रोमियो 16
16
ब्यक्तिगत नमस्कार
1हऊँ तुहांजो ये गलाणा चाँह भई अहांरी मसीह भैण फीबे बौहत अच्छी, सै जे किंख्रिया नगरा री कलीसिया च सेवा कराँ इ। 2भई तुहें, तिसारा स्वागत करा काँह्भई सै प्रभुये री, इस तरिके ने स्वागत करा तियां जे परमेशरा रे लोक इक्की दूये रा स्वागत कराँ ये। कने जो किछ मदद तिसाजो तुहांते चाहिन्दी तिसाजो देआ, काँह्भई तिसे मेरे बी कने बौहत लोकां री बी मदद कित्तिरी।
3प्रिस्का कने अक्विला जो मेरी नमस्ते। सै यीशु मसीह च मेरे सहकर्मी ये। 4तिन्हें मेरा प्राण बचाणे खातर अपणी जिन्दगी बी दावा पर लगाईती थी; कने सिर्फ हऊँ इ नीं, पर अन्यजातियां री सारी कलीसियां बी तिन्हांरा धन्यवाद कराँ इयां। 5तिसा कलीसिया जो बी मेरा नमस्कार सै जे तिन्हारे घरें कट्ठा हुआं इ। मेरे प्यारे मित्र इपनितुस जो मेरा नमस्कार सै जे आसिया प्रदेशा च मसीह जो अपनाणे औल़ा पैहला था।
6मरियम जो बी मेरी नमस्ते, तिसे जे तुहांरे खातर खूब मेहणत कित्तिरी। 7मेरे रिश्तेदार अन्द्रनीकुस कने यूनियास जो बी मेरा नमस्कार, सै जे मेरे सौगी जेल्ला च थे, कने नाम्मी-ग्रामी प्रेरित थे, कने सै माहते बी पैहले मसीह च आई चुक्कीरे थे। 8अम्पलियातुस जो बी मेरा नमस्कार, सै जे प्रभु च मेरा प्यारा मित्र आ।
9उरबानुस जो मेरा नमस्कार सै जे मसीह च अहांरे सहकर्मी ये, कने मेरे प्यारे मित्र इस्तुखुस जो बी नमस्कार। 10अपिल्लेस जो बी मेरा नमस्कार सै जे मसीह च खरे कने सच्चे निकल़े। अरिस्तुबुलुस रे परिवारा जो बी नमस्कार। 11मेरी यहूदी साथी हिरोदियोन जो नमस्ते। नरकिस्सुस रे परिवारा रे तिन्हां लोकां जो बी नमस्ते सै जे प्रभु पर विश्वास कराँ ये। 12त्रुफेना कने तिसारी बैहण त्रफोसा जो बी नमस्कार! सै जे दोन्नों जनानां प्रभु रिया सेवा च मेहणती सेबिकां इयां, तिन्हांजो बी मेरा नमस्कार। मेरी प्यारी भैण परसिस जो बी मेरा नमस्कार, तिसे जे प्रभु च खूब मेहणत कित्ती। 13प्रभुरे असाधारण सेवक रुफुस जो कने तिसरिया मौआ जो बी मेरा नमस्कार, सै जे मेरे खातर माता साई। 14असुंक्रितुस, फिलगोन, हर्मास, हिर्मोस, पत्रुबास कने तिन्हांरे सौगी साथी विश्वासियां जो बी मेरा नमस्कार। 15फिलुलुगुस, यूलिया, नेर्युस कने तिसरी बैहण उलुम्पास कने तिन्हां रिया सौगी रे सारे साथी पवित्र लोकां जो नमस्कार। 16तुहें लोक गल़े लगीने इक्की दूये रा स्वागत करा। तुहांजो मसीह री सारी कलीसियां रिया तरफा ते नमस्कार।
आखरी निर्देश
17हुण मेरे साथी विश्वासियो, हऊँ तुहांते विनती कराँ, भई तुहें सै जे शिक्षा लेई, तिसरे उलट तुहां च सै जे पंघोल़ पां कने दुज्जेयां रे विश्वासा जो बगाड़ां ये, तिन्हांते खबरदार हुई जावा कने तिन्हांते दूर रौआ। 18काँह्भई येढ़े लोक अहांरे प्रभु यीशु मसीह री नीं बल्कि अपणे पेट्टा री सेवा कराँ ये; कने अपणी चिकनी चुपड़ी गल्लां ते सिधे-साधे मना रे लोकां जो बहकायें।
19तुहांरी आज्ञाकारिता रे चर्चे बाहर हर किसी तक पुज्जी चुक्कीरे, इस खातर तुहांते हऊँ बड़ा खुश आ, पर हऊँ चाँह भई तुहें भलाईया खातर बुद्धिमान बणीरे रौ पर बुराईया खातर भोले बणीरे रौ। 20शान्तिया रे परमेशरा बौहत जल़द शैतान्ना जो तुहांरे पैराँ हेठ कुचल़ी देणा। अहांरे प्रभु यीशु मसीह रा अनुग्रह तुहां सौगी रौ।
21मेरने काम्म करने औल़े तिमुथियुस कने मेरे यहूदी दोस्त लूकियुस, यासोन कने सोसिपत्रुस रिया तरफा ते तुहांजो नमस्कार। 22इसा चिट्ठिया रे लिखणे औल़े तिरतियुस रा तुहांजो प्रभु च नमस्कार।
23मेरा कने सारी कलीसियां रा आदर सत्कार करने औल़े गयुस रा तुहांजो नमस्कार। इरास्तुस सै जे नगरा रा खजान्ची आ कने अहांरे साथी विश्वासी क्वारतुस रा बी तुहांजो नमस्कार। 24अहांरे प्रभु यीशु मसीह रा अनुग्रह तुहां सौगी बणीरा रौ।
परमेशरा री स्तुति
25हुण सारी महिमा परमेशरा री ओ, सै जे तुहांजो विश्वासा च मजबूत करी सक्कां, तियां जे खुशखबरी बोलां इ। यीशु मसीह रे बारे री ये खुशखबरी अन्यजातियां रे लोकां रे खातर तिसरी योजना परगट कित्तिरी सै जे युगां-युगां ते छुपीरी थी। 26पर परमेशरा रे हुक्मा ते भविष्यवक्तयां रे लेखां रे जरिये हुण अहांजो कने अन्यजातियां जो प्रचार करीने दस्सीत्या, ताकि सारी जातियां विश्वास करी सक्को कने तिसरी आज्ञा मन्नी सक्को।
27तिस इकलौते ज्ञानवान परमेशरा री महिमा यीशु मसीह रे जरिये युगां-युगां तक हुन्दी रौ। आमीन।
Právě zvoleno:
रोमियो 16: KFSNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
This work is licensed under Creative Commons Attribution-ShareAlike 4.0 License.