Jeremiah 32
32
Jeremiah in Lo khat Lei
1 Topa in Zedekiah ii Judah kumpi a sua zawk kum sawm a cin kum, Kumpi Nebuchadnezzar zongh Babylon kumpi a sua zawk kum sawm le kum liat a cin kum in kei hong paupui hi. #2 Kum 25:1-7 2Tua hunin Babylon kumpipa ii ngalkaphonpi in Jerusalem sim a, kumpipa innhuang sungah kei hong khacip hi. 3Zedekiah kumpipa in kei sia tua munah thong hong khum a, Topa ii son bang a ka taangko hu in kei hong mawsiat hi, Topa sonna pan, “Babylon kumpipa in hi khuapi ka lasak tu a, 4Zedekiah kumpipa suakta ngawl tu hi. Ama sia Babylon kumpipa khut sungah ki aap tu a, ama taw maitang kisi in thuson tu hi. 5Zedekiah sia Babylon ah kipaipui tu a, ama kungah ka kihiil kik mateng tua munah om zii tu hi. Babylon te a do hial zongin, zo ngawl tu hi. Keima, Topa in ka ci zo hi”.
6 Topa in kei hong sonna panin, 7ka pano Shallum ii tapa Hanamel sia ka kungah hong pai tu a, Benjamin ngamsung Anathoth khua ah a lo sia hong lei ta'n, banghang ziam cile a lei thei tu sung panin ka mealheak kuungbel nangma na om hi, hong ci tu hi. 8Tua zawkciang, Topa ii hong son bangma in, Hanamel sia ka omna zum huang sung, ka kungah hong pai in tua lo lei tu in kei hong sawl hi. Tua ahikom Topa in keima tungah hong son tatak hunlam ka he hi. 9Hanamel tung panin tua lo ka lei a, ama atu in khaiteena taw ka tee hi; a man sia ngunntang sawm le sali tung hi. 10Thukimna lai vawtin letmat ka thu a, thu hong heak pui tu in tetti te sam in, sumteena taw sum ka tee hi. 11Lo kileina lai nii — khat sia tazeik kituum ngawl a, a dang khat sia tazeik kituumin thukimna teng kikhum hi — keima kungah a nii ma in ka la a, 12Mahseiah ii tupa, Neriah ii tapa Baruch tungah tua laite ka pia hi. Tua thukimna laite sia ama tungah Hanamel le lo kilei thukimna lai tungah letmat a thu tetti te le zum huang sungah a to mihingte mai ah ka pia hi. 13Amate theampo mai ah keima in Baruch tungah, 14“Vaanglianbelpa Topa Israel ii Pathian in hi thukimna laite tazeik kituum sia hikale a kituum ngawl sia hikale a nii ma in la a, kum tampi a omcing thei tu in leibeal sungah na koi natu in thu hong pia zo hi. 15Vaanglianbelpa Topa, Israel ii Pathian in hi ngam sungah a om innte, lote le sapithuante kilei kik tu hi, ci zo hi,” ka ci hi.
Jeremiah ii Thungetna
16Lo kileina lai sia Baruch tungah ka piak zawkciang thu ka ngen a, 17“Vaanglianpipa Topa awng, nangma in lei le van sia na vaangletna le na thahatna taw na vawt hi; nang atu in a haksa lei bangma om ngawl hi. 18Mihing tul tampi te tungah tawntung itna na lak zo a, ahihang a nu a pate ii mawna khialnate hu in mihingte daan na pia si hi. Nangma in a lian, a vaang nei Pathian na hi a; Vaanglianbelpa Topa na hi hi. 19Nangma in ngealna phate na nei a, naliante na seam hi; mihingte ii a sep a vawt theampo na mu a, amate ii diannate taw kizui in thaman na pia hi. 20Nidang lai in Egypt ngam ah nalamdang laknate le a tumdang nate na vawt a, tu ciang dongin Israel mite sung hikale minam dangte theampo sungah hikale na vawt lai hi, tuasia hu in, tu in mun theampo ah hong kihe hi. 21Ih ngalte a patausak nalamdang le a tumdang nate lakna taw in Egypt ngam panin Israel na mite na paipui natu in na vaangletna le na thahatna na zangh hi. 22A taanghpupite tungah na kamciamsa bangma in, hi a hau ngam le leipha ngam sia amate na pia hi. 23Ahihang amate in hi ngam hong theng a, ngam a nei uh ciangin na thupiak ni ngawl a, na thuhilna bangin ngamta ngawl uh hi; vawt tu a na thupiakte bang mama vawt ngawl uh hi. Tuasia hu in hi suksiatna theampo amate tungah na thengsak hi.
24“Babylon te in khuapi a laak natu in khuapi kiimkot ah leivum ciangin uumci a, tuaciang sim uh hi. Ngal, kialpi le natna in hi khuapi sia amate ii khut sung thengsak tu hi. Na son sate theampo a taangtun na mu thei hi. 25Ahizong, khuapi sia Babylon te in a la tu hi zo napi tetti te mai ah lo lei tu a, thu hong pia sia nangma Vaanglianpipa Topa na hi veve hi,” ka ci hi.
26Tuaciang Topa in keima tungah, 27“Keima in Topa ka hi a, minam theampo ii Pathian ka hi hi. Kei atu in a haksa lei bangma om ngawl hi. 28Hi khuapi sia Babylon kumpipa Nebuchadnezzar le a ngalkaphonpi khut sungah ka pia tu a; amate in la in, #2 Kum 25:1-11; 2 Khang 36:17-21 29mei taw hal tu uh hi. Kei hong thin uuksak a innkhum tung a Baal atu ngimnamtui a halna le a dang pathian te atu sapittui sungsukin a biakpiakna mun ahi innte haltum tu hi. 30Amate taanghthu a kipatciil pan a sep a vawtna uh taw Israel mite le Judah mite in ka thin hong nuamsak ngawl a, ka thin hong uuksak hi. 31Hi khua mite in khuapi a sak ni pan kipan ka thin hong uuksak a hong thangsiasak hi. Tua khuapi sia suksiat tu in ka khensat zo hi, 32banghang ziam cile Judah mite le Jerusalem khua mite in a kumpite le a lampuite, a thiampite le a kamsaangte uh taw a sia a vawt uh hang ahi hi. 33Amate in kei hong nungngat uh a, ka hil tawntung hi napi hong ngai nuam ngawlin he nuam ngawl uh hi. 34Kei hong biak natu a, a kisa Biakinnpi sungah amate in a kiihuai milimte ngawngawn koi a, ninsak zo uh hi. #2 Kum 23:10; Jer 7:31; 19:1-6 35Amate in a tapate le a tanute taw Molech pathian a biakpiak thei natu in Hinnom Kuam sungah Baal a tu biaknataute vawt uh hi. Hi bang a vawt tu sia amate tungah thu ka pia bua hi. Tuabang khat a vawt tu le tuaciang Judah mite mawna vawt a suasak tu sia ka ngaisun tha ngei bua hi,” hong ci hi. #2 Kum 23:10; Jer 7:31; Thiam 18:21
Lametna Kamciam
36 Topa Israel ii Pathian in kei tungah, “Jeremiah awng, mipite in, ngal kidona, kialpi le natna in hi khuapi sia Babylon kumpipa khut sungah thengsak tu hi ci uh hi. Tu in kong son tu thudang sia ngai in. 37Ka thin uuk, ka thinsona taw in ka thethaangna ngamte theampo pan mihingte ka kaikhawm tu hi, hi munah ka ciapui kik tu a, ngam muang in ka teangsak tu hi. 38Tua zawkciang amate sia ka mite hi tu a, keima sia amate ii Pathian ka hi tu hi. 39A nuntakna uh ah tupna khat bek ka pia tu hi: tua tupna sia amate ii phat natu le a suan le a paalte ii phat natu in, a tawntung keima hong zatak vawt tu uh ahi hi. 40Amate taw a tawntung atu in thuciamna khat ka vawt tu hi. Amate atu in na pha ka vawtte ka tawlnga ngei buatu a, keima kung pan a puapial ngeingawl natu in a thinsung theampo taw keima hong kiitak natu in ka vawt tu hi. 41Amate atu in naphate ka vawtna ah dik ka sa tu a, hi ngam sungah amate ka teang suaksak tu hi.
42“Hi mite tungah hi tuasiatna ka thetsak bangma in ka khapsa na pha theampo amate ka pia tu hi. 43Mihingte in, hi ngam sia mihing hikale nganhing hikale ii ten ngawlna sennealngam bang hi tu a, tua ngam sia Babylon te khut sungah kipia tu hi, ci uh hi. Ahihang hi ngam sungah a om lote khatvei kilei kik tu hi. 44Mihingte in tua lote lei in lo kileina lai tungah min thu, tazeik tuum tu a, tetti nei tu uh hi. Hi thu sia Benjamin ngam, Jerusalem kiim ah khuanote, Judah ngam khuate le tuaciang mualtung ngam, mualpeang ngam le Judah thangsang ngam ah om khuate ah piang tu hi. Keima in mihingte a ngam ah ka teangsak kik tu hi. Keima, Topa in ka son zo hi,” hong ci hi.
Právě zvoleno:
Jeremiah 32: SCB2
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Siyin Chin Bible © Bible Society of Myanmar, 2016