Yohanē 21
21
kurepana'u kana papitu na temakesi
1i likuzan lra kananni na lremak mu, i Yēsu masalr ziya kazu i Tibēriya kana danaw i ngaydiran kurepana'u kana temakesi. kanini tu ikurepana'u kanantu pinakalrangan maw kemani: 2a azu, i Simon Pētēro, na ipu'avalr za 'idar kinuwa i Tomas, na Galili i Kana na trau i Natanaēl, alrak na zazuwa ni Zēbēdē, zi na zuma zazuwa na temakesi kazu mukasa mapiya. 3i Simon Pētēro marengay kanazu: <<auwa ku kivulrawa.>>
marengay mapiya: <<kuwarelrang mi kannu mukuwa.>> kemazu zi mupatraran nazu, muitras kana tamina; mawmu sa'esungan 'azi karasa za emaeman. 4a maw ziya mupana na kadaw mu, i Yēsu matikezir i ngaydiran kana zanum, mawmu na temakesi 'azi malrazam kantaw za maw i Yēsu. 5marengay i Yēsu kanazu: <<ali, karasa mu lra za vulraw?>>
temuvang nazu: <<'azi.>>
6marengay i Yēsu: <<tavukulr i tarawalran kana tamina, ulra a vulraw i kazu.>> zi temavukulr nazu, mawmu 'azi pakakezeng puitras, 'alrana kasazuwan lra tu tinavukulr na vulraw.
7tu kinalraman ni Yēsu izu na temakesi marengay kani Pētēro: <<maw i Luzu!>> i Simon Pētēro a kinger za maw i Luzu mu, pakunamun melak za kaytu tremaruv i zazek (maluwalu i intaw a azu), menekun musavak kana zanum i savakan. 8zuma na temakesi 'emiwas kana makiteng na tamina muwadalrep i kaitrasan, tu kezengaw puitras na satavukulr na vulraw. 'azi adawilr i kaitrasan a azu, kararuwa za saleman mēta tu kaadawilr. 9mukaitrasan lra nazu, mena'u za sa'udung vara, i makatras ulra a vulraw zi pang. 10marengay i Yēsu kanazu: <<elak za pidaya pukuwani nanmu tinavukulr na vulraw a haremay.>>
11i Simon Pētēro mukuwa i itras kana tamina, kemezeng kana tavukulr mukaitrasan; i savakan kana tavukulr mu dadawanan na vulraw peniya, mukasa mu saleman mikazuwa za makalruwatr misama' za teluwa. ara ulra kemani kana sazu na vulraw mu, mawmu 'azi mupiris na tavukulr. 12marengay i Yēsu kanazu: <<alamu lra kenama i inmu.>> iniyan za sasa temakesi za 'ulringetr kiyumalr kantaw <<i eman u>>, 'alrana malrazam nazu mapiya kantaw za maw i Luzu. 13zi makawang mukuwa i Yēsu, melak kana pang panini veray kanazu, zi kemazu panini kana vulraw lra.
14i ini maw marevaaw kemay kana minatray i Yēsu a likuzan lra, karetatelun pakurena'u kana temakesi.
i Yēsu zi i Pētēro
15a piya mekan nazu mu, i Yēsu kiyumalr kani Simon Pētēro: <<alrak ni Yohanē i Simon, sahar u kaninku za semalaw kananni ziyamaw?>>
temuvang i intaw: <<Luzu a, ai, malrazam u za sahar ku kannu.>>
marengay i Yēsu: <<purikanu ku siri na kakitengan.>> 16i Yēsu karepapuwan kiyumalr: <<alrak ni Yohanē i Simon, sahar u kaninku ziyamaw?>>
temuvang i intaw: <<Luzu a, ai, malrazam u za sahar ku kannu.>>
marengay i Yēsu kantaw: <<purikanu nanku siri.>> 17i Yēsu karetatelun masalr ziya kiyumalr: <<alrak ni Yohanē i Simon, sahar u kaninku?>>
i Pētēro 'alrana patrutru paretelun kiyumalr i Yēsu kantaw <<sahar u kaninku ziyamaw?>> zi nana, zi marengay kani Yēsu: <<Luzu a, iniyan u za 'azi kinalrazam, malrazam u za sahar ku kannu.>>
marengay i Yēsu: <<purikanu ku siri. 18penazangala ku marengay kannu, a lralrak u ziya mu, milunain u i inu, iturusay nu anger muiyan; mawmu nu dawadawan u lra mu, puwapana u za lima, dadikusaw u za trau, pilralrangaw mukuwa za 'azi u wawai mukuwa na kinazuwan.>> 19(marengay i Yēsu kanini na ngay mu mararengay kani Pētēro za uri kuwadakuda minatray, pulihuwa kana Viruwa i itras.) pakalikuzan, i Yēsu marengay ziya kantaw: <<i inu kurelrang kaninku mu!>>
i Yēsu zi zuma na temakesi
20marepiles i Pētēro, mena'u kanantu kinalraman ni Yēsu izu na temakesi kazu kurelrang i likuzan (izu na temakesi kazu lra kanizu na 'aremengan za keraravi mu mudalrep kani Yēsu, kiyumalr kantaw <<Luzu a, na naniwan kannu mu i eman>>). 21mena'u i Pētēro kantaw mu, zi kiyumalr kani Yēsu: <<Luzu a, ini na trau uri ukuwadakuda nu aziyu lra?>>
22temuvang i Yēsu: <<nu ku vaawaw i intaw za palru zuwa ku mu, zi 'azi kireeman kannu. pakarasa u kurelrang kaninku mu!>>
23kemazu zi, ini na ngay mu'ivat lra kana kurelrang ziya kani Yēsu na trau i savakan, marengay kanizu na temakesi za 'azi kiyanatray. tatena' mu, i Yēsu 'azi marengay za 'azi kiyanatray i intaw, a maw na marengay za <<nu ku vaawaw i intaw za palru zuwa ku mu, 'azi kireeman kannu>>.
24ini na trau mawna muramawan uwasay kananni na lremak izu na temakesi, tu vavalrayanay ini na lremak. malrazam mi kanantu uwasay mu tatena' peniya.
puludus na ngay
25i Yēsu kemakuda ziya sazu a zuma na lremak, nu ta vavalrayay peniya mu, kemianger ku mu i punapunan 'azi karuwa muwavak za sakuwazu na valray.
Právě zvoleno:
Yohanē 21: TPN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in Taiwan, 2023
