ꠁꠘ꠆ꠎꠤꠟ ৬: ꠞꠥꠝꠣꠘ 10
10
1ꠔꠦ ꠅ ꠜꠣꠁ ꠅꠇꠟ, ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠀꠝꠣꠞ ꠖꠤꠟꠞ ꠅꠃ ꠚꠞꠤꠀꠖ ꠀꠍꠦ, ꠀꠝꠤ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ ꠇꠞꠤꠀꠞ, ꠔꠣꠞꠣ ꠎꠣꠘꠥ ꠘꠣꠎꠣꠔ ꠙꠣꠁꠘ। 2ꠔꠣꠞꠣꠞ ꠛꠦꠙꠣꠞꠦ ꠀꠝꠤ ꠅꠈꠣꠘꠃ ꠇꠁꠞꠣꠝ, ꠔꠣꠞꠣꠞ ꠝꠘꠞ ꠝꠣꠎꠦ ꠀꠟ꠆ꠟꠣꠞ ꠄꠡꠇꠤ ꠀꠍꠦ, ꠅꠁꠟꠦ ꠔꠣꠞꠣ ꠎꠣꠘꠦ ꠘꠣ, ꠀꠟ꠆ꠟꠣꠞ ꠖꠞꠛꠣꠞꠅ ꠇꠦꠝꠘꠦ ꠙꠞꠦꠎꠉꠣꠞ ꠛꠘꠣ ꠎꠣꠄ। 3ꠀꠟ꠆ꠟꠣꠞ ꠖꠞꠛꠣꠞꠅ ꠛꠦ-ꠇꠍꠥꠞ ꠈꠣꠟꠣꠍ ꠅꠀꠞ ꠙꠕ ꠘꠣ ꠎꠣꠘꠣꠄ, ꠔꠣꠞꠣ ꠁ ꠙꠕꠞꠦ ꠝꠣꠘꠍꠦꠅ ꠘꠣ, ꠔꠣꠞꠣ ꠈꠣꠟꠤ ꠡꠞꠤꠅꠔ ꠀꠝꠟ ꠇꠞꠤꠀ ꠙꠞꠦꠎꠉꠣꠞ ꠛꠘꠔ ꠌꠣꠄ। 4ꠅꠃ ꠡꠞꠤꠅꠔꠞ ꠢꠇꠟ ꠖꠣꠛꠤ-ꠖꠣꠅꠀ ꠀꠟ-ꠝꠍꠤꠄ ꠔ ꠀꠖꠣꠄ ꠇꠞꠤꠟꠍꠂꠘ, ꠄꠞꠟꠣꠉꠤ ꠔꠣꠘ ꠃꠙꠞꠦ ꠎꠦꠞꠣ ꠁꠝꠣꠘ ꠀꠘꠦ, ꠀꠟ꠆ꠟꠣꠞ ꠖꠞꠛꠣꠞꠅ ꠔꠣꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣ ꠅꠄ।
ꠀꠟ꠆ꠟꠣꠁ ꠘꠣꠎꠣꠔꠞ ꠛꠦꠛꠡ꠆ꠔꠣ ꠢꠇꠟꠞ ꠟꠣꠉꠤ
5ꠡꠞꠤꠅꠔ ꠀꠝꠟ ꠇꠞꠤꠀ ꠀꠟ꠆ꠟꠣꠞ ꠖꠞꠛꠣꠞꠅ ꠙꠞꠦꠎꠉꠣꠞ ꠅꠀꠞ ꠛꠦꠙꠣꠞꠦ, ꠢꠎꠞꠔ ꠝꠥꠍꠣꠄ ꠔꠃꠞꠣꠔ ꠇꠤꠔꠣꠛꠅ ꠟꠦꠈꠍꠂꠘ, “ꠎꠦꠞꠣ ꠡꠞꠤꠅꠔ ꠝꠣꠘꠔ ꠌꠣꠄ, ꠔꠣꠞꠣ ꠙꠥꠞꠣꠙꠥꠞ ꠝꠣꠘꠟꠦ ꠛꠣꠌꠤꠛ।” 6ꠀꠞ ꠁꠝꠣꠘꠞ ꠛꠟꠦ ꠝꠣꠘꠥꠡ ꠇꠤꠟꠣ ꠀꠟ꠆ꠟꠣꠞ ꠖꠞꠛꠣꠞꠅ ꠙꠞꠦꠎꠉꠣꠞ ꠛꠘꠦ ꠁ ꠛꠦꠙꠣꠞꠦ ꠀꠟ꠆ꠟꠣꠞ ꠇꠣꠟꠣꠝꠅ ꠟꠦꠈꠣ ꠀꠍꠦ, “ꠝꠘꠦ ꠝꠘꠦ ꠇꠁꠅ ꠘꠣ, ꠇꠦ ꠉꠤꠀ ꠀꠍꠝꠣꠘꠅ ꠃꠑꠤꠔ?” ꠄꠞ ꠝꠣꠘꠤ ꠅꠁꠟ, ꠢꠘꠅ ꠃꠑꠤꠀ ꠀꠟ-ꠝꠍꠤꠞꠦ ꠟꠣꠝꠣꠁꠀ ꠀꠘꠔ। 7ꠛꠣ ꠁꠈꠣꠘꠅ ꠇꠁꠅ ꠘꠣ, “ꠇꠦ ꠉꠤꠀ ꠙꠣꠔꠣꠟꠅ ꠟꠣꠝꠔ?” ꠄꠞ ꠝꠣꠘꠤ ꠅꠁꠟ, ꠢꠘꠅ ꠟꠣꠝꠤꠀ ꠀꠟ-ꠝꠍꠤꠞꠦ ꠇꠄꠛꠞ ꠕꠣꠇꠤ ꠔꠥꠟꠤꠀ ꠀꠘꠔ। 8ꠘꠣ ꠁꠟꠣ ꠇꠥꠘ꠆ꠔꠣ ꠘꠣꠄ, ꠇꠣꠞꠘ ꠟꠦꠈꠣ ꠀꠍꠦ, “ꠀꠍꠟꠦ ꠀꠟ꠆ꠟꠣꠞ ꠇꠣꠟꠣꠝ ꠔ ꠔꠥꠝꠣꠞ ꠈꠥꠛ ꠗꠣꠞꠅ ꠀꠍꠦ, ꠁꠔꠣ ꠔꠥꠝꠣꠞ ꠝꠥꠈꠅ ꠀꠞ ꠔꠥꠝꠣꠞ ꠖꠤꠟꠅ ꠀꠍꠦ।” ꠀꠞ ꠀꠝꠞꠣ ꠎꠦꠔꠣ ꠔꠛꠟꠤꠉ ꠇꠞꠞꠣꠝ, ꠁꠔꠣꠃ ꠔ ꠢꠃ ꠇꠣꠟꠣꠝ। 9ꠅꠈꠘ ꠔꠥꠝꠤ ꠎꠥꠖꠤ ꠝꠥꠈꠦ ꠡ꠆ꠛꠤꠇꠣꠞ ꠇꠞ ꠢꠎꠞꠔ ꠁꠍꠣꠃ ꠝꠣꠟꠤꠇ, ꠀꠞ ꠖꠤꠟꠦ ꠄꠇꠤꠘ ꠇꠞ, ꠀꠟ꠆ꠟꠣꠄ ꠔꠣꠘꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠔꠦ ꠔꠥꠝꠤ ꠀꠈꠦꠞ ꠙꠣꠁꠛꠣꠄ। 10ꠇꠣꠞꠘ ꠖꠤꠟꠦ ꠁꠝꠣꠘ ꠀꠘꠟꠦ ꠀꠟ꠆ꠟꠣꠄ ꠝꠣꠘꠡꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠂꠘ, ꠀꠞ ꠝꠥꠈꠦ ꠡ꠆ꠛꠤꠇꠣꠞ ꠇꠞꠟꠦ ꠀꠟ꠆ꠟꠣꠄ ꠘꠣꠎꠣꠔ ꠖꠣꠘ ꠇꠞꠂꠘ। 11ꠀꠟ꠆ꠟꠣꠞ ꠇꠣꠟꠣꠝꠦ ꠛꠣꠔꠣꠄ, “ꠎꠦ ꠎꠘꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠛ, ꠢꠦ ꠇꠥꠘꠥꠝꠘ꠆ꠔꠦꠃ ꠡꠞꠝꠤꠘ꠆ꠖꠣ ꠅꠁꠔ ꠘꠣꠄ।” 12ꠛꠘꠤ ꠁꠍꠞꠣꠁꠟ ꠅꠃꠇ ꠛꠣ ꠜꠤꠘ ꠎꠣꠔꠤ ꠅꠃꠇ, ꠄꠞꠣꠞ ꠝꠣꠎꠦ ꠇꠥꠘꠥ ꠔꠚꠣꠔ ꠘꠣꠁ, ꠇꠣꠞꠘ ꠢꠇꠟꠞ ꠝꠣꠟꠤꠇ ꠔ ꠄꠇꠎꠘ। ꠎꠦ ꠝꠣꠘꠡꠦ ꠀꠟ꠆ꠟꠣꠞ ꠘꠣꠝ ꠟꠄ, ꠀꠟ꠆ꠟꠣꠄ ꠔꠣꠞꠦ ꠛꠃꠔ ꠝꠦꠢꠦꠞꠛꠣꠘꠤ ꠇꠞꠂꠘ। 13ꠀꠟ꠆ꠟꠣꠞ ꠇꠣꠟꠣꠝꠦ ꠔ ꠇꠄ, “ꠎꠦꠇꠥꠘꠥ ꠝꠣꠘꠡꠦ ꠝꠣꠛꠥꠖꠞ ꠘꠣꠝꠦ ꠒꠣꠇꠤꠟꠦ, ꠢꠦ ꠘꠣꠎꠣꠔ ꠢꠣꠍꠤꠟ ꠇꠞꠛ।”
14ꠅꠁꠟꠦ ꠎꠣꠘ ꠃꠙꠞꠦ ꠔꠣꠞꠣ ꠁꠝꠣꠘꠃ ꠀꠘꠍꠦ ꠘꠣ, ꠔꠣꠘꠞꠦ ꠇꠤꠟꠣ ꠒꠣꠇꠤꠛ? ꠀꠞ ꠎꠣꠘ ꠛꠦꠙꠣꠞꠦ ꠔꠣꠞꠣ ꠢꠥꠘꠍꠦꠃ ꠘꠣ, ꠔꠣꠘ ꠃꠙꠞꠦ ꠁꠝꠣꠘ ꠀꠘꠛ ꠇꠤꠟꠣ? ꠔꠛꠟꠤꠉ ꠇꠞꠞꠣ ꠘꠣ ꠕꠣꠇꠟꠦ, ꠔꠣꠞꠣ ꠢꠥꠘꠛ ꠇꠤꠟꠣ? 15ꠀꠞ ꠔꠛꠟꠤꠉꠅ ꠇꠦꠃ ꠘꠣ ꠙꠣꠑꠣꠁꠟꠦ, ꠔꠣꠞꠣ ꠇꠤꠟꠣ ꠔꠛꠟꠤꠉꠅ ꠎꠣꠁꠛ? ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝꠅ ꠛꠣꠔꠣꠁꠟ ꠅꠁꠍꠦ, “ꠗꠁꠘ꠆ꠘ ꠔꠣꠞꠣꠞ ꠙꠣꠅ ꠈꠣꠘꠣꠁꠘ, ꠎꠦꠞꠣ ꠀꠐꠤ ꠀꠐꠤ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠂꠘ।” 16ꠅꠁꠟꠦ ꠢꠇꠟ ꠝꠣꠘꠡꠦ ꠔ ꠁ ꠈꠥꠡ-ꠈꠛꠞꠤꠞꠦ ꠇꠣꠘꠅ ꠑꠣꠁ ꠖꠦꠄ ꠘꠣ। ꠢꠎꠞꠔ ꠁꠡꠣꠄꠀ ꠘꠛꠤꠄ ꠇꠁꠍꠂꠘ, “ꠅ ꠝꠣꠛꠥꠖ, ꠀꠝꠞꠣꠞ ꠔꠛꠟꠤꠉ ꠢꠥꠘꠤꠀ ꠇꠦ ꠁꠝꠣꠘ ꠀꠘꠍꠦ?” 17ꠔꠦ ꠖꠦꠈꠣ ꠎꠣꠞ, ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠟꠦ ꠁꠝꠣꠘ ꠀꠄ, ꠅꠃ ꠇꠣꠟꠣꠝ ꠅꠁꠟ, ꠀꠟ-ꠝꠍꠤꠞ ꠛꠦꠙꠣꠞꠦ ꠔꠛꠟꠤꠉ।
18ꠅꠁꠟꠦ ꠀꠝꠤ ꠇꠁꠞꠣꠝ, ꠛꠘꠤ ꠁꠍꠞꠣꠁꠟ ꠅꠇꠟꠦ ꠁ ꠇꠣꠟꠣꠝ ꠢꠥꠘꠍꠦ ꠘꠣ ꠘꠤ? ꠘꠤꠌ꠆ꠌꠄ ꠢꠥꠘꠍꠦ। ꠙꠣꠇ ꠇꠣꠟꠣꠝꠦ ꠇꠄ,
ꠔꠣꠞꠣꠞ ꠀꠅꠀꠎ ꠔ
ꠢꠣꠞꠣ ꠖꠥꠘꠤꠀꠁꠔ ꠍꠤꠔ꠆ꠞꠤ ꠉꠦꠍꠦ,
ꠍꠤꠔ꠆ꠞꠤ ꠉꠦꠍꠦ ꠔꠣꠞꠣꠞ ꠝꠣꠔ-ꠇꠕꠣ,
ꠖꠥꠘꠤꠀꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣ ꠙꠞ꠆ꠎꠘ꠆ꠔ।
19ꠀꠝꠤ ꠢꠤꠞꠛꠣꠞ ꠇꠁꠞꠣꠝ, ꠛꠘꠤ ꠁꠍꠞꠣꠁꠟꠦ ꠢꠃ ꠇꠣꠟꠣꠝ ꠛꠥꠎꠍꠂꠘ ꠘꠣ ꠘꠤ? ꠘꠤꠌ꠆ꠌꠄ ꠛꠥꠎꠍꠂꠘ, ꠀꠟ꠆ꠟꠣꠄ ꠔ ꠢꠎꠞꠔ ꠝꠥꠍꠣ ꠘꠛꠤꠞ ꠝꠣꠎꠖꠤ ꠔꠣꠞꠣꠞꠦ ꠇꠁꠍꠂꠘ,
ꠎꠦꠐꠣ ꠎꠣꠔꠤ ꠘꠣꠁ ꠁꠟꠣ ꠎꠣꠔꠤ ꠖꠤꠀ ꠁꠋꠡꠣ ꠇꠞꠣꠁꠝꠥ,
ꠀꠝ꠆ꠝꠇ ꠎꠣꠔꠤ ꠖꠤꠀ ꠔꠣꠞꠣꠞ ꠉꠥꠍꠣ ꠔꠥꠟꠣꠁꠝꠥ।
20ꠛꠣꠖꠦ ꠁꠡꠣꠄꠀ ꠘꠛꠤꠄ ꠈꠥꠛ ꠡꠣꠅꠡ ꠇꠞꠤꠀ ꠁ ꠀꠄꠀꠔꠅ ꠇꠁꠍꠂꠘ,
ꠀꠝꠣꠞꠦ ꠎꠦꠞꠣ ꠔꠣꠟ꠆ꠟꠣꠡ ꠇꠞꠍꠦ ꠘꠣ,
ꠔꠣꠞꠣꠃ ꠀꠝꠣꠞꠦ ꠙꠣꠁꠍꠦ।
ꠀꠝꠣꠞ ꠉꠦꠍꠦ ꠎꠦꠞꠣ ꠇꠥꠘ꠆ꠔꠣ ꠌꠣꠁꠍꠦ ꠘꠣ,
ꠔꠣꠞꠣꠞꠦ ꠀꠝꠤ ꠖꠤꠖꠣꠞ ꠖꠤꠍꠤ।
21ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠛꠦꠙꠣꠞꠦ ꠔꠣꠁꠘ ꠇꠁꠞꠣ,
ꠀꠝꠤ ꠀꠔ ꠛꠣꠠꠣꠁꠀ ꠒꠣꠇꠤꠞꠣꠝ,
ꠢꠣꠞꠣ ꠖꠤꠘ ꠗꠞꠤ ꠖꠥꠁꠅ ꠀꠔꠦ ꠒꠣꠇꠤꠞꠣꠝ,
ꠘꠣꠚꠞꠝꠣꠘ ꠀꠞ ꠙꠣꠡꠣꠘ ꠄꠇ ꠎꠣꠔꠤꠞꠦ ꠒꠣꠇꠤꠞꠣꠝ।
Právě zvoleno:
ꠁꠘ꠆ꠎꠤꠟ ৬: ꠞꠥꠝꠣꠘ 10: sylN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Ahle Kitab Society. All rights reserved.