Logo YouVersion
Ikona vyhledávání

APOEM AYANG: 1

1
Phain" So: Mhoomyid:
1Xang: shi" moo Mangsoo gi mougkhung: yo' myidjang ri phain" so: to". 2Mougmyid gi alhoo: agung ajo, ziyo' dili cen: nghoid nyid. Jo, moojo, ri zeing" lhoung to" da" Nammugdara gyid gi moug: coid wigi thoeb zeing" to" lho: Mangso Venyi: gi gyid tho' moo dei loeb nyid. 3#2 Ko 4:6. Mangsoo gi «Boo" bang bui" we'» ga: lang" boo" bang bue" lo. 4Mangsoo gi nyang: yu" myang khyoo: yoomo nheugshid: nyid bye:. Houg: lho: nyang: gi boo" bang ri moug: coid mo kho' pyam lho: 5nyang: gi boo" bang ri «Nyid"» ga: lho: moug: coid ri «Myen"» ga: myeing myheing. Myen" thang: ayo, lid: lho: nab soin: ju" ri hau: zigi xang: shi" nyid" nghoid bye:.
6-7 # 2 Pe 3:5. Hau: thang: Mangsoo gi «Gyid phung: gung moo moug: laid kyoodoem: bue" lo lho: gyid gi eig gang bue" loo" we'» ga: amyeing" byid: lang" hau: zi hougsu" bue" loo bye:. Mangsoo gi moug: laid kyoodoem: ri koid too" bye: yoomo hau: kyoodoem: khoug: moo jo, da" gyid yo' kyoodoem: tho' moo jo, da" gyid bui" nhang: ziyo' dakhyoo" ti" bue" lo bye:. 8Nyang: gi moug: laid kyoodoem: ri «mougkhung:» ga: myeing byid: bye:. Myen" thang: ayo, lid: khare" lho: nab soin: ju" ri eig nyid" nyid" nghoid bye:.
9Hau: thang: Mangsoo gi «Myidjang thu' myang loo baja"- mougkhung: vhoo: mo gyid gi dakhyi' jang: moo: zeing: loo" ge'» ga: tid ziyo' dakhyoo" ti" hau: zi bue" loo bye:. 10Nyang: gi myidjang ri «Mougmyid» ga: lho: dakhyi' jang: moo za: zeing: khare" da" gyid ri «Panglai:» ga: myeing myheing bye:. Hau: lho: Mangsoo gi nyang: yu" myang khyoo: yoomo nheugshid: nheugdeug nyid bye:. 11Hau: thang: nyang: gi «Mougmyid gi mhain" zoo: lung: lid ri we' myoug: bo shi" zei: da" gug zoo shivoo: gam ri we' ashi" zei: da" seiggam aja: ja: ri we' yug thu we'» ga: amyeing" byid: ziyo' dakhyoo" ti" hougsu" bue" loo bye:. 12Mougmyid gi mhain" zoo: lung: lid dangain" ri yug thu byid: yoomo Mangsoo gi nyang: yu" myang bye: khyoo: bue" yoomo nheugshid: nyid bye:. 13Myen" thang: ayo, lid: khare" lho: nab soin: ayo, ju" ri soem" nyid" nghoid bye:.
14Hau: thang: Mangsoo gi «Nyid" yo' myen" ri yo" kho' wa shid re" we' bidnyid, zain void yo' ayo, aboin: ri toin" shed wa shid re" we' boo" bang joem bui" loo nhang: bye:. 15Nyangnu" gi mougkhung: tho' mo myidjang tho' khyoo: thoin" pang nyid baja"» ga: amyeing" byid: ziyo' dakhyoo" ti" bui" loo bye:. 16Mangsoo gi je gyi: da" boo" bang zeing eig loem: ri koid to" lho: bid gi nyid" ri vhoebkhang" lho: myen" da" atho' moo vhoebkhang" wa shid re" lhammoo" ri phain" so: too" bye:. Nyang: gi kyi: joem ri we' phain" so: too" bye:. 17Mougkhung: tho' mo mougmyid tho' khyoo: thoin" pang byid: nyid wa shid re" we' 18Nyid" yo' myen" ri vhoebkhang" wa shid re" we' boo" bang yo' moug: coid ri kho' wa shid re" we' boo" bang joem ri to" to" abye: da:. Mangsoo gi nyang: yu" myang da" khyoo: yoomo nheugshid: nheugdeug nyid bye:. 19Myen" thang: ayo, lid: khare" lho: nab soin: ayo, ju" ri myid: nyid" nyid" nghoid bye:.
20Hau: thang: Mangsoo gi «Dei loeb nyid yen" da" gougnyhoug aja: ja: gyid khoug: moo dei noem loeb noem nyid lo lho: ngho' joem we lid moo nyid loo we'» ga: amyeing" byid: bye:. 21Houg: yoomo Mangsoo gi panglai: mo gougnyhoug zeing joem gyid khoug: moo dei loeb nyid da" gougnyhoug aja: ja: dangain" yo' ngho' joem aja: ja: dangain" ri phain" so: too" bye:. Mangsoo gi nyang: yu" myang khyoo: yoomo nheugshid: bye:. 22Nyang: gi nyangnu" ri mainkaid byid: lho: - «Gyid moo nyid da" dei loeb noem dangain" we' myo: lug je: loo ge'» ga: lho: nyang: gi ngho' joem ri we' «Myo: tham: je: be: loo" ge'» ga: tid. 23Myen" thang: ayo, lid khare" lho: nab soin: ayo, ju" ri hau: zi wim: nyid" nyid" nghoid bye:.
24Hau: thang: Mangsoo gi «Mougmyid mo yhoem: moo myhu: ja: yo' siyoo moo nyid ja:- gyi: ziyo' nge zi gougnyhoug aja: ja: cang: joeb ri nyid thu loo baja"» ga: amyeing" byid: ziyo' dakhyoo" ti" bue" loo bye:. 25Mangsoo gi hau: zi dangain" ri phain" so: to" wigi nyang: gi yu" myang lho: nheugshid: nheugdeug nyid bye:.
26 # 1 Ko 11:7. Hau: thang: Mangsoo gi «Houg: lho: akhid" nyang: gi nyhang" yo' alhoo: du avoid bo da" xangsu: byu ri phain" so: boem shang. Nyangnu" gi wimdo, yo' ngho' zoo: yen" zoo: yi tho' moo we' myhu: ja: yo' siyoo gougnyhoug lam" joem gyi: zi nge zi dangain" tho' moo we' yoem: so' yo' vhoeb nyid goo" baja"» ga: tid. 27#Apm 5:1,2. #Mat 19:4; Mar 10:6. Houg: yoomo Mangsoo gi nyang: yo' du da" xangsu: byu ri phain" myhu: bye:. Nyang: gi yuggi yo' myiyi: ri phain" so: lho: 28mainkaid dang: «Re" tang: da" amyed ashen yigi moug: gyab goin" nyid byeung" lo" wigi dei mo dei nyid moo nyid ri vhoebkhang" seing: nyid wa shid re" zooshang: myoo" sho' nyid myoo: nyid je: lo" boem ge'. Ngoo gi nanu" ri wimdo, joem ngho' joem siyoo gougnyhoug dangain" ziri vhoebkhang" nhang: wa. 29Nanu" zoo: wa shid re" gug zoo shivoo: dangain" yo' shi" aja: ja: dangain" ri ngoo nyheing soin' koid too" byid: bye:. 30Nghoid loug kyang: da" siyoo gougnyhoug dangain" yo' ngho' zoo: yen" zoo: dangain" bang: zoo: wa shid re" vufu" myo, yo' gyi: cen' fu' toid mhain" zoo: joem ri ngoo phain" so: too" byid: bye:» ga: tid wigi houg bang: gi hougsu" nyang: bue" loo bye:. 31Mangsoo gi nyang: zei bue" too" bye: da" lo, moo" dangain" ri yu" lho: gye" nheig yu" shid: nyid bye:. Myen" thang: ayo, lid: khare" lho: nab soin: ayo, ju" lang" hau: zigi khyug nyid" nghoid bye:.

Právě zvoleno:

APOEM AYANG: 1: LCL

Zvýraznění

Sdílet

Kopírovat

None

Want to have your highlights saved across all your devices? Sign up or sign in

YouVersion používá soubory cookie adaptované na vaše potřeby. Používáním našich webových stránek souhlasíte s používáním souborů cookie, jak je popsáno v našich Zásadách ochrany osobních údajů