA 2
2
MATA 2
1Yɔ Yeesu mɔɔy a Baytilaama a Yahuduya hɛbt du a wɛl yɔ Hirudus gi waar gedu, hinmɛɛkya dubtɛ hi fu̧u̧z a ɔ̧tkazigi hi zaa a Urusalima hi warɔ
2a Yahuduya waar bɔ mɔɔy ay nɔ?
Wi gbɛn sɛwalɔ mid a ɔ̧tkazigi, hinɔ giya wi zaa an wi ɗɔbsige.
3Yɔ waar gbɔɔl bɔ Hirudus lag anbɔ kpoosɔ naamɔ hi dood Urusalimaya wɔ sɛw. 4Hirudus mɔks Bɛtmaak-wookya gbɔlɛ wɔ hi Bɛtmaakdɔkya wɔ sɛw warihi lɛlyɔ Masihu bɔ gɔ gi mɔɔy du. 5Hi raasige
a gi an gi mɔɔy a Baytilaama a Yahuduya hɛbt du. Yɔ anbɔ hinyɔ Bɛtya̧a̧-kɛŋkya bɔ bi̧i̧ amntɔnɔ gɛrɛ: 6a Bɛt raa a yɛrɛ mɔɔ Baytilaama a Yahuduya hɛbt du, mɔ kōd mɔ dāār Yahuduya waal gbɔlɛ wɔ sɛw gɛ, anyɔ waar gbɔɔl gɔ gi fu̧u̧ a mɔɔge, an gi oo dood be Israhilaya wɔ.
7Yɔ anbɔ Hirudus el hinmɛɛkya dubtɛ wɔ luurlɛlɛ warihi ɔ̧tyɔ sɛwal bɔrɔ mid du rɔbtɔnɔ. Yɔ hi raasig ɔ̧tɔ,
8wɛɛ yaahi a Baytilaama raahi
a rekin a Baytilaama nɛ ɓɛɛ waayɛ̧s bɔ rɔbtɔnɔ, gɔ nɛ zɛŋge nɛ kamsib ramsɔ an bee hɛw be rek be ɗɔbsige.
9-10Yɔ hi kɛms waar bɔ dɔglɔ gi da̧a̧ anbɔ hi ɗund hi rekɔ. Yaala sɛwal bɔ hi gbɛnig nɛ a hi hɛbtdu a ɔ̧tkazigi wɛɛ mida. Yɔ hi gbɛn anbɔ hi dag hat gbɔɔltɔnɔ daarlɛlɛ. Sɛwal bɔ dosihi muut du, tuur a lɛlyɔ waayɛ̧s bɔ gi ge erɔ. 11Hi gul luk bɔ gedu hi zɛm waayɛ̧s bɔ hi nɔɔtɔ Mariyama, hi zagl di hi ɗɔbsige; hi wɛɛ hi kpɛ̧ɛ̧r wɔdya̧ hi ha̧s hɛɛlmɔto hi tɛ̧ɛ̧mɛk okt ki̧i̧lhɛmntya, hi tɛ̧ɛ̧mɔt za ki̧i̧lhɛmntya nuŋgɔ a ɗaasɛ-rɛyɔ, hi gaa waayɛ̧s bɔ.
12Kuudu yɔ Bɛt wɛɛ gi raahi yorum du a bɔhi wɛɛ a Hirudus ge, wɔrɔ hi wɛɛ hi tɛ gbɔnɔ za dɔɔmi hi wɛɛ hi lɛlɛ. 13Yɔ hinmɛɛkya dubtɛ wɔ hi rekɔ, Waar Bɛtwalsɛrɔ za zaa Yusufu ge a yorum du raage
a wag kaasi, Hirudus gi ɓɛɛk waa bɔ an gi gbɔŋge. Ɗukum mɔ loo waa bɔ hi nɔɔtɔ mɔ nɔɔnihi mɔ renihi a Misra hɛbt du, mɔ kɔm hɔ gi tuur an gɔ be raamɔ mɔ wɛɛza.
14Yusufu ɗundɔ loo waa bɔ hi nɔɔtɔ Mariyama a yɛms du hi retin a Misra. 15Hi kɔm hɔ tuur a ɔ̧tyɔ Hirudus wɔr gedu. Hin bɔ lab tuur an hinyɔ Waar Bɛt dɔg a ya̧a̧kɛŋkɔya bɔ gi ya̧a̧ du a be elz waa be tuuz a Misra gi wooyyɔ .
16Yɔ Hirudus gbɛn an hinmɛɛkya wɔ hi maagma, kpoosɔ nɔɔsig ha̧a̧ltɔnɔ, yaa layaadɛ hi rek hi gbɔm walɛwaat wɔ hi gin wɛl eerɛ hi wɔ hi tuur wɛl eer gɛ sɛw a Baytilaama hɛbt du sɛw anyɔ lag ɔ̧t yɔ sɛwal bɔ mid du a hinmɛɛkya dubtɛ wɔ hi ya̧a̧ du. 17Yɔ anbɔ hinyɔ Bɛtya̧a̧kɛŋkya bɔ Zeremi da dɔg amntɔnɔ wooyyɔ
18a hi lag sɛbt boo a Rama hi kaalɛ, hi hekil ha̧a̧ltɔnɔ, Rahila gii gi kaak waatɔ wɔrko. Yɔ waatɔ wɔ hi wɔr be, ta̧a̧ an hi rɔɔg ma gɛ.
19Yɔ Hirudus bɛɛ wɔrko, Waar Bɛt walsɛr bɔ zaa Yusufu ge a yorum du a Misra, raage
20a ɗundum mɔ loo waa bɔ hi nɔɔtɔ nɛ wɛɛtin a Israhila hɛbt du. Dood wɔ hi ɓɛɛk nɛ waa bɔ an hi gbɔŋge hi wɔɔr ma.
21Yusufu ɗundɔ loo waa bɔ hi nɔɔtɔ Mariyama hi wɛɛ a Israhila hɛbt du. 22Hɔnɛyɔ Yusufu lag a waar Hirudus waawal Arkelawus gii wɛɛ gi yɛr baatɔ waar umsɔ a Yahuduya, hoobha̧a̧gha̧ rekɔ a Yahuduya hɛbto. Yɔ Bɛtwalsɛr bɔ wɛɛ raasig a yorum du a bɔgi ɗɔɔt hɔ, dɔŋgɔ, da rek a Galile hɛbt du. 23Da ɗɔɔt a waal gbɔɔl za bɔ nuŋgɔ a Nazarɛd gedu. Wɛɛ hinyɔ Bɛtya̧a̧-kɛŋkya bɔ dɔg nɛ wooyyɔ
a Bɛt raa a hi elig a gi Nazarɛdyayɔ.
Právě zvoleno:
MATA 2: NTD
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Doyayo New Testament © Bible Society of Cameroon, 1991.