Éxodo 20
20
Chunka mandamientukuna
Deuteronomio 5.6-21
1Tayta Diosmi nirqan:
2<<Noqami Tayta Diosniki kaykä. Egiptucho ashmay kashqaykipitami jorqamushkä.
3<<Juk dioskunamanqa ama yärakunkisu.
4<<Ima ïdulutapis ama rurankisu jana pasacho kaykaq niraqta, kay pasacho kaykaq niraqta ni lamar rurincho kaykaq niraqtapis. 5Saykunaman ama qonqurpakunkisu ni adorankisu.#Éxo. 34.17; Lev. 19.4; 26.1; Deut. 4.15-18; 27.15. Noqalami [munayyuq] Tayta Diosniki kaykä. Noqalata adoramänaykitami munä. Saymi mana cäsukamar ïdulukunata adoraqkunataqa castigashaq kikinta, surinta, wilkanta y shurukta wilkantapis. 6Noqata kuyamar mandamientükunata cumpliqkunatami isanqa waranqa (1,000) generación kayashqanyaq kuyapar yanapäshaq.#Éxo. 34.6-7; Núm. 14.18; Deut. 7.9-10.
7<<Tayta Diosnikipa jutinta lutalaqa ama joqarinkisu. Jutinta lutala joqariq kaqtaqa castiganqami.
8<<Jamay junaq sagrädu kashqanta ama qonqankisu.#Éxo. 16.23-30; 31.12-14. 9Semänacho soqta junaq arushpayki lapan ruranaykipaq kaqkunata ruranki. 10Qanchis kaq junaqchöqa Tayta Diosnikita adorashpayki ama arunkisu.#Éxo. 23.12; 31.15; 34.21; 35.2; Lev. 23.3. Saynöpis ama arusinkisu olqutapis warmitapis surikikunata, olqutapis warmitapis ashmaynikikunata, uywaykikunata ni nacionnikicho jäpa runakunatapis. 11Tayta Diospis jana pasata, kay pasata, lamarta y lapan imaykatapis soqta junaq kamarkurmi qanchis kaq junaqcho jamarqan. Sayno jamashqanpitami say junaqta bendisishpan sagrädu junaq kananpaq nirqan.#Gén. 2.1-3; Éxo. 31.17.
12<<Mamaykitawan taytaykita ali rikanki.#Deut. 27.16; Mat. 15.4; 19.19; Mar. 7.10; 10.19; Luc. 18.20; Efe. 6.2. Saynöpami Tayta Diosniki qoykushunaykipaq kaq nacioncho aska wata kawanki.#Efe. 6.3.
13<<Runa mayikita ama wanusinkisu.#Gén. 9.6; Lev. 24.17; Mat. 5.21; 19.18; Mar. 10.19; Luc. 18.20; Rom. 13.9; Stg. 2.11.
14<<Majaykita ama jarukunkisu.#Lev. 20.10; Mat. 5.27; 19.18; Mar. 10.19; Luc. 18.20; Rom. 13.9; Stg. 2.11.
15<<Ama suwakunkisu.#Lev. 19.11; Mat. 19.18; Mar. 10.19; Luc. 18.20; Rom. 13.9.
16<<Manakaqta pitapis ama tumpankisu.#Éxo. 23.1; Mat. 19.18; Mar. 10.19; Luc. 18.20.
17<<Runa mayikipa wayinta ama munapankisu. Saynöpis ama munapankisu warminta, olqu ashmayninta, warmi ashmayninta, törunta, ashnunta ni imaykankunatapis>>.#Rom. 7.7; 13.9.
Israel runakuna mansariyashqan
Deuteronomio 5.22-33
18Say hörami Israel runakuna wiyayarqan maqakuy bunrurushqanta y cornëtata tukamushqanta. Saynöpis rikayarqan elqukushqanta y jirka qoshnishqanta. Saymi fiyupa mansarir karulapita rikaräyarqan. 19Saychömi Moisésta niyarqan: <<Qamla aywaykulay Tayta Dioswan parlamunaykipaq. Tayta Dios nishushqaykita wilayämaptiki lapantami cäsukuyäshaq. Noqakunata Tayta Dios parlapäyämaptinqa wanuyäshaqchir>>.#Heb. 12.18-19.
20Sayno niptinmi Moisés nirqan: <<Ama mansariyaysu. Tayta Dios shamush munayyuq kashqanta tantiyar mana jusalikuyänaykipaqmi>>.
21Saypitanami runakuna karulapita rikaraykäyaptin Tayta Dios kaykashqan qenqiraykaq pukutayman Moisés wisarqan.
Altarta imano rurayänanpaqpis tantiyasishqan
22Saypitanami Moisésta Tayta Dios nirqan: <<Israel runakunata niy: <Tayta Diosmi nin: Jana pasapita parlamushqäta wiyayashkankimi. 23Adorayänaykipaq ima diostapis qoripita ni qellaypita ama rurayankisu.
24<< <Altarta noqapaq alpapita rurayay. Saycho rupasina sacrificiuta y jawka kawakuy sacrificiuta rupasiyanki uyshata karpis, cabrata karpis, wäkata karpis o töruta karpis. Maychöpis adorayämänaykipaq nishqä kaqcho sayno rurayaptikimi noqa shamur bendicionnïta qoyäshayki. 25Noqata adorayämänaykipaq altarta perqarqa laqläni rumikunalawan perqayanki.#Deut. 27.5-7; Jos. 8.31. Laqlash rumiwan perqayaptikiqa manami alisu kanqa. 26Saynöpis grädayuqta ama rurayankisu. Grädayuqta rurarkur wisäyaptiki penqaynikikunami rikakanqa> >>.
Právě zvoleno:
Éxodo 20: qvhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2003, Wycliffe Bible Translators, Inc. All rights reserved.