Luka 2
2
pinialrak i Yēsu
(Matay 1.18-25)
1a azu, i Aukustus na Hongti i Roma pupana za seratr, i Roma na kanatal na zinekalranan puwavalray kana kokomēvo. 2ini na palrivak puvavalray kana kokomēvo mu i Kuriniyus kazu i Siliya mutu sotok a azu. 3muraruma' mapapiya i kazekalran mukuwa puvalraya.
4i Yosēf kemazu kemay i Galili kana kazekalran i Nazalē mukuwa i Yodaya, meredek kana kazekalran ni Davidē, i Bētlēhēm kinuwa; 'alrana i Yosēf muravak kana 'atayan ni Davidē, 5i intaw zi na pulrakarawan kantaw, na malii lra i Maliya salrangan mukuwa puvalraya. 6a kazu i Bētlēhēm nazu mu, meredek lra nantu piyalrakan na wari. 7mialrak za ruwa'enay a ma'inayan, liputraw za inuwan, ireta' kana paekanan na eva, 'alrana liyokang iniyan lra za kaazuwan.
na purarikan za takulris zi na tēnsi
8kazu i Bētlēhēm i panayan, ulra papida na purarikan kana takulris iyulray i tralutralun nu 'aremeng, marevulavulas milran kana takulris. 9na tēnsi ni Luzu pakurena'u kanazu; senan na lihu ni Luzu pasenan kanazu paliyuliyus, zi salaw makakaud nazu. 10mawmu marengay na tēnsi kanazu: <<ikakaud! ulra ku 'inava a lremak pakalralrazam kanmu; ini na lremak aurung veray kana tratrautrau ziya za salaw ma'izang a semangalan. 11harem kana wari, kazu kana kazekalran ni Davidē, nanmu venavaaw -- i Luzu Kiristo pinialrak lra! 12nana'u mu za sasa a vu'enin, iliputr za inuwan, i'ezeng kana paekanan na eva; izu mu mawna vaveray kanmu na kalrazaman.>>
13maherareher za, ulra salepun a hitay i itras zi izu na tēnsi mukasa mupana, semenay pulihu kana Viruwa i itras marengay:
14kiyalriman na lihu kaya kana maraitraitras na Viruwa i itras!
kiyalriman kana mareka'inavanava veraya kanantu kinalraman na trau i dare'!
15a kiruwaday na tēnsi kanazu maveliyas i itras mu, mazayazayar na purarikan kana takulris marengay: <<kaya ta kana kazekalran i Bētlēhēm, mena'uwa ta tu nirengay kanta ni Luzu izu na mupana lra na lremak.>>
16kemazu zi mahelralrehelr mukuwa nazu, atrevung lra kani Maliya, i Yosēf, zi na i'ezeng i paekanan kana eva na vu'enin. 17a mena'u lra na purarikan mu, tu nirengay na tēnsi na kireeman kana vu'unin na lremak mu marengay kana mapapiya. 18na kinger na trau kanantu ngay na purarikan mu salaw maherareher mapiya. 19mawmu i Maliya tu piangeraw ini na lremak peniya, masamasalr kemiangeanger. 20muveruk na purarikan, muramawan kanantu kiningeran nina'uwan na lremak semenay pulihu kana Viruwa i itras, 'alrana tu inupanayan na lremak zi tu nirengay na tēnsi kanazu mu marepauwa.
pungadan kani Yēsu
21a waluwa wariyan lra, na vu'enin kana kakuwayanan za kikeret na wari meredek lra, zi pungadanay kani Yēsu i intaw; ini na ngadan maw ipungadan kantaw na tēnsi a 'azi ziyan mudaway i tiyalr.
sasunan veray kani Luzu
22paturus kanantu kinuretan na kuret ni Mosē, nu penauwa lra na mukirungetr na wari mu, i Yosēf zi i Maliya murung kana alrak mukuwa i Yērusalem, sasunanay veray kani Luzu i intaw. 23ini mu initurus kanantu vinavalrayan na kuret ni Luzu: <<na ruwa'enay na alrak na ma'inayan mu sasunanen kani Luzu mapiya.>> 24kemazu iyaturus nazu kanantu kuret ni Luzu, semunan za mara'etrev kana pikipikiyu zi za zuwaya makiteng na tutur temara patavang.
25a azu, i Yērusalem ulra sasa a trau, mingadan kani Simēon. i intaw maw kemaira kemakaud kana Viruwa i itras a penatezelr na trau, kemazu kiyalriman za kivaaw na Iseraēl. kurekasa na Vangesar Lu'em kantaw; 26kipakalrazam kana Vangesar Lu'em i intaw, malrazam i intaw kantaw za uwaveruk i punapunan a pakangawayan mu nana'u kana iyatuvang ni Luzu i Kiristo. 27maw nantu ipuanger na Vangesar Lu'em, zuwa kana vangesar ruma' i intaw. a azu mu, tu ma'izangan ni Yēsu mava kana alrak kani Yēsu musavak, miyaturus kemakuda kana kuret na lremak. 28tu avayaw na alrak i Simēon, semenay pulihu kana Viruwa i itras marengay:
29Luzu a, nu la'esiyaw lra nannu iyatuvang;
harem mu karuwaw lra ping-an muveruk nannu pakarunan.
30mena'u ku lra kanannu ivavaaw,
31mawna nannu ipadang kana tratrautrau ziyan:
32utu puwaanger pakalrazam kana sizumayan na senan,
mutu lihu kanannu zinekalranan na Iseraēl.
33tu ma'izangan na alrak salaw maherareher kanantu nirengay ni Simēon na kireeman kana alrak na lremak. 34'emaperez kanazu i Simēon, pawnung marengay kani tainataw na alrak i Maliya: <<ini na alrak kipalimi' kana Viruwa i itras, maw na patrepu kana kazuwan na trau i Iseraēl, uwavaaw a kazuwan na trau. i intaw mutu tratrepa kisiri kikuwatreng kana kazuwan na trau. 35zi kemani pakurena'u lra kananni na trau tu nirangeran. nana i anger kamawan kana idangan na ilrus temusuk patavelas kanannu anger.>>
36ulra a sasa vavayan a patralritralri, mingadan kani Anna, maw na sepi' 'atayan ni Asēr a alrak na vavayan ni Panuēl. dawadawan lra i intaw, mipi'azinan lra, mukasa kanantu 'azin za pituwa 'ami lra. 37i likuzan lra kazu saverasan, harem mu makawalun zi pata 'ami lra#2.37 <<i likuzan lra kazu saverasan, harem mu makawalun zi pata 'ami lra>> karuwa marengay za <<kazu lra kasasayan za makawalun zi pata 'ami>>., i intaw 'azi ziyan muwaday kana vangesar ruma', semungal kana Viruwa i itras kana wariwari, 'emiway, kiyanun. 38penauwa a azu, kemazu zuwa lra i intaw, semenay pulihu kana Viruwa i itras, pawnung venavati kanantu lremak kanini na alrak kana trau na kiyalriman kana Viruwa i itras za zuwa venaawa kana Yērusalem na trau.
mareveliyas i Nazalē
39i Yosēf zi i Maliya paturus kana kuret ni Luzu kemakuda lra kana lremak peniya, zi muruma' i Galili, mukuwa kanantu kazekalran i Nazalē. 40marekama'a'izang lra na alrak, dalikedik marukezang zi misayhuwan; kazuway kanantu lramanan na Viruwa i itras.
a lralrakan i Yēsu kazu kana vangesar ruma'
41na ma'izangan ni Yēsu kana 'ami'ami mukuwa i Yērusalem kurelranga kana palalavat na wariyan. 42a muketrep zi zuwaya 'ami i Yēsu mu, nazu kemazu kurelrang kana pauwayan na semasaharan na wariyan. 43a puludus lra kana semasaharan na wariyan, zi masikasik muveruk nazu, mawmu na lralrak i Yēsu muvilin i Yērusalem; tu ma'izangan 'azi malrazam kanini na lremak, 44kaulra kurekasa kemakawang kana trau i savakan kema, makawang lra za saya wari mu puteha lra maaya' kantaw i savakan kana wadiyan. 45'azi pakaatrevung kantaw nazu, zi mareveliyas mukuwa i Yērusalem miya'a. 46katelu wariyan lra, tu atrevungay lra i savak kana vangesar ruma' i intaw. penauwa kazu kemayan i intaw kana sinsi na Yodaya i paduk, kiyangekinger zi kiyaumalr i sanin; 47na kinger ziya kantaw na trau mu mare'alav kanantu sayhuwan zi kanantu iyatuvang. 48a mena'u nantu ma'izangan kantaw mu, pakumelri i anger. kema marengay i tainataw kantaw: <<Alrak a, kemuda zi kemani u kaniyam? salaw mavangavang i temama zi inku, makaiyaiyan miya' kannu a!>>
49temuvang i Yēsu: <<kemuda zi maaya' mu kaninku? kamelriya lra 'azi mu malrazam za 'azi ku ka'azi kazu kana ruma' ni Amalri#2.49 <<kazu ku kana ruma' ni Amalri>> karuwa marengay za <<maluvis ku kanatu lremak ni Amalri>>. ziyamaw?>> 50mawmu 'azi malrazam nazu tu pauwayan kanini na ngay.
51kemazu zi, i Yēsu mukasa kanazu muveruk mukuwa i Nazalē, miturus peniya kanazu. i tainataw tu piangeraw ini na lremak peniya. 52tu zazek zi na sayhuwan ni Yēsu mukasa marekamuitras, pasalaw kikasahar kana Viruwa i itras zi na trau.
Právě zvoleno:
Luka 2: TPN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in Taiwan, 2023
