ƐZƖKƖƐL 44
44
Wɩalɩŋ sɩ mʋ tɩgɛ sɩpaalaara, Levi doho nɩaa arɩ Wɩɩsʋllɩ sɩpaalaaraa lɛ
1Ŋɩɩ nɛ baal-la mɩɩra kɛmmɛ kɔ Wɩa dɩɩ-bal-la harɩŋ boi-baal-la sɩ chaasɛ wɩɩpɔsʋŋ, dɩ ʋ tɔ. 2La TƖƖNA bʋla pɩmɛ, “Boi-baalɩŋ deeŋ maga dɩ ʋ tɔ chɩŋ nɛ. Ʋ bɩ maga ba suru. Nʋʋkala bɩ maga dɩ ʋ to nɩmɛ jʋʋ. Ʋ maga ʋ tɔ chɩŋ nɛ, bɛɛ wɩaa mɩ-na ma TƖƖNA Iziral tɩŋŋaa Wɩa to nɩmɛ nɛ a jʋʋ. 3Sɩpaalaarʋ-la dʋndʋŋa nɛ jaŋ wuo hɔŋ boi-la niiŋ a dii kɩaa mɩ-na ma TƖƖNA sɩpaaŋ. Ʋ maga ʋ to boiŋ niiŋ zawʋra-la tʋɔŋ a jʋʋ, aŋ bɩra to nɩmɛ a lɩɩ.”
4Ŋɩɩ nɛ baal-la kɛmmɛ to wɩɩpɔsʋŋ nagʋa dɩɩrɩŋ boi-baalɩŋ la kʋ chɩŋ Wɩa dɩɩ-bal-la sɩpaaŋ. Mɩ beŋ a na La TƖƖNA tʋla dɩ ʋ su ʋ dɩɩ-bal-la kala. Mɩ tuu tele chu.
5Ŋɩɩ nɛ La TƖƖNA bʋla pɩmɛ, “Nuhuobiiŋ, beŋ fii a jegili woruŋ a nɩɩ wɩalɩŋ kala mɩ sɩ jaŋ bʋla pɩŋ a mʋ tɩgɛ mɩ dɩɩ-bal-la wombiee ma sɩ jaŋ tuto lɛ. Ʋ maga ma jɩŋ nɩalɩŋ sɩ maga dɩ ba jʋʋ mɩ dɩɩ-bal-la arɩ nɩalɩŋ sɩ bɩ maga dɩ ba jʋʋ nɛ. 6Bʋla pɩ Iziral tɩŋŋaa sɩ bɩ dagɩŋ ka sɛɩ, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ bɩra bɩ jaŋ kɔ dɩ mɩ sɛɩ wʋkɩsɩa-la ma sɩɩ ŋaa. 7Ma kɛŋ nɩwogusuŋ sɩ bɩ mɩ ka to nɛ, a bɩ ba penee ma kere kʋ jʋʋ mɩ dɩɩ-bal-la a joŋ disiniŋ hɛ ʋ lɛ, bʋa-la lɛ ma sɩ yie joŋ pʋsʋŋ nʋʋŋ arɩ chalɩŋ sɩ ŋaa mɩ kʋdiilee a ŋaa Wɩɩsʋlʋŋ pɩmɛ. Ma chei nii-la sɩ hɛ mɩ dɩ ma pɛgɛ nɛ, a tɩŋ wʋkɩsɩa-la kala ma sɩ ŋaa wɩaa. 8Wɩalɩŋ kala sɩ maga dɩ ma nɛ ŋaa mɩ dɩɩ-bal-la lɛ a tɩŋ mɩ kɩaa sɩ bɩ disiniŋ kɛnɛ wɩaa, ma mɩɩra leŋ nɩwogusuŋ nɛ ŋɩŋaa. 9Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Nɩwogo kala sɩ bɩ mɩ ka to, a bɩ ʋ peniŋ ma kere bɩ maga ʋ jʋʋ mɩ dɩɩ-bal-la. Nɩwogusu-la ma sɩ paala guoli Iziral tɩŋŋaa tʋɔŋ bɩ maga dɩ ba jʋʋ.
10Mɩ jaŋ dɔgɩsɛ Levi doho nɩalɩŋ arɩ Iziral tɩmma-la sɩ vɩamɛ aŋ mʋ kpʋkpaarɛ vʋɩyaa. 11Ba jaŋ wuo tɩtɩŋ mɩ dɩɩ-bal-la boi-baalaa lɛ, a wuo kpʋkpʋ kʋnyɩgaa Wɩɩsʋlʋŋ pʋsʋŋ arɩ pʋsʋŋ dɔnsʋŋ nɩalɩŋ sɩ kaa kɔ a tɩmaa pɩba. 12Ama a tɩŋ ba sɩ laa Iziral tɩŋŋaa sɩpaaŋ a kpaarɛ ba vʋɩyaa pɩpɩba, a leŋ Iziral tɩŋŋaa ŋaa wʋbɔŋŋɔɔ, mɩ-na ma TƖƖNA Wɩɩjarɩbakɔ ŋmɩɛsa nɛ arɩ mɩ jaŋ dɔgɩsɛba. 13Ba bɩra bɩ jaŋ ŋaa Wɩɩsʋllɩ sɩpaalaaraa. Ba bɩra bɩ jaŋ digi mɩ kɩalɩŋ sɩ bɩ disiniŋ kɛnɛ, koo Wɩɩsʋlʋŋ kɩalɩŋ zɔmʋŋ sɩ bɩ magɩa kɛnɛ. Ba maga ba dii hɩɩsɩŋ nɛ a tɩŋ wʋkɩsɩa-la ba sɩ ŋaa wɩaa. 14Mɩ jaŋ jomba hɛ dɩ ba tɩtɩŋ tɩntɩmɩa-la dɔnsʋŋ kala sɩ hɛ mɩ dɩɩ-bal-la lɛ.
15Ama Levi tɩmma-la sɩ ŋaa Zadɔk doho nɩaa a ŋaa Wɩɩsʋllɩ sɩpaalaaraa, nɩalɩŋ sɩ to wʋtɩtɩɩ a tɩŋ mɩ dɩa-la tɩntɩŋŋaa bʋa-la lɛ Iziral tɩŋŋaa kala sɩ vɩamɛ, ba-na jaŋ chɩŋ mɩ sɩpaaŋ a joŋ Wɩɩsʋlʋŋ pʋsʋŋ nʋʋŋ arɩ chalɩŋ a ŋaa Wɩɩsʋlʋŋ pɩpɩmɛ. Mɩ-na ma TƖƖNA Wɩɩjarɩbakɔ nɛ bʋla. 16Ba dʋndʋŋa nɛ jaŋ jʋʋ mɩ dɩɩ-bal-la tʋɔŋ lee-la sɩ bɩ disiniŋ kɛnɛ. Ba dʋndʋŋa nɛ jaŋ kʋ chɩŋ mɩ koru-la sɩpaaŋ a tɩmaa pɩmɛ.
17Dɩ ba nɛ jʋʋ tʋɔŋ kaala-la boi-baalaa, ba maga ba laalɛ gɛrɩ-fʋfʋlaa nɛ, ba bɩ maga ba laalɛ gɛrɩ na-kala ba sɩ kɛŋ pie-pʋnaa ŋaa a tɩtɩŋ tʋɔŋ kaala-la boi-baala-la lɛ koo mɩ dɩɩ-bal-la tʋɔŋ. 18Ba maga ba joŋ gɛrɩ-fʋfʋlaa nyu-bɛllɩŋ a bɛ ba nyusuŋ, aŋ joŋ gɛrɩ-fʋfʋlɩa-la dɔnsʋŋ ma vɔɔ ba tɩnsɩŋ. Ba bɩ maga ba laalɛ kʋŋkala sɩ jaŋ leŋ dɩ ba suoli. 19Dɩ ba nɩɩ lɩɩ harɩŋ kaala-la, lee-la nɩalɩŋ sɩ hɛ, ba maga ba wuri gɛnnɩ-la ba sɩ laala tɩŋ mɩ sɩpaaŋ a bil dɩɩsɩ-la sɩ bɩ disiniŋ kɛnɛ lɛ nɛ, aŋ paa gɛrɩ-wogusuŋ laalɛ, dɩ nɩalɩŋ sɩ́ gɛnnɩ-la sɩ́ bɩ disiniŋ kɛnɛ digu dɩ wɩɩ ŋaa ba lɛ.
20Ba bɩ maga dɩ ba fʋŋ nyu-kpelliŋ koo a leŋ dɩ ba nyu-pʋnaa faasa waa. Ba maga ba kɩkɛ ba nyusuŋ nɛ. 21Wɩɩsʋllɩ sɩpaalaaraa kʋŋkala bɩ maga dɩ ʋ nyʋa girep nɛnɛɛ sɩnɩŋ dɩ ʋ nɛ kʋ jʋʋ tʋɔŋ kaala-la. 22Ba bɩ maga dɩ ba jaa yo-haal koo haal sɩ vɩa ʋ bala. Ba jaŋ wuo jaa Iziral tɩŋŋaa tolo sɩ bɩ baal jɩŋ koo ba Wɩɩsʋllɩ sɩpaalaaraa dɔŋɔ yo-haala. 23Ba maga ba dagɛ mɩ nɩaa kɩalɩŋ sɩ ŋaa mɩ-na Wɩa kɩaa a bɩ disiniŋ kɛnɛ arɩ kɩalɩŋ sɩ ŋaa nuhuobiine kɩaa, dɩ ba jɩŋ kɩalɩŋ sɩ kɛŋ disiniŋ arɩ kɩalɩŋ sɩ bɩ disiniŋ kɛnɛ bʋa. 24Dɩ kaalɛrɛ nɛ sie, Wɩɩsʋllɩ sɩpaalaaraa maga dɩ ba to mɩ wombie-la mɩ sɩ bile dɩ ba tuto nɛ a bʋl wɩɩ-la. Wombie-la mɩ sɩ bile dɩ baa to arɩ mɩ wʋdagaa kala sɩ mʋ tɩgɛ gbielisi-la mɩ sɩ lɩɩsa lɛ, ba maga ba to ba kala nɛ. Ba maga ba kɛŋ chɛ-wiesii-la dɩ ʋ ŋaa tapʋl zɔŋ nɛ.
25Wɩɩsʋllɩ sɩpaalaara bɩ maga ʋ digi sʋʋŋ a ŋaa disiniŋ hɛ ʋ tɩtɩa lɛ. Ama dɩ ʋ nyɩmma koo ʋ naaŋ nɛ, koo dɩ ʋ nanʋala koo ʋ tolo nɛ koo ʋ naambie koo ʋ dɩhaala ha sɩ bɩ bala jaa nɛ sʋba, ʋ jaŋ wuo digi. 26Dɩ ʋ nɛ digi sʋʋŋ dɩ ba pɩɩsɛ ʋ disiniŋ ta, ʋ maga ʋ gbɛrɛ tapʋlaa balɩpɛ nɛ. 27Tapʋlɩɩ-la ʋ sɩ jaŋ kʋ jʋʋ mɩ dɩɩ-bal-la tʋɔŋ kaala-la dɩ ʋ tɩŋ mɩ dɩɩ-bal-la sɩ bɩ disiniŋ kɛnɛ lɛ, ʋ maga ʋ ŋaa wʋbɔŋŋɔɔ joŋo chɛnɩŋ Wɩɩsʋlʋŋ a pɩ ʋ tɩtɩa nɛ. Mɩ-na ma TƖƖNA Wɩɩjarɩbakɔ nɛ bʋla.
28Mɩ kpaalɩŋ nɛ jaŋ ŋaa Wɩɩsʋllɩ sɩpaalaaraa kpaalɩŋ. Ma bɩ maga ma joŋ kpaal kala pɩba Iziral tinteeŋ lɛ. Mɩ-na nɛ jaŋ ŋaa ba kpaalɩŋ. 29Ba nɛ jaŋ tɩɩ mɩaa Wɩɩsʋlʋŋ kɩaa, wʋbɔŋŋɔɔ joŋo chɛnɩŋ Wɩɩsʋlʋŋ kɩaa, cheeriŋ Wɩɩsʋlʋŋ kɩaa arɩ kɩalɩŋ kala Iziral tɩŋŋaa sɩ kaa kʋ pɩ mɩ-na ba TƖƖNA. Ba kʋdiilee nɛ ŋɩɩ. 30Ma sɩ yie ŋaa ma bagɩsɩŋ kʋbumbumba-la a kaa kʋ ŋaa Wɩɩsʋlʋŋ arɩ kɩalɩŋ ma sɩ yie kaa kʋ ŋaa zile mɩ lɛ, Wɩɩsʋllɩ sɩpaalaaraa nɛ tɩɩba. Dɩ ma nɛ ŋaa kʋdiilee, ma maga ma laa sɩpaaŋ ŋaa pɩba nɛ, dɩ mɩ to ŋɩɩ lɛ a pɛ ma dɩa nɩaa kala lɛ. 31Wɩɩsʋllɩ sɩpaalaaraa bɩ maga ba chaŋ nammɩa kala, zaarʋ koo pʋna kala sɩ sʋʋ pimee koo baga kʋa sɩ kpʋa.
Právě zvoleno:
ƐZƖKƖƐL 44: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014
ƐZƖKƖƐL 44
44
Wɩalɩŋ sɩ mʋ tɩgɛ sɩpaalaara, Levi doho nɩaa arɩ Wɩɩsʋllɩ sɩpaalaaraa lɛ
1Ŋɩɩ nɛ baal-la mɩɩra kɛmmɛ kɔ Wɩa dɩɩ-bal-la harɩŋ boi-baal-la sɩ chaasɛ wɩɩpɔsʋŋ, dɩ ʋ tɔ. 2La TƖƖNA bʋla pɩmɛ, “Boi-baalɩŋ deeŋ maga dɩ ʋ tɔ chɩŋ nɛ. Ʋ bɩ maga ba suru. Nʋʋkala bɩ maga dɩ ʋ to nɩmɛ jʋʋ. Ʋ maga ʋ tɔ chɩŋ nɛ, bɛɛ wɩaa mɩ-na ma TƖƖNA Iziral tɩŋŋaa Wɩa to nɩmɛ nɛ a jʋʋ. 3Sɩpaalaarʋ-la dʋndʋŋa nɛ jaŋ wuo hɔŋ boi-la niiŋ a dii kɩaa mɩ-na ma TƖƖNA sɩpaaŋ. Ʋ maga ʋ to boiŋ niiŋ zawʋra-la tʋɔŋ a jʋʋ, aŋ bɩra to nɩmɛ a lɩɩ.”
4Ŋɩɩ nɛ baal-la kɛmmɛ to wɩɩpɔsʋŋ nagʋa dɩɩrɩŋ boi-baalɩŋ la kʋ chɩŋ Wɩa dɩɩ-bal-la sɩpaaŋ. Mɩ beŋ a na La TƖƖNA tʋla dɩ ʋ su ʋ dɩɩ-bal-la kala. Mɩ tuu tele chu.
5Ŋɩɩ nɛ La TƖƖNA bʋla pɩmɛ, “Nuhuobiiŋ, beŋ fii a jegili woruŋ a nɩɩ wɩalɩŋ kala mɩ sɩ jaŋ bʋla pɩŋ a mʋ tɩgɛ mɩ dɩɩ-bal-la wombiee ma sɩ jaŋ tuto lɛ. Ʋ maga ma jɩŋ nɩalɩŋ sɩ maga dɩ ba jʋʋ mɩ dɩɩ-bal-la arɩ nɩalɩŋ sɩ bɩ maga dɩ ba jʋʋ nɛ. 6Bʋla pɩ Iziral tɩŋŋaa sɩ bɩ dagɩŋ ka sɛɩ, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ bɩra bɩ jaŋ kɔ dɩ mɩ sɛɩ wʋkɩsɩa-la ma sɩɩ ŋaa. 7Ma kɛŋ nɩwogusuŋ sɩ bɩ mɩ ka to nɛ, a bɩ ba penee ma kere kʋ jʋʋ mɩ dɩɩ-bal-la a joŋ disiniŋ hɛ ʋ lɛ, bʋa-la lɛ ma sɩ yie joŋ pʋsʋŋ nʋʋŋ arɩ chalɩŋ sɩ ŋaa mɩ kʋdiilee a ŋaa Wɩɩsʋlʋŋ pɩmɛ. Ma chei nii-la sɩ hɛ mɩ dɩ ma pɛgɛ nɛ, a tɩŋ wʋkɩsɩa-la kala ma sɩ ŋaa wɩaa. 8Wɩalɩŋ kala sɩ maga dɩ ma nɛ ŋaa mɩ dɩɩ-bal-la lɛ a tɩŋ mɩ kɩaa sɩ bɩ disiniŋ kɛnɛ wɩaa, ma mɩɩra leŋ nɩwogusuŋ nɛ ŋɩŋaa. 9Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Nɩwogo kala sɩ bɩ mɩ ka to, a bɩ ʋ peniŋ ma kere bɩ maga ʋ jʋʋ mɩ dɩɩ-bal-la. Nɩwogusu-la ma sɩ paala guoli Iziral tɩŋŋaa tʋɔŋ bɩ maga dɩ ba jʋʋ.
10Mɩ jaŋ dɔgɩsɛ Levi doho nɩalɩŋ arɩ Iziral tɩmma-la sɩ vɩamɛ aŋ mʋ kpʋkpaarɛ vʋɩyaa. 11Ba jaŋ wuo tɩtɩŋ mɩ dɩɩ-bal-la boi-baalaa lɛ, a wuo kpʋkpʋ kʋnyɩgaa Wɩɩsʋlʋŋ pʋsʋŋ arɩ pʋsʋŋ dɔnsʋŋ nɩalɩŋ sɩ kaa kɔ a tɩmaa pɩba. 12Ama a tɩŋ ba sɩ laa Iziral tɩŋŋaa sɩpaaŋ a kpaarɛ ba vʋɩyaa pɩpɩba, a leŋ Iziral tɩŋŋaa ŋaa wʋbɔŋŋɔɔ, mɩ-na ma TƖƖNA Wɩɩjarɩbakɔ ŋmɩɛsa nɛ arɩ mɩ jaŋ dɔgɩsɛba. 13Ba bɩra bɩ jaŋ ŋaa Wɩɩsʋllɩ sɩpaalaaraa. Ba bɩra bɩ jaŋ digi mɩ kɩalɩŋ sɩ bɩ disiniŋ kɛnɛ, koo Wɩɩsʋlʋŋ kɩalɩŋ zɔmʋŋ sɩ bɩ magɩa kɛnɛ. Ba maga ba dii hɩɩsɩŋ nɛ a tɩŋ wʋkɩsɩa-la ba sɩ ŋaa wɩaa. 14Mɩ jaŋ jomba hɛ dɩ ba tɩtɩŋ tɩntɩmɩa-la dɔnsʋŋ kala sɩ hɛ mɩ dɩɩ-bal-la lɛ.
15Ama Levi tɩmma-la sɩ ŋaa Zadɔk doho nɩaa a ŋaa Wɩɩsʋllɩ sɩpaalaaraa, nɩalɩŋ sɩ to wʋtɩtɩɩ a tɩŋ mɩ dɩa-la tɩntɩŋŋaa bʋa-la lɛ Iziral tɩŋŋaa kala sɩ vɩamɛ, ba-na jaŋ chɩŋ mɩ sɩpaaŋ a joŋ Wɩɩsʋlʋŋ pʋsʋŋ nʋʋŋ arɩ chalɩŋ a ŋaa Wɩɩsʋlʋŋ pɩpɩmɛ. Mɩ-na ma TƖƖNA Wɩɩjarɩbakɔ nɛ bʋla. 16Ba dʋndʋŋa nɛ jaŋ jʋʋ mɩ dɩɩ-bal-la tʋɔŋ lee-la sɩ bɩ disiniŋ kɛnɛ. Ba dʋndʋŋa nɛ jaŋ kʋ chɩŋ mɩ koru-la sɩpaaŋ a tɩmaa pɩmɛ.
17Dɩ ba nɛ jʋʋ tʋɔŋ kaala-la boi-baalaa, ba maga ba laalɛ gɛrɩ-fʋfʋlaa nɛ, ba bɩ maga ba laalɛ gɛrɩ na-kala ba sɩ kɛŋ pie-pʋnaa ŋaa a tɩtɩŋ tʋɔŋ kaala-la boi-baala-la lɛ koo mɩ dɩɩ-bal-la tʋɔŋ. 18Ba maga ba joŋ gɛrɩ-fʋfʋlaa nyu-bɛllɩŋ a bɛ ba nyusuŋ, aŋ joŋ gɛrɩ-fʋfʋlɩa-la dɔnsʋŋ ma vɔɔ ba tɩnsɩŋ. Ba bɩ maga ba laalɛ kʋŋkala sɩ jaŋ leŋ dɩ ba suoli. 19Dɩ ba nɩɩ lɩɩ harɩŋ kaala-la, lee-la nɩalɩŋ sɩ hɛ, ba maga ba wuri gɛnnɩ-la ba sɩ laala tɩŋ mɩ sɩpaaŋ a bil dɩɩsɩ-la sɩ bɩ disiniŋ kɛnɛ lɛ nɛ, aŋ paa gɛrɩ-wogusuŋ laalɛ, dɩ nɩalɩŋ sɩ́ gɛnnɩ-la sɩ́ bɩ disiniŋ kɛnɛ digu dɩ wɩɩ ŋaa ba lɛ.
20Ba bɩ maga dɩ ba fʋŋ nyu-kpelliŋ koo a leŋ dɩ ba nyu-pʋnaa faasa waa. Ba maga ba kɩkɛ ba nyusuŋ nɛ. 21Wɩɩsʋllɩ sɩpaalaaraa kʋŋkala bɩ maga dɩ ʋ nyʋa girep nɛnɛɛ sɩnɩŋ dɩ ʋ nɛ kʋ jʋʋ tʋɔŋ kaala-la. 22Ba bɩ maga dɩ ba jaa yo-haal koo haal sɩ vɩa ʋ bala. Ba jaŋ wuo jaa Iziral tɩŋŋaa tolo sɩ bɩ baal jɩŋ koo ba Wɩɩsʋllɩ sɩpaalaaraa dɔŋɔ yo-haala. 23Ba maga ba dagɛ mɩ nɩaa kɩalɩŋ sɩ ŋaa mɩ-na Wɩa kɩaa a bɩ disiniŋ kɛnɛ arɩ kɩalɩŋ sɩ ŋaa nuhuobiine kɩaa, dɩ ba jɩŋ kɩalɩŋ sɩ kɛŋ disiniŋ arɩ kɩalɩŋ sɩ bɩ disiniŋ kɛnɛ bʋa. 24Dɩ kaalɛrɛ nɛ sie, Wɩɩsʋllɩ sɩpaalaaraa maga dɩ ba to mɩ wombie-la mɩ sɩ bile dɩ ba tuto nɛ a bʋl wɩɩ-la. Wombie-la mɩ sɩ bile dɩ baa to arɩ mɩ wʋdagaa kala sɩ mʋ tɩgɛ gbielisi-la mɩ sɩ lɩɩsa lɛ, ba maga ba to ba kala nɛ. Ba maga ba kɛŋ chɛ-wiesii-la dɩ ʋ ŋaa tapʋl zɔŋ nɛ.
25Wɩɩsʋllɩ sɩpaalaara bɩ maga ʋ digi sʋʋŋ a ŋaa disiniŋ hɛ ʋ tɩtɩa lɛ. Ama dɩ ʋ nyɩmma koo ʋ naaŋ nɛ, koo dɩ ʋ nanʋala koo ʋ tolo nɛ koo ʋ naambie koo ʋ dɩhaala ha sɩ bɩ bala jaa nɛ sʋba, ʋ jaŋ wuo digi. 26Dɩ ʋ nɛ digi sʋʋŋ dɩ ba pɩɩsɛ ʋ disiniŋ ta, ʋ maga ʋ gbɛrɛ tapʋlaa balɩpɛ nɛ. 27Tapʋlɩɩ-la ʋ sɩ jaŋ kʋ jʋʋ mɩ dɩɩ-bal-la tʋɔŋ kaala-la dɩ ʋ tɩŋ mɩ dɩɩ-bal-la sɩ bɩ disiniŋ kɛnɛ lɛ, ʋ maga ʋ ŋaa wʋbɔŋŋɔɔ joŋo chɛnɩŋ Wɩɩsʋlʋŋ a pɩ ʋ tɩtɩa nɛ. Mɩ-na ma TƖƖNA Wɩɩjarɩbakɔ nɛ bʋla.
28Mɩ kpaalɩŋ nɛ jaŋ ŋaa Wɩɩsʋllɩ sɩpaalaaraa kpaalɩŋ. Ma bɩ maga ma joŋ kpaal kala pɩba Iziral tinteeŋ lɛ. Mɩ-na nɛ jaŋ ŋaa ba kpaalɩŋ. 29Ba nɛ jaŋ tɩɩ mɩaa Wɩɩsʋlʋŋ kɩaa, wʋbɔŋŋɔɔ joŋo chɛnɩŋ Wɩɩsʋlʋŋ kɩaa, cheeriŋ Wɩɩsʋlʋŋ kɩaa arɩ kɩalɩŋ kala Iziral tɩŋŋaa sɩ kaa kʋ pɩ mɩ-na ba TƖƖNA. Ba kʋdiilee nɛ ŋɩɩ. 30Ma sɩ yie ŋaa ma bagɩsɩŋ kʋbumbumba-la a kaa kʋ ŋaa Wɩɩsʋlʋŋ arɩ kɩalɩŋ ma sɩ yie kaa kʋ ŋaa zile mɩ lɛ, Wɩɩsʋllɩ sɩpaalaaraa nɛ tɩɩba. Dɩ ma nɛ ŋaa kʋdiilee, ma maga ma laa sɩpaaŋ ŋaa pɩba nɛ, dɩ mɩ to ŋɩɩ lɛ a pɛ ma dɩa nɩaa kala lɛ. 31Wɩɩsʋllɩ sɩpaalaaraa bɩ maga ba chaŋ nammɩa kala, zaarʋ koo pʋna kala sɩ sʋʋ pimee koo baga kʋa sɩ kpʋa.
Právě zvoleno:
:
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014