Yohanē 4
4
i Yēsu zi i Samaliya na vavayan
118 a kinger na Palisay na trau za demadaulr za temakesi i Yēsu zi semuwap za marakazuwan kani Yohanē. (2tatena' mu, i Yēsu 'azi ziyan semuwap kani emaeman, a maw na tu temakesi na semuwap.) 3a malrazam i Yēsu kanini na lremak zi muveruk i Yodaya, masalr ziya mukuwa i Galili; 4'azika'azi makalrang i Samaliya i intaw.
5zuwa i Samaliya i Sikar kana kazekalran i intaw. 'azi adawilr kani Yakob kanantu iveray na dare' kanantu alrak ni Yosēf; 6na Yakob na tevun maw ulra i kazu. 'alrana maulep i Yēsu kanantu pinahelralran makawang, zi kemayan i ngaydiran kana tevun; a karuwa lra za kare'alriyan.
7ulra a sasa Samaliya a vavayan zuwa muzanuma; marengay i Yēsu kantaw: <<'alrazi pa'away ku za saema.>> (8tu temakesi mukuwa lra i kazekalran tremima'a za aekanen.)
9temuvang izu na vavayan: <<maw u a Yodaya na trau, zi maw ku a Samaliya na vavayan, kemuda zi kiyaveray u kaninku za zanum 'emaw?>> (taw kemazuwan na Yodaya na trau 'azi marewazangi kana Samaliya na trau.)
10marengay i Yēsu: <<anu malrazam u kanantu iputrepa na Viruwa i itras zi harem na kiyaveray kannu za zanum 'emaw za i eman mu, zi kiyaami u kantaw, kuwaazu tu i vaverayay u kana vaaw na zanum.>>
11marengay izu na vavayan: <<sinsi, iniyan u za sasilrevan, zi asavak na tevun, auwa u i iyan melaka kana vaaw na zanum awa? 12naniyam temuwamuwan i Yakob veray kaniyam kanini na tevun, intaw, tu lralrak, zi nantu vinaaw ziya 'emaw kanini na tevun tu zanum. kamelriya lra a marama'izang ku kantaw kema u ziyamaw?>>
13temuvang i Yēsu: <<na 'emaw kanini na zanum na trau mu uri ka'aw ziyan; 14mawmu, i eman na 'emaw kananku iveray na zanum mu, i eman na 'azi lra ka'aw munayun. nanku iveray na zanum kazu kantaw i savakan mutu sirip, 'azi paziyaazi mupana kana vaaw na zanum, aelak za uwavaawan munayun i intaw.>>
15marengay na vavayan: <<sinsi, 'alrazi verayay ku kanini na zanum, 'aziya ku lra 'aw munayun, zi 'aziya ku lra marayas zuwa muzanuma i kani.>>
16marengay i Yēsu kantaw: <<uwa vinayu nannu 'azin, zi alamu lra i kani.>>
17marengay na vavayan: <<iniyan ku za 'azin.>>
marengay i Yēsu: <<iniyan ku za 'azin kema u, 'azi pamelri. 18mi'azin u lra za lralruwatr, na ulra mukasa kannu harem mu amelri nannu 'azin. pamaw nannu nirengay.>>
19marengay na vavayan: <<sinsi, malrazam ku mena'u za maw u a patralritralri. 20naniyam temuwamuwan na Samaliya na trau kazu kanini na zenan semungal kana Viruwa i itras, mawmu i inmu na Yodaya na trau marengay za i Yērusalem a maw na sasungalan kana Viruwa i itras na kinazuwan.>>
21marengay i Yēsu kantaw: <<pakutatena' kaninku! meraredek lra na wari, 'azi mu lra kaazu kanini na zenan zi za kazu i Yērusalem semungal kani Ama i itras. 22i inmu na Samaliya na trau 'azi mu malrazam za semasungal mu kani eman, iniyam na Yodaya na trau malrazam mi za semasungal mi kani eman, 'alrana ipuwavut venaaw zuwa kemay kana Yodaya na trau. 23mawmu uri raredek lra na wari, maw harem lra, izu na tematena' semungal kani Ama i itras, pakalrang kana lu'em i anger zi tematena' semungal. na kemani na iyasungal maw tu niranger ni Ama i itras. 24na Viruwa i itras maw a Lu'em, na semungal kantaw na trau ika'azi pakalrang kana lu'em i anger zi tematena' semungal.>>
25marengay kantaw na vavayan: <<malrazam ku izu na Kiristo kinuwa i Misaya zazuwa, nu zuwa lra i intaw mu rarengay kanta kana lremak peniya.>>
26temuvang i Yēsu: <<i inku, na kimazazayar kannu mu, maw i intaw!>>
27maw a azu, tu temakesi ni Yēsu muruma' lra. penauwa mena'u kantaw za kimazazayar za sasa a vavayan nazu, salaw pakumelri, mawmu iniyan za trau kiyumalr kanizu na vavayan: <<maranger u kemakuda?>> zi za kiyumalr kani Yēsu: <<kemuda zi kimazayar u kantaw?>>
28izu na vavayan meretra' kana ngelrulr, mukuwa i kazekalran, marengay kana trau ziyan: 29<<alamu na'u i inmu! ulra a sasa trau marengay pupana kananku kinakudayan ziya a kinatrauwan; ini na trau kamawmau i Kiristo mu?>> 30zi mupapana mapiya i kazekalran mukuwa mena'uwa kani Yēsu.
31a azu, na temakesi 'emunus kani Yēsu: <<sinsi, 'alrazi ekan saema.>>
32temuvang i Yēsu: <<ulra ku aekanen, maw na 'azi mu malrazam.>>
33mazayazayar na temakesi: <<kamelriya lra ulra a trau melak za aekanan paekan kantaw ziyamaw?>>
34marengay i Yēsu kanazu: <<nanku aekanen maw na miturus kanantu nirangeran na pazuwa kaninku kanizu na sasa, pawnung kemipiya kanantu iyatuluz kaninku na kiyakarunan. 35rengay i inmu: <karuwa za pata vulan zi maw lra na kare'aniyan.> marengaya ku kanmu, na'uwi iziyu na 'uma mu, na sinaleman maderu lra, karuwa lra mare'ani! 36pinakasaharan na mare'ani na trau, muramawan kana munayun na uwavaawan mepetr za vuwa', maruwaya na semalem zi na mare'ani, mukasa semangal. 37<semalem a sasa, zuma a sasa mu mare'ani> tatena' ini na ngay. 38pakarun ku kanmu mukuwa mare'aniya kana 'azi mu mu'uma na 'uma; maulep na trau, zi pa'inava mu kanantu kinaulepan na vuwa' nazu.>>
39i kazekalran ulra kazuwan na Samaliya na trau pakutatena' lra kani Yēsu, 'alrana marengay izu na vavayan: <<tu rengayaw lra peniya nanku kinakudayan ziya na lremak.>> 40nazu na Samaliya na trau zuwa kirepana'uwa kani Yēsu, kiyami kantaw za mukasa kanazu kikazu, kemazu zi i Yēsu kikazu za zuwaya wariyan i kazu.
41ulra puwapuwa kazuwan na trau 'alrana tu vati ni Yēsu zi pakutena' lra kantaw. 42marengay kanizu na vavayan nazu: <<pakutena' mi lra harem, amelri 'alrana kanannu nirengay, a maw na kinger mi lra kanantu ngay, malrazam za i intaw tatena' za maw na venaaw i Luzu kani punapunan.>>
i Yēsu paka'inava tu alrak kana ma'izang na kiyakarun i sēhu
43i Yēsu kikazu i kazu za zuwaya wariyan, zi mukuwa i Galili. 44marengay lra i intaw: <<na patralritralri kazu kanantu kazekalran 'azi kikaira.>> 45i Yēsu a meredek i Galili, na trau i kazu uvalringay kantaw mapiya; 'alrana mukuwa i Yērusalem kurelranga kana palalavat na wariyan nazu mu, mena'u lra kantaw za kazu kana semasaharan na wariyan tu kinakudayan na lremak peniya.
46i Yēsu masalr ziya muveruk mukuwa i Galili kani Kana, mawna i intaw aziyu ziyan putu kutra kana zanum na kinazuwan. i kazu ulra a sasa na ma'izang na kiyakarun i sēhu, tu alrak na ma'inayan kazu i Kabēnum kuwaaleng. 47a kinger i intaw kani Yēsu kemay i Yodaya zazuwa i Galili, zi mukuwa kirepana'uwa kantaw, kiyami kantaw za mukuwa i Kabēnum paka'inavaya kanantu alrak na ma'inayan na kuwaaleng pakirev. 48marengay i Yēsu kantaw: <<anu amelri za mena'u kana karepalripalri kirekamelri na lremak mu, kemazu mu 'azi pakutatena'.>>
49temuvang izu na ma'izang na kiyakarun i sēhu: <<sinsi, kiyami ku kaninu nu 'azi ziyan minatray ku alrak na ma'inayan mu salrangan kaninku mukuwa.>>
50marengay i Yēsu kantaw: <<uwa lra, kavaaw nannu alrak na ma'inayan!>>
izu na trau pakutatena' kanantu ngay ni Yēsu zi muveruk. 51kazu i dadalan, nantu pakarunan zuwa kiyatrevunga kantaw, marengay kantaw: <<vaaw lra nannu alrak na ma'inayan!>>
52kiyumalr i intaw kanazu, na alrak na ma'inayan 'inava a aidan. temuvang nazu: <<adaman a saya tuki a alusu kadaw, zi mulusu na vi'asan lra.>> 53paranger izu na temama, maw a azu na tuki, marengay i Yēsu kantaw: <<kavaaw nannu alrak na ma'inayan>>. mawna kemani i intaw zi na saruma'enan pakutatena' lra mapiya.
54ini mu maw i Yēsu kemay i Yodaya mareveliyas zuwa i Galili nantu pinupana a pukazuwa na karepalripalri.
Právě zvoleno:
Yohanē 4: TPN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in Taiwan, 2023
