Israelfɔ Ɩlʋ 73
73
Ɔwʋlʋ 3sɩ
Israel Ɩlʋ 73-89
Bulu Gyi Mɩ Ɔwʋnlɩn
Asaf kanfʋ-ɩlʋ.
1Lɛlɛ, Bulu bʋ awɩtɔlɛ ha Israelfɔ,
ha aha ánɩ́ amʋ́ ɩklʋntɔ lɛtɩn.
2Tamɛ mɩ mʋ́ a, ɩlasi hlɛ tɛkɩ natsa pan.
Ɩlasi tukuriibi, tɛkɩ nasrɛɩ dɩda.
3Tsufɛ ɩwɩ atsupʋ asʋn lɛpɛ mɩ ansɩ,
brɛá nowun ánɩ́ amʋ́ lalahɛ ɔma o, ɩdɛ alɛ wa ha amʋ́.
4Bʋmɛdɛ ipian kʋkʋ wun.
Awútɔ bʋ amʋ́ alɛ, bʋbʋ ɔwʋnlɩn.
5Asʋn tamatʋ amʋ́, fɛ aha atrahɛ.
Ɩkplan tamatʋ amʋ́ wa aba, fɛ aha bamba.
6Ɩwɩtsu gyi amʋ́ ɔmɛtɔ-atɔ,
owuntɔlɩn gyi amʋ́ tati dɩdahɛ.
7Bawa nfɔ, ha amʋ́ ansibi-aklambi ladalɩ hlɔtɩɩ.
Mimlala labʋla amʋ́ ɩklʋn.
8Bʋtɔbwɛ ɔblɔla, blɩ nyanyala.
Bʋtotsu ɩwɩ, sisi aha.
9Bʋtɛblɩ Bulu ɩwɩ abususʋ.
Amʋ́ asʋn blɩhɛ labʋla ɔsʋlʋsʋ.
10Mʋ́ sʋ Bulu aha bakpla buo amʋ́,
bʋmɛdɛ lalahɛ kʋkʋ wun amʋ́ ɩwɩ.
11Bʋdɛblɩ bɛɛ, “Bulu mɛ́ɛbɩ.
Ɔsʋsʋʋsʋ Mʋ Wie móowun.”
12Tamɛ kɩ, ɩwɩ lalwii aha lalahɛ anfɩ.
Togyitɔ ɩdɛ alɛ wa ha amʋ́.
13Kʋkʋ kpalɩ nawankɩ mɩ klʋntɔ,
fwɩ ɩbɩ lɛ lalahɛtɔ,
14tsufɛ faha ndɛ ipian wun ɔyɩkɛhɛtɔ fɛ́ɛ́.
Fʋtɛbɩtɩ mɩ ɩsʋ nyankɩgyinyankɩ.
15Nɩ mɩ ɛ ntɛblɩ asʋn lalahɛ alɩ a,
tɛkɩ mmɔwa ɔnɔkwalɩ ha fʋ abi-aná.
16Nɔbɔ mbɔdɩá nónu asʋn anfɩ asɩ,
tamɛ ɩlɛhɩɛ wa ɔnlɩn wa mɩ!
17Yɔfʋn ɛkɛá nɔyɔ fʋ otsiakpa,
asa nɛbɩ tɔá ɩbɔ́tʋ aha lalahɛ.
18Lɛlɛ, ɔsrɛɩkpa fɔpʋ amʋ́ lɩɩ.
Fʋtɛha bʋtɛdɩda, kʋsʋ ma amʋ́ ɩnʋ.
19Bʋtɔkɔsɩ ta,
ifu tɛkpa amʋ́ natɩ!
20Bʋgyi fɛ okudeá ɔha lakun tan mʋ́sʋ ɔyɩkɛhɛ nyankɩ.
O mɩ Wie, fɔkʋsʋ fʋtamakaɩn amʋ́sʋ.
21Brɛá mɩ klʋn lɔtɔ mɩ,
ɩlɔhɔ mɩ ɔsɩn a,
22nemimla, mmeyin tɔtɔ.
Nemli fɛ ɔbwɩ fʋ ansɩtɔ.
23Tamɛ fʋmɔkʋdamli ɔma ha mɩ kɩ.
Fʋdɛ mɩ gyɔpɩ ɩbɩ.
24Fʋtɔpʋ fʋ atosunahɛ kpa mɩ.
Mʋ́ ɔma a, fɔ́hɔ mɩ wa numnyamtɔ.
25Mma ɔhaa ɔsʋsʋ ɩnʋ dʋn fʋ.
Mmehian tɔtɔ ɔsʋlʋ anfɩsʋ tsɩa fʋtɔ.
26Nɩ nɔpɔn, ɔyɩtɔ ɩkpɔn mɩ o a,
Bulu gyi mɩ ɔwʋnlɩn
pʋ́ mɩ ogyikpa brɛ fɛ́ɛ́tɔ.
27Lɛlɛ, aha ánɩ́ bawa ɩfɔ fʋ ɩwɩ bɔ́fwɩ.
Kɩ, fɛ́lɛ aha ánɩ́ badalɩ fʋ ɔma fɛ́ɛ́ ɩnʋ.
28Tamɛ ɩbʋ mɩ alɛá nétsia Bulu wa.
Mɩ Wie Nana Bulu napʋbwɛ mɩ ɔtanʋkpa.
Nɛ́bla aha mʋ gyumagyihɛ fɛ́ɛ́.
Právě zvoleno:
Israelfɔ Ɩlʋ 73: nko
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation