Kênh Kaar 20
20
Phao-lô tu Ma-sê-đô-ni-a u Hi-lap
1Tơt baak pơrsup ja rngơt, Phao-lô siêr bơl jơrnơ lôh jah trôih trôl bu, ja nei chah lơơi baah han Ma-sê-đô-ni-a. 2Bu han rlach jôm pal kwaal nei, nhôq ơk baak trôih trôl bơl jơrnơ, ja nei han tơt Hi-lap 3u gôq a kươi nei pei khay. Tơt êch dơơh jưr u duuk han Si-ri, Phao-lô dol bnih Jo-thai mon jmlôm lơh ap, mơ bu rwach han rloot blet Ma-sê-đô-ni-a baah plơq siq. 4Han pôl n'hai bu geh Sô-ba-tê, koon Pi-ru, poh a Bê-rê; A-ri-tak u Sê-kun-đu poh a Tê-sa-lô-ni-ka; Gai-ut poh a Đet-bơ; Ti-chi-kơ u Trô-phim poh a A-si-a u Ti-mô-thê. 5Bơl bnih au han noor u kơp bơl hei tu Trô-ach. 6Nha bơl hei, di kươi jơl ryơơng Nom 'Bưn Kenh nei jưr u duuk lơơi poh Phi-lip; pram nar kươi, bơl hei a mơp bu a Trô-ach, ja nei gôq a kươi nei poh nar.
Phao-lô tu poh Trô-ach.
7Nar muôi knông rthôl, bơl hei pơrgum kươi jah pak nom. Phao-lô chhuôr nti aan bơl jơrnơ; đươm phrui han troong nar m'ơơn mơ bu khang chhuôr broih aan tơt nggơl mang. 8Geh ơk đeng knông lwing prêh ktôk bơl hei plah pơrgum kươi. 9Di mbu dơlu chhak Ơ-tich plah gôq lơ lpôông puôich bêch rôi jơl knông Phao-lô chhuôr nhjoong đat. Đươm bêch lêêk ir, bu nei a lơ ndring ttal pei a mrah u teh; tơt bnih nday kơldơk bi kah nei sau bi u chhưt. 10Dôh Phao-lô jưr u teh, kêt chhak lơ bi, ut pơih bi u mor: “Khơơm rhơq rpơq, bu nei nha ơơm rêh!” 11Phao-lô plơq hao ndring pak nom u sa; bu mor chhuôr jook đat aan tơt aang mơ han troong. 12Bnih nday jưn dơlu nei siq nhi; bi nha ơơm rêh mơ jôm bnih kot kươt nđum nđiêng ơk.
Phao-lô tu Mi-lê.
13Bơl hei han noor, jưr duuk han A-sôt, laa ktôk bơl hei a kươi wơơt Phao-lô; đươm bu êch han troong teh mơ êch daap bei au. 14A mơp pôl tu A-sôt, bơl hei wơơt bu jưr u duuk u ta pôl han tơt Mi-ti-len. 15Hơơi a ktôk nei, bơl hei han troong rmưt rlai u nar a ôi nei lôh rlum gguônh Chi-ô. Rlach nar nday, bơl hei yeh mưt Sa-môt u han di nar nha nei tơt Mi-lê. 16Đươm Phao-lô ja rwach dơơn han rloot Ê-phê-sô, đươm 'bưn srung lơơi jah 'bưn saap jơl bêl tu A-si-a. Bu han dil daal jah mơq awap nei geh mat a Jê-ru-sa-lem lap nar ryơơng Pram Rthôl.
Phao-lô chhuôr aan bơl raanh ttơơm a Ê-phê-sô.
17Khal au, a Mi-lê, Phao-lô maanh bnih lôh Ê-phê-sô siêr bơl raanh ttơơm knông Phung Jrah lôh. 18Tơt bu lôh, bu mor n'hai bu: “Oh bi kot gưt, a nar ptơơm dơih jơng lôh A-si-a, hei ja gôq rêh n'hai oh bi lah 'bei êch yoot. 19Hei jraih kaar Brah di ndroong krich chhak, n'hai ơk daak mat, u phrui dol ơk tuul loong đươm bnih Jo-thai mon jmlôm lơh ap hei. 20Hei chhuôr jôm ntil thlay aan oh bi, 'bưn prap kươi ntil ơơn, u kne oh bi ktôk puich phung, rnđơơih a nhi au tơt nhi tôw; 21hei pơrjat ơk bnih Jo-thai dang bnih nggoor agaih#20:21 ơk bnih Jo-thai dang bnih nggoor agaihPaich laa ơk bnih Jo-thai dang bnih Hi-lap. teq u baak teq lơi dôih nha u Brah Ưn u chưt jơrnơ ktôk Brah Jê-sus, Brah bơl bơn. 22Tôw, au hei kươt Brah Wêêng trôih trôl han tơt Jê-ru-sa-lem, 'bưn gưt ntil ơơn a kươi lôh tơt aan hei a nei; 23dơơn Brah Wêêng ja mbơh noor aan hei laah knông jôm poh, kơt kkôn u r'baak plah cham hei. 24Dôh hei 'bưn kơơp baak rêh nơơm laa thlay, chleeng lơh sơp baak ta prang u kaar hei ja dơơp pơih ktôk Brah laa Brah Jê-sus, jah tơmbơh Baak Sroong Klanh teq u brêêng smlaang Brah Ưn.#II Ti 4:7.
25Bei au, hei gưt laah knông leq sêch oh bi baah hei ja chhuôr teq u nggoor Brah Ưn, 'bưn mbu 'bơơn a kươi sau mat hei hôm. 26Đươm nei, nar au hei mơq kươi di mat oh bi laah hei 'bưn dôih teq u mhaam leq sêch oh bi ri. 27Đươm hei ja tơmbơh leq sêch ndroong#20:27 Asn: rnđêch. Brah Ưn ri aan oh bi, 'bưn prap kươi ntil ơơn. 28Oh bi phrui prap chhak nơơm u leq phung bưr broih pa Brah Wêêng ja ldơk oh bi lơh bnih mơq pơn ei, jah tiêp gwaal Phung Jrah Brah Ưn#20:28 Phung Jrah Brah Ưn ri: Knông m'baak plơơp 'bian ti laa Phung Jrah Brah ri. ri baah Pang ja pook dơng mhaam nơơm.#20:28 pook dơng mhaam nơơm: Knông m'baak plơơp 'bian ti laa pook dơng mhaam đươm [Koon] nơơm. 29Hei gưt laah di kươi hei sot han, a kươi geh sôw bri kraanh đơơk lap rmơh mưt knông oh bi, 'bưn khwaich phung bưr laang. 30Kơndaal a klung oh bi a kươi kot kn'hao bơl bnih chhuôr pal ntil tih jah ha triênh bơl jơrnơ tênh bu. 31Bei nei, phrui kah rngeh, gênh kươi laah knông rluôt pei snam, rluôt mang u nar, hei 'bưn rlu hoor daak mat baah buôi kne jôm bnih. 32Bei au, hei jưn ndơơp oh bi aan Brah Ưn u aan baak Brah brêêng smlaang Pang ri, laa baak Brah awap sun moon u ươn griêng mlơ aan oh bi pôl n'hai leq sêch bơl bnih kươt klanh jrah. 33Hei 'bưn sơ ôp kaih maih, paich laa khôw ao 'bơơn ri leq. 34Nơơm oh bi gưt baar paang ti au ja rn'aan pal ntil rn'êch hei ri u bơl gnasaal kaar pôl hei ri. 35Hei ja tti kne aan oh bi knông jôm kaar laah bơl bơn phrui sôt sang lơh kaar bei au jah jraih bơl bnih tanh ji, u gênh kươi baak nơơm Brah laa Brah Jê-sus ja lah: ‘Ươn geh smlaang huôih dơơp pơih.’”
36Mor pal baak nei luôih, Phao-lô kơltut u teh u r'bon dan teq u leq sêch oh bi. 37Jôm bnih kot nhim ngliêng u ut pơih kôw Phao-lô baah phêp. 38Bu chhong rmlơng đat laa tơt ttang bu mor laah bu a kươi 'bưn nha sau mat bu nha. Ja nei bu jưn pang jưr u sbau.
Právě zvoleno:
Kênh Kaar 20: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.