Currently NT is Published. OT is in progress

Bagheli

एखे बाद तिसरे दिन गलील प्रदेस के काना गाँव माहीं कोहू के काज होत रहा हय, अउर यीसु के महतारी घलाय उहाँ नेउते माही रही हँय। यीसु अउर उनखे चेलन काहीं घलाय उआ बिआह माहीं नेउता दीन ग रहा हय। उहाँ जब अंगूर के रस चुकिगा, तब यीसु के महतारी यीसु से कहिन, कि उनखे लघे अंगूर के रस अब एक्कव नहिं आय। तब यीसु उनसे कहिन, “हे अम्मा, अपना हमहीं इआ काहे बताइत हएन? हमरे काम करँइ के समय अबे नहीं आबा आय।” उनखर महतारी सेबा करँइ बालेन से कहिन, “यीसु जउन कुछू तोंहसे कहँय, उहय किहा।” यहूदी धरम के नेम के मुताबिक हाँथ-मुँह धोमँइ, अउर कुछ चीजन काहीं धोइके सुद्ध करँइ के खातिर, पानी भरँइ बाले पथरा के छयठे मटका धरे रहे हँय, जउनेन माहीं 80 से 120 लीटर तक पानी समात रहा हय। यीसु ऊँ सेबकन से कहिन, ईं मटकन माहीं पानी भर द्या: तब सगले सेबक ऊँ मटकन माहीं फुल्ल-फुल्ल पानी भर दिहिन। तब यीसु ऊँ सेबकन से कहिन, अब थोर काहीं निकारिके खाँय-पिअँइ के प्रबन्ध करँइ बाले मुखिया के लघे लइजा। तब ऊँ पंचे लइगें, जब खाँय-पिअँइ के प्रबन्ध करँइ बाले मुखिया उआ पानी काहीं पीन, जउन अंगूर के रस बनिगा रहा हय, अउर ऊँ नहीं जानत रहें, कि इआ अंगूर के रस कहाँ से आबा हय, (पय जउन सेबक पानी निकारिन रहा हय, ऊँ पंचे जानत रहे हँय) तब खाँय-पिअँइ के प्रबन्ध करँइ बाले मुखिया, दुलहा काहीं बोलाइके, उनसे कहिन। “हरेक मनई पहिले निकहा अंगूर के रस देत हय, अउर जब मनई पिके अघाय जात हें, तब उआ ओसे कम निकहा देत हय, पय तूँ अबय तक निकहा अंगूर के रस धरे हया।” यीसु गलील प्रदेस के काना गाँव माहीं, इआ पहिल चमत्कार देखाइके, अपने महिमा काहीं देखाइन, इआ देखिके उनखर चेला लोग उनखे ऊपर बिसुआस किहिन। एखे बाद यीसु, अपने महतारी, भाई अउर चेला लोगन के साथ कफरनहूम सहर माहीं गें, अउर उहाँ कुछ दिना रहें।


यहूदी लोगन के फसह नाम के तेउहार लघेन रहा हय, एसे यीसु यरूसलेम सहर माहीं गें। अउर यीसु मन्दिर माहीं बरधा, गाड़र अउर परेबा के बेंचँइ बालेन काहीं, अउर रुपिआ-पइसा के लेन-देन करँइ बालेन काहीं बइठे पाइन। तब यीसु रस्सिन के चाबुक बनाइन, अउर सगले गड़रन अउर बरधन काहीं बहिरे भगाय दिहिन, अउर रुपिआ-पइसा के लेन-देन करँइ बालेन के पइसा बिथराय दिहिन, अउर उनखे पिढ़बन काहीं उलटाय दिहिन। अउर परेबा बिकनँय बालेन से कहिन, “इनहीं इहाँ से लइजा: हमरे पिता के घर काहीं बइपार के घर न बनाबा।” तब उनखे चेलन काहीं सुधि आई, कि पबित्र सास्त्र माहीं लिखा हय, कि “अपना के घर काहीं सुद्ध बनाए रहँइ के हमार लगन, एक दिन हमार जान लइ लेई।” इआ देखिके यहूदी धारमिक अँगुआ लोग यीसु से कहिन, तूँ जउन इआ काम करते हया, त हमहीं पंचन काहीं कउन अदभुत चिन्हारी देखउते हया? यीसु उनहीं जबाब दिहिन; कि “इआ मन्दिर काहीं गिराय द्या, अउर हम एही तीन दिना के माहीं बनाय देब।” इआ सुनिके यहूदी धारमिक अँगुआ लोग कहिन, “इआ मन्दिर काहीं बनामँइ माहीं छियालिस बरिस लाग हें, अउर का तूँ, एही तीन दिना माहीं बनाय देइहा?” पय यीसु त अपने देंह के मन्दिर के बारे माहीं कहिन रहा हय। एखे बाद जब यीसु मरे के बाद पुनि जिन्दा होइगें, तब उनखे चेलन काहीं सुधि आई, कि ऊँ इआ कहिन रहा हय, अउर ऊँ पंचे उनखे बारे माहीं पबित्र सास्त्र माहीं लिखे बचन, अउर उआ बचन के जउन यीसु कहिन तय, बिसुआस किहिन।

फसह के तेउहार के दिनन माहीं, जब यीसु यरूसलेम सहर माहीं रहे हँय, तब खुब मनई ऊँ अदभुत चिन्हारिन काहीं देखिके, जउन ऊँ देखाबत रहे हँय, उनखे ऊपर बिसुआस किहिन। पय यीसु अपने-आप काहीं उनखे भरोसे माहीं नहीं छोंड़िन, काहेकि ऊँ सगले मनइन काहीं जानत रहे हँय। यीसु काहीं इआ बात के जरूरत नहीं रही आय, कि कोऊ आइके मनई के बारे माहीं उनहीं बताबय, काहेकि ऊँ खुदय जानत रहे हँय, कि मनइन के मन माहीं का हय?

Poslouchat यूहन्ना 2