Ekihsatahs 34
34
Kishemanitoo Kii'oshipii'iketc I'imaa Napakaapihkahsiniink
1Miitahsh o'o Moosihs (Moses) kaa'ikotc kaaTipencikenitc, “Oshi' niishin napakaapihkahsiniik taapishkoo kaakii ishinaakosiwaahpan nihtam kaakii ayaawaatc, miinawaa tahsh niwii oshipii'aanan ihkitowinan kaakii ayaakipaniin i'imaa nihtam napakaapihkahsiniink kaakii pikishkihshimatwaa. 2Waapank kishepaawakahk hsa kiishiihtaahkan cipi ahkwaamaciweyan o'o kihci waciw Saainai (Sinai). Mii hsa tahsh weti keshi nakishkawiyan wakici waciink. 3Kaawiin hsa awiya kika pi wiiciiwikohsii piahkwaamaciweyan, kaawiin kaye awiya tawaapancikaniwihsii i'imaa kihci waciink. Kaawiin kaye maanahcaanihshak, pishihkiwak taontancikehsiiwak i'imaa kaashi maaciiyaamatinaanik,” okii'ikoon. 4Miihsh Moosihs kaakii oshi'aatc niishin napakaapihkahsinii' ekii ishi'aatc taapishkoo nihtam kaakii ishinaakosinihpan. Wiipa tahsh kikishep kiiahkwaamaciwe i'i kihci waciw Saainai ekii ishihciketc kaakii'ikotc kaaTipencikenitc. Okii ahkwaamaciwewinaa' tahsh kaye i'i niishin napakaapihkahsinii'.
5Kiihpi naashiiwan itahsh kaaTipencikenitc wahkwiink ekiih pi ayaanitc, ekii wiicikaapawihtakootc Moosihs. Miitahsh i'i kaakii wiintaminitc owiinsowinini kaakohtaanentaakwaninik, kaaTipenciketc, ekii ishi wiintaminitc. 6#Exo 20.5,6; Num 14.18. Miihsh kaaTipencikenitc kaakiih pimi ayaanitc eshi'ayaatc Moosihs ekii ihkitonitc, “Niin hsa kaakihtenimintc kaaTipenciketc, kaaKishemanitoowitc, kaakoohpaasinaaketc, kaaminotootaaketc kaye, aahpici kaye nimpecikitaas, paahtiinatin kaye kaataapitawentaakwahk nisaaki'iwewin, i'i kaye nintepweyentaakosiwin. 7Ninka minotootawaak kaye iki kaapaahtiinowaatc kaa‑ayaanihke nihtaawiki'itiwaatc. Nimpoonentaanan kaye maci'aya'iin, macitootamowinan kaye. Kaawiin tahsh ninka aaswenaahsiik cinana'ahsakwaa apinoonciishak, oyooshihsimaak kaye, i'i onci kaakii ishi macitootaminitc oyoohsiwaa' nihsink komaa kaye niiwink kaapii ontahkaanesiwaatc,” okii'ikoon.
8Miihsh Moosihs wewiip kaakii animihkohtaatc mihtahkamik ekii anami'aatc. 9Miihsh o'o kaaihkitotc, “Tepencikeyan, kiishpin tepwe menwaapamiwanen taka hsa kaaTipenciketc taishaa mekweya'ii kaashi ayaanitc pemaatisinitc. Aanawiin eshashiipihtaminitc, mii ishi poonentamawihshinaam maci'aya'iink onci, nimacitootamowininaanin kaye. Otaahpinihshinaam tahsh niinawint citipenimiyaank,” kii‑ihkito.
Ahshotamaakewin Kii'oshihcikaatek
10KaaTipencikenitc itahsh Moosihs okii'ikoon, “Inashke niwii oshihtoon eshi ahshotamaawakwaa. Eshi ayaawaatc pemaatisiwaatc niwiih tootaanan maamahkaacihcikewinan mahshi wiihkaa kaapi toocikaatehsinokin, wiihkaa kaye pemitoocikaatehsinokin eshi'ayaawaatc kaapepahkaanwewaanakisiwaatc pemaatisiwaatc. Kahkina hsa pemaatisiwaatc kewiicitaamekwaa oka waapantaanaawaa aaniin ehpiihci kohtaanentaakwaninik kaawiih tootamowak. Niin kaaTipenciketc o'o kaawiih tootamawinakook. 11Kehcinaac hsa tootamok kaa'ininakook noonkom kaakiishikahk. Niin hsa ko ninka maacii'aama'waak, Emorii (Amorites) kaatinowiwaatc, kaye Kenan (Canaanites), Heht (Hittites), Perisii (Perizzites), Kipii (Hivites), Ciipas (Jebusites) kaye kaatinowiwaatc. 12Ayaankwaamisik itahsh ci‑inaahsiwekwaa cimino wiiciiwekwaa weti ahkiink kaawii ishaayek, maakishaa mii 'iwe nahke keshi kaahcici'inekwaa keshi maanshipininekwaa. 13Tekwac itahsh o'o kika ishihcikem. Kika piikopitaawaam eshi pakitinaahsowaatc, kika piihsa'omaawaa' kaye i'i kaakihtenimaawaatc ahsinii' petahkisonitc, kika kiishka'omaawaa' kaye mihtikoo' wenci kihkinawaasinaakosinitc i'i ihkwewi manitoohkaanan Aahsharah (Asherah) ecikaniwinitc.”
14“Keko anami'ehtawaahkekwaanik pahkaan manitoohkaanak, niin iitok kaaTipencikeyaan, eshinihkaanikooyaan kaaontentank, niin Kishemanitoo kaaontentamaan. 15Ayaankwaamisik ci‑inaahsiwekwaa cimino wiiciiwekwaa iki o'omaa ahkiink kaaishitaawaatc. Mii iitok eshihcikewaatc enooci'aawaatc omanitoomiwaa'. Mii hsa 'iwe enentaakwaninik taapishkoo epihshikwaacihcikewaatc. Miihsh kaye eshihcikewaatc ehpakitinaahsoohtamawaawaatc. Maakishaa tahsh kika antomikowaak ciahshaminekwaa miicim kaapakitinaahswaakewaatc. 16Kiishpin itahsh kaye otaahpinimek otaanihsiwaa' kewiiwiwaatc kikosihsiwaak, nooci'aanitc i'i manitoo' enentaakwaninik epihshikwaacihcikenitc, mii hsa 'i kehcinaac ciwepi'ikowaatc. Miihsh i'i kikosihsiwaak keishihcikewaatc.”
17 #
Exo 20.4. “Keko piiwaapihkonk onci oshihtamaasohkek manitoohkaanak keanami'ehtawekwaa.”
18 #
Exo 12.14-20. “Ishihcikek itahsh cikanawentamek ciwiihkwantiiwahkamikisiyek ciamwek pahkweshikan kaaompisikaniwihsik. Niishwaahsokiishik hsa kika amwaawaa pahkweshikan wempisikaniwihsik citootamek kaainaahkoninakook. Ninkii onahtoon iitok kiisihs Epip (Abib) pimakinsotc o'o ci‑ishihcikeyek, aaniihsh mii 'i ahpii Iicipahkiink (Egypt) kaakii onci saaka'amek Epip ehpimakinsotc.”
19 #
Exo 13.2. “Maawac itahsh iko nihtam nehtaawikitc eniniiwitc, kaye aya'aawihsh, niin hsa ninka tipinawewis komaa wenciiwaakwen pishihkiink, komaa kaye maanahcaanihshink. 20#Exo 13.13. Kika tipa'waawaa hsa wiin nihtam nehtaawikitc maanshimihtatim, maanahcaanihshenhs cimeshkoci miikiweyek. Kiishpin itahsh wiin tipa'waahsiwek, mii hsa 'i cipoohkokwenek. Kika tipa'waawaak hsa kahkina nihtam nehtaawikiwaatc kikosihsiwaak.”
“Kaawiin hsa awiya ninka pi naasihkaakohsii cipiitoohsik kekoon kepakitinank.”
21 #
Exo 20.9,10; 23.12; 31.15. “Ninkotwaahsokiishik hsa kika anohkiim, niishwaahsokiishik itahsh ishihsek kika anwepim, mihsawaa ko ahpii pikishkahkamikipicikenk ahpii kaye manishikenk.”
22“Kika ishihcikem itahsh kaye ciwiihkwantiiwahkamikisiyek i'i Wiihkwantiiwi tawahtekin kaa'icikaatek nihtam kaakishkishikaatekin pahkweshikaniminan. Miinawaahsh ciwiihkwantiiwahkamikisiyek ahpii kaakiishikinkin kihtikaanan ci‑ishihcikeyek Akawaahte'ikani wiihkwantiwin kaa'icikaatek. 23Nihsink hsa entahso pipoon kahkina kitininiimiwaak tapiishaawak eshi'ayaawak niin kaaTipenciketc KaaMaawaci mashkawisiitc kaaoKishemanitoomiwaatc Isriyalak. 24Ninka maacii'aama'waak hsa pahkaan pemaatisiwaatc keni ishaayek, cinankii ayaak keotahkiimiyek. Kaawiin itahsh awiya oka papaamentansiin kitahkiimiwaa ahpii nihsink entahso pipoon antawaapamek eshi'ayaatc kaaTipenciketc kiKishemanitoomiwaa.”
25 #
Exo 12.10. “Keko wiin pakitinaahkek pahkweshikan wepisikaniwitc ahpii pakitinaahsoohtamawiyek aya'aawihsh, kaawiin kaye taishkohsehsinoon kekoon kaakiih pakitinaahsowaakeyek kiiPimaaci'ikoowi Wiihkwantiyek piinihsh ciani waapank.”
26 #
Deu 26.2. “Maawac hsa ko wenishihshik nihtam wenci nihtaawikihtooyek kikihtikaaniwaank kika piitoom i'imaa kaaTipenciketc owaahkaa'ikanink kiKishemanitoomiwaa.”
“Keko wiin maanatihkoonhs ishi kiishiswaahkek omaamaan ocoocoohshaapoominiink.”
27KaaTipencikenitc itahsh Moosihs okii'ikoon, “Oshipii'an ono ihkitowinan kaa'ininaan. Mii hsa 'iwe ihkitowinink eshi ahpihsitooyaan o'o ahshotamaakewin kaaoshihtamawakwaa Isriyalak (Israel),” okii'ikoon. 28Moosihs itahsh niimitana tahso tipihk, niimitana tahso kiishik okii wiici'ayaamaan kaaTipencikenitc, kaawiin itahsh kiionci wiihsinihsii, kaawiin kaye kiionci minihkwehsii. Miitahsh kaakii oshipii'ank ehkitoomakaninik ahshotamaakewin i'imaa napakaapihkahsiniink. Miiwan ihsa ini, “Mitaahso Onahshowewinan” kaaishinihkaatenikin.
Ahpii Moosihs Kiiwaahsiinkwesotc
29 #
2Co 3.7-16. Ahpii tahsh Moosihs (Moses) kiihpi niihsaamaciwetc i'imaa kihci waciink Saainai (Sinai) okiih pimiwinaa' niishin napakaapihkahsinii' ihkitowin kaakii ishi oshipii'ikaatenik. Kaawiin itahsh okii kihkentansiin ewaahsiinkwesotc aaniihsh okiih kakanoonaan Kishemanitoon. 30Ahpii tahsh Eranoon (Aaron), i'i kaye kahkina pemaatisinitc ewaapamikotc ewaahsiinkwesotc, kiikohtaaciwa' pehsho cinaasihkaakotc. 31Miihsh Moosihs kaakiih kanoonaatc. Eranoon tahsh i'i kaye kaakii niikaanisinitc Isriyala' (Israel) okiih pi naasihkaakoo'. Mii hsa 'i kaaishi kanoonaatc. 32I'i tahsh ekii ishkwaa ishihciketc, kahkina hsa Isriyala' okiih pi naasihkaakoo', mii hsa kaaishi wiintamawaatc citootaminitc kahkina kekoon kaaTipencikenitc kaakii'ikotc i'imaa kihci waciink Saainai. 33Ahpii tahsh Moosihs kaaishkwaa wiintamawaatc pemaatisinitc, mii hsa tahsh kaaishi aakawiinkwe'otisotc. 34Ahpii tahsh iko Moosihs kaaishaatc kaakii ishi'ayaanitc kaaTipencikenitc ewiih kanoonaatc, miitahsh kaaishi kiihcikoshkank i'i kaakii aakawiinkwe'otc. Miinawaa tahsh kiihpi saaka'ank, mii 'i kaakii ishi wiintamawaatc pemaatisinitc Isriyala' aaniin kaakii ishi anoocikaniwitc ci‑ihkitotc. 35Isriyala' tahsh okii waapamikoo' ewaahsiinkwesotc. Miitahsh miinawaa kaaishi pihsihkank otaakawiinkwe'on, piinihsh kii‑ishaatc eshi'ayaanitc kaaTipencikenitc ekiih kakanoonaatc.
Právě zvoleno:
Ekihsatahs 34: OJBR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ojibwe Shorter Bible (Roman Script) © 2008 Canadian Bible Society