Yohanē 5
5
paka'inava za kuwalengan i Bētsayta danaw ngaydiran
1i likuzan lra kanini na lremak, penauwa za tu semasaharan na wariyan i Yodaya na trau, i Yēsu mukuwa i Yērusalem. 2kazu i Yērusalem, adalrep kana Siri sulray ulra saya a danaw, tu ngay kana Hēburu i Bētsayta kema, ngaydiran kana danaw ulra a lruwatra salripi.#5.2 <<adalrep kana Siri sulray ulra saya danaw ... kana danaw ulra a lruwatra salripi>> karuwa marengay za <<adalrep kana Siri danaw ulra a zekalr, ... kantrini na zekalr ulra lruwatra salripi>>. 3mulalepun na kuwaalengan mi'ezeng kana salripi, i savakan ulra na mavutri', na matripu', na mutuwalre'ap.#5.3 ulra pidaya awatranan lulun puwayay <<nazu mengangara kana danaw mutriyur maruwahu; 'alrana nazu pakutatena' nu kapida ziya mu, tu pakarunan ni Luzu mulrusu tremiyur kana danaw, nu maruwahu na zanum mu, na i nguwangwayan mulrusu kana danaw na kuwaleng na trau, arusay mikuwalrengan za eman ziya, maruwa kiputremelr paka'inava mapiya.>> 5i kazu ulra a sasa kuwaleng lra za makatelun zi waluwa 'ami na trau. 6mena'u i Yēsu kantaw za mi'ezeng, malrazam za kuwaleng lra za pida 'ami i intaw, zi kiyumalr kantaw: <<maranger u 'inava?>>
7temuvang izu na mikuwalengan: <<sinsi, nu mahuwahu na zanum mu iniyan za trau puwalrang kaninku, meretra' kaninku i savakan kana danaw, a muwasavak ku mu, ulra lra a trau iyanguwayan kimasalaw mulusu lra.>>
8marengay i Yēsu kantaw: <<karahan, elaku nannu lre'ap kakawang uveruk lra!>> 9izu na trau payas 'inava lra, melak kanantu lre'ap zi muveruk lra.
izu na wari penauwa maw a katalaulepan na wari. 10mawna kemani na yawan i Yodaya na trau marengay kanizu na pinaka'inava lra na trau: <<a katalaulepan na wari harem, melak u kana lre'ap mu 'azi penauwa kana kuret.>>
11marengay i intaw: <<izu na paka'inava kaninku na trau patalru kaninku: <elaku nu lre'ap uveruk lra!> >>
12kiyumalr nazu: <<i eman izu na patalru kannu melak kana lre'ap uveruk kema?>>
13mawmu izu na pinaka'inava lra na trau mu 'azi malrazam za i eman; 'alrana kazuwan na trau i kazu, pawnung muwaliki muveruk lra i Yēsu.
14i likuzan lra, i Yēsu atrevung kantaw i vangesar ruma', marengay kantaw: <<'inava u lra patulre'ay, amanan masasalr pamelri lra, munu muelep kana marama'izang na kuwatrengan.>>
15a muveruk izu na trau, mukuwa marengaya kanantu yawan na Yodaya na trau, marengay za maw i Yēsu na paka'inava kantaw. 16kemay kanini, mureha za pakakuwatreng kani Yēsu nazu, 'alrana kazu kana katalaulepan na wari paka'inava kana kuwalengan i intaw. 17marengay i Yēsu kanazu: <<patrutru kikarun i Amalri, kuwaazu ku kikarun.>>
18ini na ngay puwapuwa tu anger na yawan i Yodaya na trau za maranger pinatray kantaw, 'alrana i intaw 'azi mawmau kemuwatreng za kuret kana katalaulepan na wari, pawnung marengay kana Viruwa i itras mu maw i Temamataw, tu pakiresanaw i intaw kana Viruwa i itras.
trepa pinikezang na Alrak
19pakalusu mu, marengay i Yēsu kanazu: <<penazangala ku marengay kanmu, na Alrak pakalrang kantaw 'azi kararuwa kemakuda za eman; mena'u kani Temamataw za kemakuda za eman mu, zi kemakuda i intaw. tu kinakuda ni Temamataw, na Alrak miturus kemazu kemakuda. 20na Temama lraman za Alrak, tu kinakuda i intaw pakalrazam kana Alrak; i intaw pakalrazam ziya kana Alrak za marama'izang kanini na lremak, paherareher kanmu. 21na Temama kemuda parevaaw kana minatray lra na trau, veray za uwavaawan kanazu; mararesan, na Alrak kuwaazu pakurelrang kanantu nirangeran veray za uwavaawan kana trau. 22na Temama i intaw 'azi sayvang kani emaeman; na kakezang sayvang tu verayanay peniya kana Alrak, 23na trau ziyan maruwaya kemaira semungal kana Alrak kamawan za kemaira semungal kana Temama. izu na 'azi kemaira semungal kana Alrak mu, mawna 'azi kemaira semungal kana pazuwa kantaw na Temama.
24<<penazangala ku marengay kanmu, izu na kinger kananku ngay, zi pakutatena' ziya kana pazuwa kaninku kanizu na sasa, zi ulra uwavaawan munayun. 'aziya kikuret za pinamelriyan i intaw, maw na mupana lra kemay kana minatray mukuwa lra za uwavaawan. 25penazangala ku marengay kanmu, meraredek lra na wari, maw lra harem, na minatray na trau kiyaanger kanantu lrengaw na Alrak kana Viruwa i itras. izu na kinger mu uwavaaw mapiya. 26penauwa kamawan kana Temama maw rakaz za uwavaawan, i intaw putu rakaz za uwavaawan kana Alrak. 27veray ziya kana Alrak za kakezang sayvang i intaw, 'alrana i intaw maw Alrak na trau. 28amanan za male'alav kanini na lremak, 'alrana meraredek lra na wari, na kazu ziyan i savakan kana trevelran na trau mu kiyaanger mapiya kanantu lrengaw, 29pawnung uwapana kemay i trevelran: na 'inava tu paelrangan, marevaaw melak za uwavaawan; na kemuwatreng, marevaaw kikuret za pinamelriyan.>>
uwasay kani Yēsu
30<<pakalrang kaninku mu 'azi maruwa kemakuda; paturus ku kanantu nirangeran na Viruwa i itras sayvang, pawnung nanku sayvang maw paresaresan penatezelr; 'alrana 'azi ku maaya' kananku niranger i inku, mawmau miturus kanantu nirangeran kanizu na pazuwa kaninku.
31<<nu uwasay ku kaninku mu, nanku uwasay 'azi maruwa pakutatena'. 32mawmu, ulra a sasa uwasay kaninku, malrazam ku tu i uwasay kaninku mu maw tatena'. 33pakarun mu lra za trau mukuwa kirepana'uwa kani Yohanē, kinger kantaw za uwasay kana tatena' na vati. 34tematena' mu, amanan ku za trau uwasay kaninku; marengay ku kanini na ngay mu maw na karuwayan muvaaw i inmu. 35i Yohanē kamawan kana saya a pinasenan na lrawlraw, muwai mu pa'inava za dika kanantu senan. 36mawmu karuwa ku pupana za maramikezang kana uwasay ni Yohanē, izu maw nanku kiyakarunan, maw tu pinakarun ni Amalri kaninku papula'esi. nanni na kiyakarunan maruwa uwasay za maw i Amalri na pazuwa kaninku lra. 37na pazuwa kaninku i Amalri mu kemazu uwasay kaninku. 'azi mu ziya kinger kanantu lrengaw, 'azi ziya mena'u kanantu mudingan, 38'azi puwaanger kanantu ngay, 'alrana 'azi mu pakutatena' kanantu ipazuwa izu na sasa. 39rangangeru na Sēsiyo i inmu, kaatrevung za uwavaawan munayun i savakan kema mu; tatena' mu na ngay i Sēsiyo mawna uwasay kaninku! 40mawmu, 'azi mu muwai zuwa kaninku i kani kiyami za uwavaawan.
41<<'azi ku kiyalriman kanantu iyaveray na lihu za trau. 42mawmu patulre'ay ku lra mena'u kanmu, iniyan mu za anger sahar kana Viruwa i itras. 43pakalrang ku kanantu ngadan ni Amalri zi zuwa, 'azi mu kituluz kaninku; mawmu nu ulra a trau pakalrang kanantu ngadan zuwa mu, muveliyas zi kiyatuluz mu kantaw. 44sahar mu marepuitraitras, mawmu 'azi mu muwai miya' kana mawmau a sasa na Viruwa i itras kanantu ipuitras, kemani mu, kuwadakuda mu pakutatena' awa? 45ikakuwa za kokso ku kanmu i ngawayan kani Amalri; na kokso kanmu mu, mawna nanmu pinarayas kiniyalriman i Mosē. 46nu tatena' mu za pakutatena' kani Mosē, zi pakutatena' mu kaninku, 'alrana i intaw kazu lra kanantu valray venalray kananku lremak. 47nu kemazu mu 'azi pakutatena' kanantu vinavalray mu, zi kemudaya mu pakutatena' kananku ngay awa?>>
Právě zvoleno:
Yohanē 5: TPN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in Taiwan, 2023
