Nikumoona 78
78
Nikumoon LXXVIII.
1Nutoo̔tumook n’ ooyussoowāwin, O net eyineemetik: itustak k’ e̔towukawawa net ayumewini̔k isse.
2Ne ga paske̔tānān ne’ toon uspaha̔kātnoowini̔k isse: ne ga we̔tān ā ayimu̔kee itwāwina kuyas o̔che;
3Ka ke̔ pā̔tumu̔k mena kiskāye̔tumu̔k: mena k’ o̔tawenowuk ka ke̔ isse we̔tumakooyu̔kik;
4Āka kitta katowu̔kook owasisuk pitchāyik kā ne̔tawekitchik: maka kitta wapu̔teyewāyu̔k oo kistatissewin ka Tipāye̔chekāt, oo soo̔katissewe mena mamuskache isse̔chekāwina ka ke̔ totu̔k.
5Ke̔ meeyāo isse̔twawin Jacoba, mena ke̔ meeyāo ooyussoowāwin Israela: ka ke̔ itussoowatat k’ o̔tawenowa kitta kiskino̔humowayit oot owasimiseyewa;
6Oot owasimisewawa kitta kiskāye̔tumeyit: mena owasisuk āka chāskwa ā ne̔tawekeyit;
7Kitta wapu̔teyatchik oot owasimisewawa āwukwāyew: ispe oo̔pikitwawe;
8Kitta mumisseetotowatchik Munetoowa: mena āka kitta wunekiskissetotumwatchik oot isse̔chekāwineyew Munetoowa, maka kitta mitchiminumwatchik oo’ yussoowāwineyewa;
9Mena āka kitta nuspitowatchik oo̔’ tawewawa, āka ā tapwā̔tumeyit mena ā suseepi̔tumeyit: āka kwiusk ka itustatchik oo’ tā̔ewawa, mena oot a̔cha̔koowa̔k āka ka mitchimeetchik Munetoowa;
10Tapiskooch oot owasimisa Ephraim: ā ke̔ poostisku̔kik, mena ā tu̔koonatchik a̔chapeeä, ke̔ oosimoowuk ā nutoopuyewee̔t.
11Numma o̔che mitchiminumwuk oot isse̔twawin Muneto: mena numma we̔ mitimāwuk oo’ yussoowāwineyewa;
12Maka ke̔ wunekiskissewuk ka ke̔ totumeyit: mena mamuskach isse̔chekāwina ka ke̔ wapu̔teyikootchik.
13Mamuskach kākwiä ke̔ totum ā wapumikoot kuyas k’ o̔tawenowa, Egypti̔k: ākota uskee̔k Zoan.
14Ke̔ kwāskechewune̔taw wenepāk, ākose ākota ke̔ pimoo̔tāwuk: ke̔ isse̔taw nippe kitta chimutāyik.
15Ā kesikayik mena ke̔ kiskinoo̔tahāo wuskoo o̔che: mena kupātipisk iskootāo o̔che.
16Ke̔ wana̔wāo ā muskowisseeyit ussineeä pukwutuskee̔k: ākose ke̔ meeyāo kitta mini̔kwāyit āwuko, mana piko ā ke̔che timmeek o̔che.
17Ke̔ pātaw nippeä kistapiska̔k o̔che: ākose wuyowechewun tapiskooch sepeeä.
18Maka a̔cheko wunetotowāwuk: mena kissewahāwuk mawutche ke̔che Aya pukwutuskee̔k.
19Nunatoo̔koohāwuk Munetoowa oo’ tā̔ewa̔k: mena nutowāye̔tumwuk weyas ā isse ukawatu̔kik.
20Ke̔ nayā̔tawe itāwuk Muneto mena, omisse: Kitta ke̔ kwyache̔taw na Muneto mechesoowina̔tik ota pukwutuskee̔k?
21Atoweya tapwā ā otama̔hu̔k ā kistapiskayik, nippe ke̔ sakechewun, mena ke̔ pimechewun: maka kitta ke̔ mākew che ayu̔konaw ussitche, a̔po kitta ke̔ oo̔cheestumowāo che weyas oot eyineema?
22Ispe ka Tipāye̔chekāt ā pā̔tu̔k oma, kissewasew: ākose iskootāo suskahook Jacob, mena ā koosikwu̔k kissewasewin otee̔tik Israel;
23Chikāma numoweya tapwā̔towāwuk Munetoowa: mena numoweya mumisseetotumwāwuk oo wechehewāwineyew.
24Ākose ooyussoowatum wuskoo ispimi̔k: mena paske̔tānum iskwa̔tāma kesikoo̔k.
25Ke̔ nasitissa̔humowāo mena manna kitta mecheyit: mena meeyāo mechim kesikoo̔k o̔che.
26Ākose ayiseyinew ke̔ mechew atunoo̔kuna oo mechewineyew: weya ākooyekoo̔k mechim ā isitissa̔humowat.
27Ke̔ isse̔taw wapunoo̔k kitta o̔tineyik seepa kesikoo̔k kitta yootineyik: mena oo soo̔katissewin o̔che ke̔ pātaw sawune yootin.
28Ke̔ yasitissa̔humowāo weyas tapiskooch pi̔ko ā isse me̔chāteyik: mena ā oopeewaweyit peyāsewa tapiskooch yākaw ka isse me̔chātik wenepākoo̔k.
29Ke̔ pukitinumwāo tustowikumik w’ ekeewa̔k: missewā waska oot e̔tawinewa̔k.
30Ākose ke̔ mechesoowuk, mena metoone ke̔ keespoowuk; weya ā meeyat piko eyekoo̔k ā itāyimooyit: numoweya o̔che anwā̔towawuk eyekoo̔k ā ke̔ ukawatu̔kik.
31Maka kāyapitch weyas ā ustāyik oo’ toonewa̔k, ka koosikwuneyik oo’ kissewasewin Muneto otee̔tikwuk, ākose nippa̔hikwuk unekee ā mawutche wāyootissitchik: tapwā, mena ke̔ nee̔chewāpa̔wāo ā mawutche nowusoonikasooyit Israel.
32Maka a̔cheko kāyapitch wune̔tewuk: mena numoweya tapwā̔tumwāwuk oo mamuskache isse̔chekāwineyewa.
33Āwuko o̔che ke̔ māstinumwāo oo kesikameyewa pukwunuta: mena oo pimatissewineyew ayimissewini̔k.
34Ispe nāpahatche, ākose nutoonak: ākose mana kwāskeewuk weputch, mena ā nutowāyimatchik Munetoowa.
35Ākose kiskissewuk mena Munetoowa ā oo muskowisseewinitchik: mena ka ke̔che ayeweyit Munetoowa ā natumakootchik mana.
36Āyewā̔k maka, ke̔ wuyāsimāwuk oo’ toonewa̔k o̔che: mena kukwāchesimāwuk oo’ tāyunewa̔k.
37Weya oo’ tā̔ewawa āka kwiusk ā itustāyikee: mena numoweya mitchiminumwāwuk ā ke̔ itwāyit.
38Maka ā ispee̔che kissāwatisseet, ke̔ usānumowāo oo wune̔tewineyewa: mena numoweya nissewunachehāo.
39Tapwā, me̔chātwaw ke̔ ākutānumowāo oo kissewasewin: mena mitchiminum oo kissewasewin āka missewā kitta wuniskamukuneyik.
40Weya ā nakutowāye̔tu̔k pisisik ā weyaseweyit: mena tapiskooch yootin uspin ka mayawepuyik, ākose āka ka o̔che nowe̔takwu̔k.
41Me̔chātwaw ke̔ kissewahāwuk pukwutuskee̔k: mena numma na̔āye̔tumehāwuk pukwuchayi̔k.
42Ke̔ kewāwuk, mena ke̔ kootāyimāwuk Munetoowa: mena nunatoo̔koohāwuk ka Kunatissit Israelik.
43Numma kiskissetotumwāwuk oo’ chee̔cheeyew: mena unima kesikaw ispe ā natumowat oo’ chee̔chceyee̔k o̔che koostakuna;
44Ka̔ isse totumeyit oo mama̔tawineyewa Egypti̔k: mena oo mamuskache isse̔chekāwineyewa Zoani̔k.
45Ke̔ kwāskinumwāo oo nippeemeyewa mi̔koo̔k isse: āka kitta mini̔kwāyit nippesepee̔k.
46Ke̔ isitissa̔humowāo i̔kwa, ākose kitumookwuk: mena uyeekisa kitta nissewunachehikootchik.
47Ke̔ meeyāo oomwapukwāsewa oo kistekaneyew: mena oot utooskāwineyew ookwaskoo̔cheesisa.
48Ke̔ nissewunachehimāo oo meenisa̔tikoomeyewa sāsākun o̔che: mena oo meenisa̔tikoomewawa a̔kwu̔tin o̔che.
49Ke̔ nissewunachehimāo oo mistoosoomeyewa mena sāsākun o̔che: mena oo mākoosewaneyewa peyāsewa o̔che.
50Ke̔ wāpinumowāo oo kissewasewin, āka oo na̔āye̔tumoowin, mena ayimissewin: mena ke̔ isitissa̔humowāo muche atunoo̔kuna.
51Ke̔ towinum oo kissewasewin kitta ayakooyit, mena numoweya munachehimāo oot a̔cha̔kooyewa nippoowini̔k o̔che: maka ke̔ mākew oo pimatissewineyew ke̔che itaspināwini̔k isse;
52Mena ke̔ nippa̔hāo ka̔keyow nistume koosisana Egypti̔k: ā mawutche ke̔che ayeweyit mena ā soo̔katisseyit āwuko oo’ tānowewin Ham.
53Maka weya oot eyineema, ke̔ kiskinoo̔tahāo tapiskooch mayutchikwa: mena ke̔ tu̔koonāo pukwutuskee̔k tapiskooch mākoosewanuk.
54Ke̔ wuyowe̔tahāo pāu̔tuk, āka kitta koostacheyit: mena ke̔ ukwuna̔wāo oo koostakuneyewa wenepāk o̔che.
55Ākose ke̔ pāsewao oot e̔tawini̔k: oo wutcheemi̔k ote ka ke̔ utawāt oo ke̔chenisk o̔che.
56Ke̔ wuyowewāpināo āka ka ayumehayit: ke̔ isse̔taw oot uskeeyew kitta matinumamee̔t kitta oot ayaneyit, mena ke̔ issehāo Israel kitta ayayit w’ ekeeyee̔k.
57Ākose ke̔ nunatoo̔koohāwuk, mena ke̔ kissewahāwuk mamowāyus ka ispa̔kāye̔takooseyit Munetoowa: mena numoweya mitchiminumwuk oo kukāskimewāwineyewa;
58Maka ke̔ utimekapoweestowāwuk, mena ke̔ nukutāwuk tapiskooch oo̔’ tawewawa: ā usāpuyitchik tapiskooch a̔chapee ā peekopuyit.
59Weya āka ā na̔āye̔tumehatchik oot isse̔twawinewaw o̔che: mena ā kissewahatchik oo munetoo̔kanimewawa o̔che.
60Ispe Muneto ā pā̔tu̔k āwuko, ke̔ kissewasew: ākose mistahā kissewahik Israela.
61Āwuko o̔che ke̔ wāpinum mekewa̔p Siloi̔k: unima mekewa̔p ka ke̔ chimutat ayiseyineeska̔k.
62Ke̔ pukitinumwāo oo soo̔katissewineyew kitta sakoo̔tawee̔t: mena oo meyosissewinewaw oo koostakunewawa oo’ chee̔cheeyee̔k.
63Ke̔ mākew oot eyineema semakuni̔kooman o̔che kitta nippa̔himee̔t: mena ke̔ kissewahik oot ayana.
64Iskootāo ke̔ nippa̔hikooyewa oo’ skeneekeemewawa: mena oo’ skeneekiskwāmewawa numoweya mākiskwāwāwan.
65Oot ayumehāwekemamewawa ke̔ nippa̔himawa semakuni̔kooman o̔che: mena numoweya e̔tayewa oonuputāpewa kitta mowe̔katayit.
66Ākose ka Tipāye̔chekāt kooskooskaw tapiskooch oweyuk ā ke̔ nipat: mena tapiskooch mistapāo ā ke̔ mini̔kwāt meenisapoë.
67Ke̔ pukuma̔wāo ka pukwatikoot ota̔k o̔che: mena ke̔ naspitche nunāpāwehāo.
68Numma we̔ ayaw Josepha w’ ekeeyew: mena numoweya ke̔ itāyimoo Ephraima;
69Maka ke̔ nowusoonāo Judahwa: wutchee Sion ote ka sake̔tat.
70Ākose ākota ke̔ ose̔taw oo ke̔che ayumehāwekumik ispimi̔k: mena ke̔ ayeeche̔taw naspitch tapiskooch uske ka ke̔ ayeeche̔tat mosuk.
71Ke̔ nowusoonāo mena Davida oot utooskāyakuna: mena ke̔ otināo itta mayutchi̔kwa ā kipa̔hoomee̔t o̔che.
72Mākwach ā pimitissa̔wat noosā mayutchi̔kwa ā kekeskowayit oot owasimiseyewa ke̔ otināo: kitta mechesoo̔kowayit Jacoba oot eyineema, mena Israela oot ayana.
73Ākose ke̔ mechesoo̔kowāo tapwā mena tapwā̔tumoowe oo’ tā̔ o̔che: mena ke̔ ooyukimāo kwiusk missewā oo soo̔katissewin o̔che.
Právě zvoleno:
Nikumoona 78: CSW
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
First published by the British and Foreign Bible Society 1876-1877.