Éxodo 18
18
Moisésta suedrun Jetro watukashqan
1Madianita runakunapa cüran Jetrumi Moiséspa suedrun karqan. Paymi musyarqan Moisésta y Israel runakunatapis Tayta Dios yanapashqanta. Saynöpis musyarqan Egiptupita Israel runakunata Tayta Dios jorqamushqanta.
2Mas puntalatanami Moisésqa warmin Séforata papänin kaqman kutinanpaq despacharqan. Chaptinmi Jetruqa surin Séforata 3ishkan wawankunatawan chaskikurqan.#Hech. 7.29. Jäpa markacho tash karmi jukaq surinpa jutinta Moisés churaparqan Gersón kananpaq.#18.3 Gersón ninanqa jäpa ninanmi.#Éxo. 2.21-22. 4Jukaqpanami jutin karqan Eliezer.#18.4 Eliezer ninanqa Tayta Diosnï yanapäman ninanmi. Say jutita churaparmi nirqan: <<Faraón wanusimänanpaq kaykaptinmi papänï yärakushqan Tayta Dios qeshpimunäpaq yanapämash>>.
5Say wisanmi sunyaq jirkacho Israel runakunawan Moisés posädaraykäyarqan Tayta Dioswan tinkuna jirka cercancho#Éxo. 3.1; 19.2.. Saymanmi wilkankunata y Séforata pushakurkur suedrun Jetro charqan. 6Chaykurmi Moisésta nirqan: <<Warmikitawan surikikunata pushakurkurmi watukaq shamushkä, hïju>>.
7Saymi suedrun Jetruta chaskikushpan qonqurpakuykur Moisés winchikushpan musarqan. Imano kashqantapis wilapänakurkurnami toldunman yaykuyarqan. 8Saychömi suedrunta Moisés wilaparqan Israel runakunapa favornin sharkur Faraóntawan qatipaq Egipto runakunata Tayta Dios ushakäsishqanta. Saynöpis wilaparqan Egiptupita yarqamur nänicho nakayashqanta y Tayta Dios imano yanapashqantapis.
9Egiptupita Israel runakunata Tayta Dios jorqamushqanta wilapaptinmi Jetro seqaypa kushikur 10nirqan: <<Tayta Dios alabash kaykuläsun. Paymi Faraónpa munaynincho kayaptiki Egipto runakuna nakasiyäshushqaykipita jorqayämushushkanki. 11Egipto runakuna contrayki kaykaqta vincish kaptinmi tantiyakü lapan dioskunapitapis Tayta Dios mas munayyuq kashqanta>>.
12Nirkurmi Jetruqa uywata pishtarkur Tayta Diospaq sacrificiuta rupasirqan. Wakin uywakunatapis Tayta Diospa nawpancho#18.12 Tayta Diospa nawpancho nirqa Tinkuna Tolducho kaykaq altarpa nawpanchömi nikan. pishtarmi Aarónwan y Israel mayor runakunawan aysata mikuyarqan.
Juezkunata Moisés churashqan
Deuteronomio 1.9-18
13Saypita waraynin junaqmi Israel runakuna quejakuyashqanta arreglananpaq Moisés jamakurqan. Saymanmi tutapita tardiyaq quejakuq aywayarqan.
14Moisés qoyati arreglaptinmi suedrun nirqan: <<Tutapita tardiyaq ¿imanirtaq japalayki quejakuyashqanta arreglaykanki?>>
15Sayno niptinmi Moisés nirqan: <<Israel runakuna noqaman shayämun Tayta Diosta manakur arreglanäpaqmi. 16Ima janalanpis rimanakur noqamanmi shayämun mayqanpis jusayuq kashqanta arreglanäpaq. Nirkurnami paykunata tantiyasï Tayta Diospa estatütunkunata y leyninkunata>>.
17Saymi suedrun Jetro nirqan: <<Noqapa tantiyaynïpita sayman aläpami jatikash kaykanki. 18Saynöla rurarqa pasaypami utikankipaq. Saynölami runakunapis utikäyanqa. Saysika runakunata manami japalayki arreglayta atipankipaqsu. 19Kanan yäsishqäta shumaq wiyamay. Yäsishqäno ruranaykipaq Tayta Dios yanapaykuläshunki. Tayta Diosta manakur runakunata arreglashqayki alimi kaykan. 20Saynöpis Tayta Diospa estatütunkunata y leyninkunata yachasishqayki alimi kaykan. Tayta Dios munashqanno kawayänanpaq yachasishqaykipis alimi kaykan. 21Sayno kaptinpis yanapäyäshunaykipaq formal runakunata akray. Paykuna kayäsun Tayta Diosta mansapakuq, mana lulakuq y äshikuyta mana chaskipakuq. Paykunapita wakinta churanki waranqa (1,000) runakunapa jueznin kananpaq, wakintana churanki pachak (100) runakunapa jueznin kananpaq, wakintana churanki pisqa chunka (50) runakunapa jueznin kananpaq y wakintana churanki chunka runakunapa jueznin kananpaq. 22Say juezkunanami ima quëjutapis arreglayanqa. Arreglayta mana puëdiyashlantanami qamman apayämunqa. Sayno yanapäyäshuptikiqa manami aläpa utikankipaqnasu. 23Tayta Dios permitiptin yäsishqäno ruraptikiqa valorniki kanqaraqmi. Quejakuyashqanta shumaq arreglayaptinmi lapan runakunapis kushish wayinman kutikuyanqa>>.
24Suedrun yäsishqannölami lapanta Moisés rurarqan. 25Saymi formal runakunata akrarkur wakinta churarqan waranqa (1,000) runakunapa jueznin kananpaq, wakintana churarqan pachak (100) runakunapa jueznin kananpaq, wakintana churarqan pisqa chunka (50) runakunapa jueznin kananpaq y wakintana churarqan chunka runakunapa jueznin kananpaq. 26Say juezkunanami runakuna quejakuyashqanta waran waran arreglayaq. Arreglayta mana kamäpakuyashqantami isanqa Moisés arreglananpaq apayaq.
27Saypitanami Moiséspita despidikurir markanpa suedrun kutikurqan.
Právě zvoleno:
Éxodo 18: qvhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2003, Wycliffe Bible Translators, Inc. All rights reserved.