Itorati 8
8
Ilhapo yo urera inohalha inyu ukhalhelha
1“Nttwareke iamuri chonkhaye chinouvahaakani lhelho chilha, nttwareke rata wiira nkhalhe akumi ni wunchereria, wiira mwakelhe ni ukhalhelha ilhapo inouvaha ayani Apwiiya Nlhuku inyu, yaalhenhe aya manyaapwiiya inyu wiira anowaavaha. 2Muupuwelheke chenre aya Apwiiya Nlhuku inyu, wo uholhelhani nkwaha wo urekama ulhe, vaavira inyu uthakoni iyaakha makhumi ncheshe, wiira otimarihekeni ni ulhikachani wiira achuwelhe choopuwelha inyu mmamirimani mwinyu, ni yakhalhaka mwanvarechesha malhehero aya, ama kuhiwe. 3Ahoupangani wiira mwiitimarikhe, nkoohiyani wiira mmwolhiye ithalha, ni kaanyuma aya ahoovahani imana wiira nlhieke, yoolhia yaari inyu nhichuwelhaka, mena manyaapwiiya inyu khayaachuwenlhe. Enre chiicho wiira owiittuchiheni wiira, Ntu khanolhama wo nkatte vekha, nansho wo nlhove ninohimiya ni Nlhuku. 4Chechiyo iyaakha makhumi ncheshe chiyo, ikuwo chinyu khachaathakhanlhe, mena mieto chinyu khacheepilhe. 5Ni vavawo, muupuwelheke wiira, Apwiiya Nlhuku inyu, anowookolhani thoko naangoro chinomwookolha awe mwaamwanawe. 6Paahi etu, nvarechesheke iamuri cha Apwiiya Nlhuku inyu, wiira nttware iphiro chaya ni waathimicha yayo. 7Apwiiya Nlhuku inyu, anouwiihani urii ilhapo yorera, ilhapo yo mashepa ni marapo, yo maashi anokhuma umiakoni ni umakooteni, 8ilhapo unolhimiya ingaano ni ishayiri, izabibu, ikhuyu, ikomamanga, izeituni ni waakiya urawo. 9Wowo nnokoopatta choolhia chinchi, ni mena khannowukuwelhiya ittu. Mialha chaya cho iyuuma, ni umiakoni waya nnowooria uthipa ishaaba. 10Nnokoolhia ni urupalhacha, ni nnokowaashukuru Apwiiya Nlhuku inyu, wo ilhapo yorera anouvaha ayani.
Waamukiya mwaha wo waalhiyalha Apwiiya Nlhuku
11“Mwoonechesheke wiira, khannaalhiyalha Apwiiya Nlhuku inyu, wo uhiya uvarechesha iamuri chaya, ikano chaya ni malhehero aya, anolhehera aka uwannyu lhelho alha. 12Mwalhiaka ni urupalha, nkamwaathekacha manupa orera, ni ukhalha mwommo, 13ni ikatema ing'ope ni ikhondoro chinyu, idhahabu ni isiliva chinyu ni kila ittu irina inyu vanohalha aya wunchereria, 14nhikelhiye itiyamaru ni waalhiyalha Apwiiya Nlhuku inyu, othamihilheni ukhuma ilhapo yo Umisri, waari inyu ipotta. 15Phi yayo oholhenlheni uthako muulhupalhe wo woopiha ulhe, wo inwaa cho uhapalha ni makharang'andha, ilhapo yo nttona no maashi ilhe, ahoukumiherani maashi ukhuma vamwalhani. 16Tho, phi yayo olhinheni imana uthakoni, yolhia manyaapwiiya inyu yahaachuwenlhe aya. Enre yayo onkhaye wiira, otimarihekeni ni ulhikachani, ophimeni, awe oovahani moombone vanomalhelha aya. 17Paahi etu, mwiishungeke, nhiwe mweeracha mmamirimani mwinyu wiira, ‘Nipantte nhakhu wo wooria ni machiri ihu naashinene.’ 18Muupuwelheke wiira, Apwiiya Nlhuku inyu, phi nowoorihani upatta nhakhu. Anopanga chiicho wo nlhatu no uhimiechesha malhehano aapannge aya ni manyaapwiiya inyu mpaka lhelho va. 19Nansho mwaalhiyalhaka Apwiiya Nlhuku inyu, ni uttwara milhuku chikina, wiira nkavihere ni uthimicha, kinowaamukani chinene lhelho va wiira wo ikekhiaye nnookhwa. 20Mwaaharumelhelheke Apwiiya Nlhuku inyu, nnookhwa thoko makosho anaalhakalhiha aya umihoolho winyu.
Právě zvoleno:
Itorati 8: MOT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
The Bible Version in Makua @The Word for The World International and Makua Language translators. All rights reserved.