ܡܬܠ̈ܐ 4
4
ܢܵܨܝܼܗܲܬܹ̈ܐ ܕܚܸܟ݂ܡܬܵܐ ܕܒܵܒܵܐ
1ܫܡܸܥܡܘܼܢ، ܝܵܐ ܒܢܘܿܢܹ̈ܐ، ܬܲܥܠܲܡܬܵܐ ܕܒܵܒܵܐ،
ܘܡܲܨܝܸܬܘܼܢ ܕܝܵܕܥܝܼܬܘܿܢ ܦܲܪܡܵܝܬܵܐ.
2ܣܵܒܵܒ ܝܘܼܠܦܵܢܵܐ ܛܵܒ݂ܵܐ ܝܘܼܗ݇ܒܸܠ ܠܝܼ ܐܸܠܵܘܟ݂ܘܿܢ،
ܢܵܡܘܿܣܝܼ ܠܵܐ ܫܵܒ݂ܩܝܼܬܘܿܢ.
3ܐܝܼܡܲܢ ܕܒܪܘܿܢܵܐ ܝܘܸܢ ܗ݇ܘܵܐ ܠܒܵܒܝܼ،
ܪܲܟܝܼܟ݂ܵܐ ܘܝܼܚܝܼܕܵܝܵܐ ܩܵܕ݇ܡ ܝܸܡܝܼ،
4ܡܘܼܠܦܸܢܹܗ، ܘܐ݇ܡܝܼܪܹܗ ܐܸܠܝܼ،
”ܕܵܒܹܩ ܠܸܒܘܼܟ݂ ܚܲܒܪ̈ܝܼ،
ܢܛܘܿܪ ܦܘܼܩܕܵܢܝܼ̈ ܘܚܝܝܼ.
5ܩܢܝܼ ܚܸܟ݂ܡܬܵܐ، ܩܢܝܼ ܦܲܪܡܵܝܬܵܐ،
ܠܵܐ ܢܵܫܹܝܬ ܗܹܡܸܙܡܵܢܹ̈ܐ ܕܦܘܼܡܝܼ، ܘܠܵܐ ܩܵܠܒܹܬ ܡܸܢܲܝܗܝ.
6ܠܵܐ ܫܵܒ݂ܩܹܬ ܠܵܗ̇، ܘܒܸܬ ܢܵܛܪܵܐ ܠܘܼܟ݂،
ܡܲܚܸܒ ܠܵܗ̇، ܘܒܸܬ ܚܲܡܝܵܐ ܠܘܼܟ݂.
7ܪܹܫܝܼܬܵܐ ܝܠܵܗ̇ ܚܸܟ݂ܡܬܵܐ، ܒܘܼܬ ܐܵܗܵܐ، ܩܢܝܼ ܚܸܟ݂ܡܬܵܐ،
ܘܟܡܵܐ ܕܡܵܨܹܝܬ ܩܢܝܼ ܦܲܪܡܵܝܬܵܐ.
8ܕܒ݂ܘܿܩ ܠܵܗ̇ ܪܵܡܬܵܐ، ܘܒܸܬ ܡܲܪܡܵܐ ܠܘܼܟ݂،
ܒܸܬ ܡܝܲܩܪܵܐ ܠܘܼܟ݂ ܟܲܕ ܚܵܦܩܹܬ ܠܵܗ̇.
9ܒܸܬ ܝܵܗ݇ܒ݂ܵܐ ܠܪܹܫܘܼܟ݂ ܟܠܝܼܠܵܐ ܕܫܵܦܵܩܲܬ،
ܒܸܢܦܵܪ ܕܚܸܩܪܵܐ ܒܸܬ ܣܲܦܝܵܐ ܐܸܠܘܼܟ݂.“
10ܫܡܸܥ، ܒܪܘܿܢܝܼ، ܘܩܲܒܸܠ ܗܹܡܸܙܡܵܢܝܼ̈،
ܘܒܸܬ ܙܵܝܕܝܼ ܐܸܠܘܼܟ݂ ܫܸܢܹ̈ܐ ܕܚܲܝܹ̈ܐ.
11ܒܐܘܼܪܚܵܐ ܕܚܸܟ݂ܡܬܵܐ ܩܲܡ ܡܲܠܦܸܢܘܼܟ݂،
ܩܲܡ ܡܲܚܕܸܪܸܢܘܼܟ݂ ܒܫܒ݂ܝܼܠܹ̈ܐ ܕܬܪܘܼܨܘܼܬܵܐ.
12ܐܝܼܡܲܢ ܕܚܵܕܪܹܬ ܠܹܐ ܥܵܝܩܵܐ ܦܵܣܘܿܥܬܘܼܟ݂،
ܘܐܸܢ ܪܵܚܛܹܬ، ܠܹܐ ܬܲܪܩܸܠܸܬ.
13ܕܒ݂ܘܿܩ ܒܡܲܪܕܘܼܬܵܐ، ܠܵܐ ܪܲܦܹܝܬ ܠܵܗ̇،
ܢܛܘܿܪܵܗ̇، ܣܵܒܵܒ ܗ̇ܝ ܝܼܠܵܗ̇ ܚܲܝܘܼ̈ܟ݂.
14ܒܐܘܼܪܚܵܐ ܕܪ̈ܲܫܝܼܥܹܐ ܠܵܐ ܥܵܒ݂ܪܹܬ،
ܘܠܵܐ ܚܵܕܪܹܬ ܒܫܒ݂ܝܼܠܵܐ ܕܒܝܼܫܹ̈ܐ.
15ܡܲܣܠܝܼ ܠܵܗ̇، ܠܵܐ ܥܵܒ݂ܪܹܬ ܒܝܼܘܼܗ̇،
ܩܠܘܿܒ ܡ̣ܢ ܠܟܸܣ ܠܘܼܗ̇ ܘܥܒ݂ܘܿܪ.
16ܣܵܒܵܒ ܠܹܐ ܡܵܨܝܼ ܛܵܠܥܝܼ، ܐܸܢ ܠܵܐ ܥܵܒ݂ܕܝܼ ܒܝܼܫܬܵܐ،
ܘܟܹܐ ܦܵܝܫܵܐ ܦܪܝܼܕܬܵܐ ܫܸܢܬܲܝܗܝ، ܐܸܢ ܠܵܐ ܡܲܢܦܸܠ ܠܝܼ ܠܚܲܕ، 17ܣܵܒܵܒ ܟܹܐ ܐܵܟ݂ܠܝܼ ܠܲܚܡܵܐ ܕܪܲܫܝܼܥܘܼܬܵܐ،
ܘܚܲܡܪܵܐ ܕܛܠܘܼܡܝܹ̈ܐ ܟܹܐ ܫܵܬܝܼ.
18ܐܝܼܢܵܐ ܐܘܼܪܚܵܐ ܕܙܲܕܝܼܩܹ̈ܐ ܐܲܝܟ݂ ܒܲܗܪܵܐ ܠܵܘܓ̰ܵܢܵܐ ܝܠܵܗ̇،
ܒܹܐܙܵܠܵܐ ܘܒܲܗܪܘܼܢܹܐ ܗܲܠ ܟܡܵܠܬܵܐ ܕܝܵܘܡܵܐ.
19ܐܘܼܪܚܵܐ ܕܪ̈ܲܫܝܼܥܹܐ ܐܲܝܟ݂ ܥܲܡܛܵܢܵܐ ܝܠܵܗ̇،
ܠܹܐ ܝܵܕܥܝܼ ܒܡܘܿܕܝܼ ܟܹܐ ܬܲܪܩܸܠܝܼ.
20ܒܪܘܿܢܝܼ، ܠܚܲܒܪ̈ܝܼ ܡܲܨܝܸܬ،
ܠܗܹܡܸܙܡܵܢܝܼ̈ ܨܲܠܝܼ ܢܵܬܘܼܟ݂.
21ܠܵܐ ܐܵܙܠ݇ܝܼ ܡ̣ܢ ܩܵܕ݇ܡ ܥܲܝܢܘܼ̈ܟ݂،
ܢܛܘܿܪܗܘܿܢ ܒܓܵܘܵܐ ܕܠܸܒܘܼܟ݂.
22ܣܵܒܵܒ ܚܲܝܹ̈ܐ ܝܢܵܐ ܐܵܢܝܼ ܠܡܲܫ݇ܟ̰ܚܵܢܲܝ̈ܗܝ،
ܘܒܵܣܲܡܬܵܐ ܠܟܠܹܗ ܦܲܓ݂ܪܲܝܗܝ.
23ܒܘܼܫ ܙܵܘܕܵܐ ܡ̣ܢ ܟܠ، ܢܛܘܿܪ ܠܸܒܘܼܟ݂،
ܣܵܒܵܒ ܡܸܢܹܗ ܝܢܵܐ ܦܠܵܛܹ̈ܐ ܕܚܲܝܹ̈ܐ.
24ܡܲܥܒܸܪ ܡܸܢܘܼܟ݂ ܦܟ̰ܝܼܠܘܼܬܵܐ ܕܦܘܼܡܵܐ،
ܘܦܠܝܼܡܘܼܬܵܐ ܕܣܸܦܘܵܬܹ̈ܐ ܡܲܪܚܸܩ ܡܸܢܘܼܟ݂.
25ܥܲܝܢܘܼ̈ܟ݂ ܠܒܲܠܩܘܼܒ݂ܠ ܚܵܝܪܝܼ،
ܘܛܸܠܦܵܦܘܼ̈ܟ݂ ܗܵܘܝܼ ܬܪ̈ܘܼܨܹܐ ܠܩܵܕ݇ܡܘܼܟ݂.
26ܡܲܫܘܝܼ ܫܒ݂ܝܼܠܵܐ ܕܐܲܩܠܘܼܟ݂،
ܘܟܠܲܝܗܝ ܐܘܼܪ̈ܚܵܬܘܼܟ݂ ܒܸܬ ܡܩܵܘܝܼ.
27ܠܵܐ ܩܵܠܒܹܬ ܠܝܲܡܝܼܢܵܐ ܘܠܣܸܡܵܠܵܐ،
ܡܲܥܒܸܪ ܐܲܩܠܘܼܟ݂ ܡ̣ܢ ܒܝܼܫܬܵܐ.
Právě zvoleno:
ܡܬܠ̈ܐ 4: ABTAB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Aramaic Bible Translation Assyrian Bible © 2025 Aramaic Bible Translation