Nzyeté 1
1
Á LAA NZYETÉ
(1–11)
Wɔɔn aa páʼ Ssé la gÿo njÿó, ḿbiŋ ḿbwóon pʉ̀a mesoŋ
1Á laa nzyeté, e Ssé gÿo lefaŋ pɔ́ tsetsáʼ gwɔ́ wó#1:1 Á laa nzyeté… Yɔɔn ée ntí lekyàgte gie mé lwo ńgyá, mbà mé la lɔg ńkyagte wɔɔn nkàŋ púʼu. .
2Atsetsáʼ la zɔɔn ńgwɔ́ pɔ́ te shÿó, té lagá mmó, amwòonnzém pwoon ndùŋmvfò ntse tépàa, à Zẅìge Ssé pú ńgwɔ́ ndùm ntse ésele. 3E Ssé leen ńké ńgɔɔn ngie: «N kwǒŋ ngie kyɛ̀ʼ gwɔ́ wó!» Akyɛ̀ʼ gwóon ńgwɔ́ wó. 4E Ssé gyá páʼ, akyɛ̀ʼ áa mbòŋ, ńdeen ńké faga kyɛ̀ʼ na nzěm. 5E Ssé tsẅi lezíŋ kyɛ̀ʼ lê fʉ̀ʼʉ zsǒ, ḿbiŋ ńtsẅi se nzěm lê fʉ̀ʼʉ letsẅɛ́ʼ. Nzěm piŋ síŋ, njÿó gÿo ńdʉ́a, wɔɔn lɔgɔ ńgwɔ́ ndùŋmvfò lyɛ̌ʼ.
6E Ssé leen ńké ńgíŋe ńgɔɔn ngie: «N kwǒŋ ngie ntsɔ̀ʼ tépàa gie e ge shʉ́a mentse nzsè pʉ́a, e gwɔ́ wó!» 7Entsɔ̀ʼ tépàa gwóon ńgwɔ́ wó. E Ssé gÿo púʼu, ńdɔg shʉ́a mentse, metsɔ́ gwɔ́ nzème ssé, metsɔ́ gwɔ́ nzème tÿǒ. 8Ńgÿo púʼu, ńtóŋ lezíŋ ntsɔ̀ʼ tépàa ŋwɛ́ lê lefaŋ. Nzěm piŋ síŋ, njÿó gÿo ńdʉ́a, wɔɔn lɔgɔ ńgwɔ́ mbɔ́ɔntè lyɛ̌ʼ sépʉ́a.
9E Ssé gíŋe ńgɔɔn ngie: «N kwǒŋ ngie mentse mie é pú ńjÿó jʉʼ ndùmo ssé tsetsáʼ, e pú ńcúʼte tàʼa jʉʼ, ńdɔg ńgÿo, ajʉʼʉ njube jubé kẅɛ.» Ńgɔɔn, á gwóon ńgwɔ́ púʼu. 10E Ssé tsẅi lezíŋ jʉʼʉ njube jubé lê ndùmo ssé tsetsáʼ, ńtóŋo jʉʼ gie mentse cuʼté wó lê ntse máŋʉ́, e Ssé gyá ngie, áa mbòŋ. 11E Ssé gíŋe ńgɔɔn ngie: «N kwǒŋ ngie shúm sẅisẅê sáʼa ndùmo ssé tsetsáʼ: púʼu, megǐ ne ńnáa membyè mɔ́b, metÿǒ mentí mentí mie é zéme ntɔ̌ɔn, e ne náa mɔ́b membyè!» Ńgɔɔn, á gwóon ńgwɔ́ púʼu. 12Eshúm sẅisẅê sáʼa ndùmo ssé tsetsáʼ: yɛ̌ ntí legǐ wɔ́ɔ ná ye mbyè, yɛ̌ ntí tÿǒ wɔ́ɔ, é zém mentɔ̌ɔn mie é náa mɔ́b membyè. E Ssé gyá ngie, áa mbòŋ. 13Nzěm piŋ síŋ, njÿó gÿo ńdʉ́a, wɔɔn lɔgɔ ńgwɔ́ mbɔ́ɔntè lyɛ̌ʼ sétá.
14E Ssé gíŋe ńgɔɔn ngie: «N kwǒŋ ngie shúm sie é náa kyɛ̀ʼ e gwɔ́ lefaŋ, lélɔg faga fʉ̀ʼʉ zsǒ na fʉ̀ʼʉ letsẅɛ́ʼ; é ge gwɔ́ meliŋé lélɔg ńzáb melyɛʼɛ́ línɔ̀ɔn, ńzsé mefʉ̀ʼnjÿó mbɔɔ mengùʼu láʼ; 15esɛ̌ shúm sie é náa kyɛ̀ʼ, e piŋ fó lefaŋ ḿbú ńkyɛʼɛ ndùmo ssé tsetsáʼ.» Ńgɔɔn, á gwóon ńgwɔ́ púʼu; 16E Ssé gÿo shúm selÿò sépʉ́a sie é náa kyɛ̀ʼ, wɔɔn gwɔ́ nèm gẅie áa mmó kyɛ̀ʼ yelÿò, á lɔg ńkyɛʼɛ fʉ̀ʼʉ zsǒ, wɔɔn gwɔ́ saŋ gẅie áa mmó kyɛ̀ʼ yekʉ́, á lɔg ńkyɛʼɛ fʉ̀ʼʉ letswɛ́ʼ. Ńgÿo púʼu ńgíŋe ńgÿo mecÿɔ́ʼsaŋ. 17E Ssé gÿo púʼu, ńtÿɔ́g sɔɔn shúm lefaŋ lélɔg ńkyɛʼ ndùmo ssé tsetsáʼ, 18lélɔg ńkyɛʼɛ fʉ̀ʼʉ zsǒ pɔ́ fʉ̀ʼʉ letsẅɛʼ, mbɔɔ lélɔg faga kyɛ̀ʼ na nzěm. E Ssé gyá ngie áa mbòŋ. 19Nzěm piŋ síŋ, njÿó gÿo ńdʉ́a, wɔɔn lɔgɔ ńgwɔ́ mbɔ́ɔntè lyɛ̌ʼ lekùɔ.
20E Ssé gɔɔn ngie: «N kwǒŋ ngie mentse gẅiin menɔ̀ɔn tà e gyɔ́ɔn, é pie é gẅiin zẅìge, ḿbyé kɔ́ɔn; meshʉ̌ŋ piŋ ḿbú ńziete tÿǒ tÿǒ.» 21E Ssé gÿo memǎa messó ntí ntí tà é gyɔ́ɔn, tà mbɔɔ menɔ̀ɔn ntsèm pie é gẅiin zẅìge, ḿbyé kɔ́ɔn. Ḿbiŋ ńgíŋe ńgÿo meshʉ̌ŋ ntí ntí. E Ssé gyá ngie áa mbòŋ. 22Á gÿo púʼu ńgwaa cÿɔʼɔ wɔ́b, ńne ńgɔɔn ngie: «Pi zyé mboŋó, ngẅɛ̀ gi zyéen, ńjÿó mentse máŋʉ́, meshʉ̌ŋ shʉ́a yɔb ngẅɛ̀ ndùmo ssé tsetsáʼ.» 23Ńgÿo púʼu, nzěm piŋ síŋ, njÿó gÿo ńdʉ́a, wɔɔn lɔgɔ ńgwɔ́ mbɔ́ɔntè lyɛ̌ʼ sétʉ̂a.
24E Ssé gɔɔn ngie: «N kwǒŋ ngie shúm mentí mentí sie é gẅiin zẅìge pú ńgwɔ́ ndùmo ssé tsetsáʼ; é menɔ̀ɔn mentí mentí pie ée mekúe menɔ̀ɔn, é megígyé menɔ̀ɔn, tà mbɔɔ pie é tsẅé pɔ́ mbàʼ. Ńgɔɔn, á gwóon ńgwɔ́ púʼu.» 25E Ssé gÿo menɔ̀ɔn gwɔ́ ndùmo ssé tsetsáʼ mentí mentí púʼu, epie é tsẅé pɔ́ mbàʼ gwɔ́ mǒ, epie ée mekúe menɔ̀ɔn gwɔ́ mǒ, tá ḿbiŋ ńgÿo megígyé menɔ̀ɔn mentí mentí. E Ssé gyá ngie áa mbòŋ. 26E Ssé gwaa cʉ́me ńgɔɔn ngie: «Pege pwóon nyìŋ mesoŋ á gwɔ́ páʼ pege, à kwaʼ sẅé wégè, à ge pú gẅiin nò na messó mie ée tsɛ̀ɛ ntse máŋʉ́, é pú gẅiin nò na meshʉ̌ŋ mie ée tÿǒ mbɔɔ mie ée ssé, é pú gẅiin nò na mekúe menɔ̀ɔn, é pú gẅiin nò na menɔ̀ɔn mbàʼ, tà mbɔɔ megígyé menɔ̀ɔn pie é gwá ńkʉ́ʼʉ ndùmo ssé tsetsáʼ!»
27E Ssé pwóon pʉ̀a mesoŋ é gwɔ́ páʼ yé,
Ḿbwóon wɔ́b, pɔ́ kwaʼ sẅé yé Ssé,
Ḿbwóon wɔ́b púʼu, á gwɔ́ mámbàŋa pɔ́ manzwě.
28Ńgÿo púʼu, ńgwaa cÿɔʼɔ wɔ́b ńne ńgɔɔn, ngie: «Pi zyé mboŋó, ngẅɛ̀ gi zyéen, ḿbú ńjÿó ndùmo ssé tsetsáʼ, pi gẅiin nò na tsetsáʼ, ḿbú ńgẅiin nò na messó, ḿbú ńgẅiin nò na meshʉ̌ŋ, ńgẅiin nò na menɔ̀ɔn pie é gwá ńkʉ́ʼʉ ndùmo ssé tsetsáʼ.» 29E Ssé pɔ́ɔnte ńgɔɔn ngie: «Mèŋ, n gʉ̌a ndùmo ssé tsetsáʼ ntsèm, ḿbú ńná megǐ mie é zéme memvòm, lâ metÿǒ mie é zéme mentɔ̌ɔn mie é gẅiin mesɔ̀ɔn kà membaŋ wɔ́ɔ né pi. Memvòm kà mentɔ̌ɔn mɔ́b wɔ́ɔ, e gwɔ́ shúm léjÿó mbwó pi. 30Ńgʉa na menɔ̀ɔn ntsèm ndùmo ssé tsetsáʼ, pâ meshʉ̌ŋ ntsèm, tà mbɔɔ kɔ̀ɔkɔ́ɔ gie á gwá ńkʉ́ʼʉ ndùmo ssé tsetsáʼ, tà ńgẅiin zẅìge, esɔ́b shúm léjÿó sie n nǎ, ée megǐ.» Ńgɔɔn, á gwóon ńgwɔ́ púʼu. 31E Ssé gyá ngie kɔ̀ɔkɔ́ɔ gie à gÿǒ wɔ́ɔ, áa mbòŋ. Nzěm piŋ síŋ, njÿó gÿo ńdʉ́a, wɔɔn lɔgɔ ńgwɔ́ mbɔ́ɔntè lyɛ̌ʼ ntɔgɔ́.
Právě zvoleno:
Nzyeté 1: nnh
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2026, CABTAL