Maruko 13
13
putralri marengay kana uwatrerev na vangesar ruma'
(Matay 24.1-2; Luka 21.5-6)
1a mupatraran kemay kana vangesar ruma' i Yēsu mu, tu temakesi a sasa marengay kantaw: <<sinsi, na'uwi i inu, kemuda kana ma'izang ini na varasa', kemudakuda kana marukezang na pinarahanan!>>
2marengay i Yēsu: <<mena'una'u u kananni na marukezang na pinarahanan ziyamaw? i kani na saya saya na varasa' aivasaw putani peniya, iniyan za sasaya za varasa' wavilin kana zuma na saya na varasa' i itras.>>
na kakaudan zi na pakakuwatreng
(Matay 24.3-4; Luka 21.7-19)
3i Yēsu kazu i Olēv zenan, tremepa kana vangesar ruma' kemayan. i Pētēro, Yakob, Yohanē, zi i Antēlē mulrek zuwa kiyumalr kantaw: 4<<'alrazi rengayaw mi, uwapana nu aidan nanni na lremak? ini peniya nu mupana mu ulra a eman pakalralrazaman pungaway ziyamaw?>>
5marengay i Yēsu kanazu: <<taranapaw i inmu, amanan ki'uli'ulid za trau. 6ulra kazuwan a trau venavetra' mingadan kananku ngadan zi zuwa, marengay: <maw ku i Kiristo>, kemazu zi 'emuli'ulid lra kazuwan za trau. 7amanan na mawili i dalrep kana lrengaw na matatengez zi i dawilr na matengangetengez na lremak mare'alav. 'azika'azi mupana nanni na lremak; mawmu amelri marengay za meredek lra zantu uwaludusan na pinakalrangan i punapunan. 8na saya 'alrayan nu kimatatengez kana zuma a saya na 'alrayan; na saya na kanatal nu tatengez kana zuma na saya na kanatal; ulra i iyan ziya a ngunin zi a savelawan. nanni na lremak tu uwapana mu kamawan kana miaalrak na vavayan tu nanayan za kemiyarakaz.>>
9<<taranapaw i inmu, 'alrana 'a'evang kanmu na trau, tuluzanay kana hoing; kiyalrepit mu i waazukan ruma'. muramawan kananku nirekudayan, uri katikezir mu kana menana'u demadikes zi na yawan i ngawayan, wasay kana fukuing. 10mawmu na fukuing 'azika'azi piyanguwayan palenak kana trau ziyan. 11a 'emevang kanmu nazu, urungaw mu mukuwa i hoing mu, amanan na iyanguwayan mavangavang za rarengay za eman, palru nu azu, na Viruwa i itras papuanger za eman, zi marengaya za eman i inmu; 'alranu nanmu nirengay amelri nanmu ngay i inmu, a mawna Vangesar Lu'em pakalrang kanmu zi marengay. 12nu azu mu, na trau naniwan kanantu wadiyan, piyanatray kanazu, na temama kuwaani kanantu lralrak; na lralrak kemazu kima'etrev kana ma'izangan, piyanatray kanazu. 13muramawan kananku nirekudayan, kaawiles kanmu mapapiya. mawmu na kerevat semaseker patari puludus na trau mu 'azika'azi muvaaw.>>
ma'izang na kakaudan
(Matay 24.15-28; Luka 21.20-24)
14<<nana'u mu kanizu na <palralremes zi kaawilewiles na eman> kazu matikezir kana amelri kanantu katiyakeziran (na maip na trau mu 'azika'azi malrazam kanantu pauwayan kanini na ngay). a azu mu, na kaazu i Yodaya, penusara piyazenan muliki za kuwatrengan; 15na kazu i sa'uv mu, amanan na mulusu, zi amanan musavak i ruma' melaka za eman ziya; 16na kazu i 'uma'uma mu, kemazu iuwaruma' melak za pakatras za kavang. 17kanazu na wari, na malii na vavayan zi na pasusu kana vu'enin na tainayan mu kaulep lra! 18tarekiyanun i inmu kana Viruwa i itras za ka'aziyan mupana nanni na lremak nu vetriliyan. 19'alrana nazu na wari na kakuwatrengan mu maw na kemay kana pinarevuwa'an i punapunan na Viruwa i itras mu iniyan ziya za kemani, nu aziyu lra kemazu 'azi lra aasalr kazu. 20nu 'azi tu kalriketrii ni Luzu nazu na kakuwatrengan na wari mu, iniyan za trau za kararuwa vaaw. mawmu, muramawan kanantu pinalimi' na zinekalranan, piya lra kemalriketri kanazu na wari i intaw.>>
21<<nu ulra a trau marengay kanmu: <na'uwi, ulra i kani i Kiristo! ulra i kaziyu i Kiristo!> amanan kiputatena' kantaw. 22'alrana mavetra' na Kiristo zi na mavetra' na patralritralri uri uwapana; puwapana za karepalripalri kirekamelri na lremak nazu, kemipiya za kinaruwayan zuwa venavetra'a kanantu pinalimi' na zinekalranan kana Viruwa i itras. 23taranapaw i inmu! piya ku lra pungaway marengay kanmu kanini na lremak peniya.>>
tu raredek na Alrak na trau
(Matay 24.29-31; Luka 21.25-28)
24<<a melavat lra nazu na kakuwatrengan na wari mu, uwavalis na kadaw ka'uwaze'uzem, 'azi lra sasenan na vulan, 25na vitu'en uri uwatrerah kemay lingatr, na nirekudayan i rukup mu uhiyalrehilr. 26nu azu mu, uwapana na Alrak na trau, matemuy za ma'izang na kezang zi lihu muitras kana kutrem mulusu zuwa. 27pakarun kana tēnsi mukuwa makaiyaiyan i intaw, kemay kana punapunan i kani palru kana punapunan i kaziyu, puwazuk kanantu pinalimi' na zinekalranan.>>
tu ipanadam na tepur na kawi
(Matay 24.32-35; Luka 21.29-33)
28<<kipanadam kemay kana tepur na kawi i inmu. na sa'az nu mupana mangidi mera'at na dilrang, temelriyu na ulane' na vira' mu, zi kalrazam mu za raredek lra na derun. 29mararesan, nu mena'u mu kanini na nirekudayan peniya mu kalrazam mu raredek lra na wari,#13.29 <<meraredek lra na wari>> karuwa marengay za <<i intaw uri raredek lra>>. ulra lra i sulrasulray. 30piangeru i inmu, na trau kana ziday harem nu 'azi ziyan minatray pakangawayan mu, ini na lremak peniya uri uwapana lra. 31uwalremes na lingatr na dare', mawmu nanku ngay 'azi uwalremes munayun.>>
izu na wari iniyan za trau kalrazam
(Matay 24.36-44)
32<<kema ta kanizu na uri zazuwa na wari zi na tuki, iniyan za trau za kalrazam; na tēnsi i itras 'azi malrazam, zi na Alrak mu 'azi malrazam, mawmau i Ama na malrazam. 33taranapaw i inmu, kasenekin, 'alrana 'azi mu malrazam za raredek nu aidan izu na tuki. 34kamawan kana trau mupatraran muzangi, na kiyakarunan i ruma' tu tuluzanay padikes pana'u kanantu pakakarunan, putrepayay za kiyakarunan kurisaesa, zi patalru ziya kana mailran i ruma' temaranapaw kana sulrasulray. 35semeneng, kasenekin i inmu, 'alrana 'azi mu malrazam za uwaruma' nu aidan na miyaruma', aulra uwaruma' nu 'araremeng, aulra nu parekazuwa 'esungan, aulra nu 'iyadenan, aulra nu mupana na kadaw lra. 36nu maherareher muruma' i intaw mu, 'aziya mena'u kanmu za alralrupe'an ziyan. 37nanku nirengay kanmu na ngay kemazu maw marengay kana mapapiya: kasenekin i inmu.>>
Právě zvoleno:
Maruko 13: TPN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in Taiwan, 2023
