KUZOYA 1
TAITA
1
Kuumbwa kwa wurumwengu
1Aho kuzoenyi, Mlungu oreumbieghe mlungunyi na ndoenyi. 2Ndoenyi ndekorekoghe na fwana ingi, angu kilambo chingi. Kira cherekoghe aighu ya machi ghimilie, na Roho wa Mlungu ukakaia ukisela-sela aighu ya machi. 3Mlungu ukaghamba, “Mwengere ndeghukaie”, na mwengere ghukakaia.#2 Wakor. 4.6 4Mlungu ukawona angu ghwaboie; ukaghutanya mwengere na kira. 5Mwengere ukaghuwanga, “Dime” na kira ukachiwanga “Kio”. Kukakaia nakenyi, kukakaia nakesho, ituku ja imbiri.
6Mlungu ukaghamba, “Mawingu ndeghikaie ghadi na ghadi ya machi, ghighiwaghanye mafungu awi.”#2 Pet. 3.5 7Mlungu ukabonya mawingunyi, nao ukaghitanya agho machi gherekoghe mawingunyi nandonyi na agho gherekoghe mawingunyi naighu. Nao ikakaia wokoni. 8Nao Mlungu ukakuwanga aho mawingunyi, “Mlungunyi.” Kukakaia nakenyi, kukaia nakesho, ituku ja kawi.
9Mlungu ukaghamba, “Machi ghiko mlungunyi nandonyi ndeghitumbanyike chiaimweri, na ndoe iomie iwoneke.” Nao ikakaia wokoni. 10Mlungu ukawanga andu kuomie “Ndoenyi,” na agho machi gheretumbanyikieghe ukaghiwanga, “Bahari.” Mlungu ukawona angu vaboie. 11Niko Mlungu ukaghamba, “Ndoe ndeibuse midi, miwalwa ifunyagha mbeu, na midi ya matunda ghiko na mbeu, kula mudi ghwa mbari yaro.” Nao ikakaia wokoni. 12Ndoe ikabusa midi, miwalwa ifunyagha mbeu kwa vichuku varo, na midi ivagha matunda ghiko na mbeu raro andenyi, kula ghumu kwa mbari yaro. Mlungu ukawona angu vaboie na ndighi. 13Kukakaia nakenyi, kukakaia nakesho, ituku ja kadadu.
14Mlungu ukaghamba, “Miengere ndeikaie aighu mawingunyi, ipate kutanya kio na dime, na kuwonyera alama, vimu, matuku, na miaka; 15nayo ikaie aighu mawingunyi, ilangalishireghe ndoenyi.” Nao ikakaia wokoni. 16Nao Mlungu ukabonya miengere mibaa iwi, ugho mwengere m'baa ghuibonyere dime nguma, na ugho mtini ghubonyere kio nguma, ukabonya na nyerinyeri wokoni. 17Mlungu ukaiwika iyo miengere aighu mawingunyi gha mlungunyi, ipate kuilangalishira ndoenyi, 18ibonye nguma na dime hata na kio wori, nayo itanye mwengere na kira. Nao Mlungu ukawona angu vaboie. 19Kukakaia nakenyi, kukaia nakesho, ituku ja kana.
20Mlungu ukaghamba, “Machi ndeghichuo nyamandu riko moyo kwa wungi, na nyonyi nderiburuke aighu ya ndoenyi, mbeonyi.” 21Mlungu ukaumba nyamandu mbaa reobosha ra machinyi, na ivo vose viko moyo vighendagha andenyi machinyi kwa mbari raro, na nyonyi ra mbari rose. Mlungu ukawona angu vaboie. 22Nao ukavirasimia ukaghamba, “Venyi mchurikie mchuo baharinyi, na nyonyi nderichurikie ndoenyi.” 23Kukakaia nakenyi, kukaia nakesho, ituku ja kasanu.
24Mlungu ukaghamba, “Ndoe ndeifunye nyamandu riko moyo kwa mbari raro, mfugho rose na shimandu riavuagha, na nyamandu ra mbari rose ra isakenyi.” Nao ikakaia wokoni. 25Nao Mlungu ukabonya nyamandu ra mbari rose ra isakenyi, na mfugho kwa mbari raro, na kula shimandu iavuagha andoenyi kwa mbari raro. Mlungu ukawona vose kukaia vaboie.
26Niko Mlungu ukaghamba, “Ndedim'bonye mdamu kwa fwana yedu cheni, ufwanane na isi, wipate kukaia na nguma aighu ya samaki ra baharinyi na aighu ya nyonyi ra mbeonyi; aighu ya mfugho rose, na aighu ya ndoenyi kose putu, na kula shimandu iavuagha andoenyi.”#1 Wakor. 11.7 27Nao Mlungu ukaumba mdamu kwa fwana yake cheni, kwa fwana ya Mlungu ukawiumba mundu wa womi na wa waka.#Mat. 19.4; Mk. 10.6#Kuz. 5.1-2 28Mlungu ukawirasimia ukaghamba, “Venyi mchurikie, mchure ndoenyi kose, nayo muibonyere nguma, mkaie na nguma aighu ya samaki ra baharinyi, na nyonyi ra mbeonyi, na kula nyamandu iko ndoenyi kose.” 29Nao Mlungu ukaghamba, “Olenyi namneka midi yose ivagha mbeu iko ndoenyi, na kula mudi ghuko na mbeu andenyi ya matunda gharo, vikaie vindo venyu. 30Na nyamandu rose riko ndoenyi, nyonyi ra mbeonyi na kula shimandu iavuagha andoenyi, kula kilambo chiko na miruke ya irangi, navineka nyasi na malemba mawishi kukaia vindo.” Nao ikakaia wokoni. 31Mlungu ukazighana kula kilambo uchibonyere, nao ola ukawona vose vaboie na ndighi. Kukakaia nakenyi, kukakaia nakesho, ituku ja karandadu.

©Bible Society of Kenya, 1997

All rights reserved.

Zjisti více o Biblia Ilagho Jiboie Kwa Wandu Wose