रोमियो 6
6
पापा रे खातर मूईरा, मसीह च जिऊंदा
1तां फेरी अहांजो क्या बोलणा चाहिन्दा? तां क्या अहें लगातार पाप करदे रौ, ताकि परमेशरा रा अनुग्रह बधो? 2कदी मनी! अहें पापा रे खातर मरी चुक्कीरे इस खातर अहांजो लगातार पाप नीं करना चाहिन्दा। 3तुहें जाणाँ ये भई ताहली जे अहें मसीह यीशुये सौगी इक हुणे रे खातर बपतिस्मा लेआ था, तां अहें तिस सौगी मरीगे थे।
4ताहली जे अहें बपतिस्मा लेआ था, तां अहें मसीह ने सौगी मारे गये थे कने गड्डे गये थे ताकि अहें इक नई जिन्दगी जी सक्को, तियां जे मसीह पिता परमेशरा रिया महिमा रे जरिये मूईरयां चते जिऊंदा हुया था। 5जे अहें मसीह यीशुये रिया मौती च अपणे बपतिस्मे रे जरिये भागीदार हुये तां अहें बी पक्का तिस साई मूईरयां ते जिऊंदा कित्ते जाणे।
6अहें ये जाणाँ ये भई अहांरी पुराणी जिन्दगी यीशुये सौगी क्रूसा पर चढ़ाई तरी ताकि पापा ने भरीरा अहांरा शरीर खत्म हुई जाओ, कने अहें अग्गे जो पापा रे गुलाम नीं बणीरे रौ। 7काँह्भई ताहली जे अहें मराँ ये, तां अहें पापा रिया सामर्था ते अजाद हुई जायें।
8इस खातर जे अहें मसीह सौगी मरीगे, तां अहांरा ये विश्वास आ भई अहां तिस सौगी जिऊंदा बी हूणा। 9काँह्भई अहें जाणाँ ये भई मसीह मूईरयां चते जिऊंदा कित्या था सै फेरी कदी नीं मरना; कने मौती तिस पर कदीं राज नीं करना।
10ताहली जे मसीह मरया, सै इक इ बार सब्बीं रे पापा रे खातर मरया। पर हुण सै जिऊंदा, कने सिर्फ परमेशरा रे खातर जिऊंदा। 11इयां इ तुहें अपणे बारे च बी सोच्चा भई तुहें पापा रे खातर मरी चुक्कीरे, पर मसीह यीशुये तुहांजो जीवन दित्या कने तुहें परमेशरा रे खातर जिऊंदा ये।
12इस खातर तुहांरे नाशवान शरीराँ पर पाप राज नीं करो, ताकि तुहें पापां रियां इच्छां रे मुतावक नीं चलो; 13कने अपणे शरीरा रे अंगाँ जो अधर्मा रे कम्मां खातर पापां रे हवाले नीं करा, वल्कि मुड़दयां चते जिऊंदा हुणे साई परमेशरा रे हवाले करा, कने अपणे शरीरा रे अंगाँ जो धार्मिकता रे कम्मां खातर परमेशरा जो सौंपा। 14फेरी तुहां पर पापां रा राज नीं हूणा, काँह्भई तुहें व्यवस्था रे सहारे नीं जिऊंदे वल्कि परमेशरा रे अनुग्रह रे सहारे जीआं ए।
पापा रे दास्सा ते, परमेशरा रे दास
15तां अहें क्या करिये? क्या अहें पाप करिये काँह्भई अहें व्यवस्था रे अधीन नींये, वल्कि परमेशरा रे अनुग्रह रे अधीन जीआं ये? कदीं मनी! 16तुहें जाणाँ ये भई ताहली जे तुहें किसी रा हुक्म मनणे खातर अप्पूँजो सेवका रे रुपा च तिस्सो सौंपी दें, तां तुहें सेबक हुये : फेरी चाये तुहें पापा रे दास बणा, तिसरा जे अन्त मौत इ, कने चाये तुहें हुक्मा रा पालन करा, सै जे तुहांजो धार्मिकता री ओर लेई जान्गा।
17तुहें पैहले पापा रे दास थे, पर सै उपदेश जे तुहांजो सखाया गईरा था हुण तुहें अपणे पूरे दिला ने तिसरा पालन कित्या, इस खातर हऊँ परमेशरा रा धन्यवाद कराँ। 18कने हुण परमेशरे तुहांजो पापा रिया सामर्था ते अजाद कित्तिरा कने तुहें परमेशरा रे दास बणी चुक्कीरे, ताकि तुहें सै जे सही आ सै करी सक्को।
19हऊँ ये उदाहरण इस खातर इस्तेमाल करी रां काँह्भई तुहांरे खातर ये समझणा मुश्किल आ। तियां जे तुहें खुद अप्पूँजो दास्सा साई बुरयां कम्मां रे खातर अपवित्रता कने बुराईया रे खातर सौंपया था, तियां इ हुण तुहें अप्पूँजो परमेशरा रिया सेवा रे खातर सौंपी देआ, ताकि तुहें पूरी तरह तिसरे हुणे।
20काँह्भई ताहली जे तुहें पापां रे दास थे, तिस वगत तुहांजो परमेशरा जो खुश करने री कोई जरूरत नीं थी। 21तुहांरिया पुराणिया जिन्दगिया ते तुहांजो क्या फायदा हुया? तुहें सिर्फ इसते शर्मिन्दा ये, काँह्भई तिन्हां कम्मां रा नतीजा मौत इ।
22पर हुण तुहांजो पापा ते छुटकारा मिली चुक्कीरा कने तुहें परमेशरा रे दास बणी चुक्कीरे। इस खातर इन्हां तुहांजो पवित्र बनाणा कने अनन्त जीवना री तरफ लेई जाणा। 23काँह्भई पापा री मजदूरी त मौत इ, पर परमेशरा रा बरदान अहांरे प्रभु मसीह यीशुये च अनन्त जीवन आ।
Právě zvoleno:
रोमियो 6: KFSNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
This work is licensed under Creative Commons Attribution-ShareAlike 4.0 License.