کارا رسولا 5
5
حَنانیا وَ سَفیره
1وَ امّا مردی بی وِ اسم حَنانیا واردِ زَنش سَفیرَه مِلکی نِه فُرُختِن، 2مقداری اَ پُولِ اونِ که زَنشَم اَ او وا خَوَر بی نیا داشت وُ فقط یه سَهمی اَ اونِه اُوُردُ هَشت دِ نوآ پا رسولا. 3اما پِطرُس وِش گُفت: «حَنانیا، چُنَ هَشتی پیسی شیطو ایجور دِلِتِ بیرَ که وِ روحالقدُوس دُرو بُئی وُ مقداری اَ پولِ زِمینِ وِرَ خُیِت وُرداری؟ 4مَیَر قبلِ فُرُختِن، وِرَ خُویِت نَوی؟ وَ بعد فُرُختِنَم اختیارِ پُولِش مَیَر دَسِ خُویِت نَوی؟چُنَ دِ دِلِت قَصد کِردی کِه ایجور کُنی؟تو نَه وِ انسان، بَلکه وِ خدا دُرو گُفتِی!»
5هَمی که حَنانیا ایی صُوَتا نِه شِنُفت اِفتا رو زِمی وُ درجا مُرد!تمام اونایی که ایی نِه شنُفتِن زرتِلاک شوئِن. 6اوسِه عده ای جِوُو آمان او نِه کَفِهپیچ کِردَن وُ بُردِن دَر، هشتِنِش دِ قَبر.
7نَزیکِ سه ساعت بعد زَنش بیخَوَر اَ ایی جریان آما داخل. 8پِطرُس ازِش پُرسی: «بُ بِنِم یعنی ایی زِمینِ وِ هَمی قیمت فُرُوختِید؟»
سَفیرَه جواو دا: «بله وِ هَمی قیمت.»
9پِطرُس وِش گُفت: «چُنَ وا هم، دَس وِ یکی کِردید تا روحِ خدا نِه اِمتحان کُنید؟ بَنِسَوا، اونا که شویَرِتِ هَشتِن دِ قَبر همی الان دَمِ دیراَن، وَ تُونَم مِوُرَن دَر.»
10دَرجا سَفیرَه هَم دِ وَرِ پای پِطرُس اِفتا وُ جو دا. وَختی که جِوُونا آمان داخل دییِن اونَم مُردَ. پَ بُردِنِش دَر، کنار شویِرش هشتِنِش دِ قَبر. 11اوسه زَلَه اِفتا وِ جُونِ تمام اونایی که دِ کلیسا بییِن وَ تمام اونایی که ایی نِه شنُفتِن.
عجایب وَ مِعُجِزات رسولا
12گُراگُر نِشُونِه آ وَ معجِزاتِ زیادی دِ مینِ مَردِم وِ دَسِ رسولا انجام مِشُد وَ ایماندارا همه شو یِه دِل دِ اِیوُونِ سلیمانِ دُورِ هم جَمع مِشوئِن. 13اما باقی مردِم، هُوشکَه جُرعت نِمِکِرد وِشو نَزیک با، وا ایی که تمام مَردِم عزتِشو نِه داشتِن. 14عده زیادی اَ مردا وُ زَنا ایمان میاوُردِن وُ رو مِکِردَن وِ خداوند، 15تا جائی که حتی مریضا نِه میاوُردن وِ مِیدونا شَر وُ اونا نِه رو رَختِخُو آ وُ تَختا مُخُفتِنان تا وَختی که پِطرُس اَ اونچو رَد مِشه دَسِکَم سایَش بِفتَه رو عده ایی اَ اونا. 16وَ هم مردِم دَسَه دَسَه اَ شَرا اطرافِ اورشلیم میامان وَ مریضا وُ اونایی که گیرِ ارواح بَد بییِن میاُوُردِن، وُ همه شو شفا میرفتِن.
گیر اِفتیَنِ رسولا
17اما کاهنِ اعظم وَ تمام همکاراش که اَ فِرقِۀ صَدوقی بییِن، اَ زورِ حَسودی دَس وِ کار شوئِن : 18وَ رسولا نِه گِرفتِنُ اِناختن دِ زندان شَر. 19اما هَمو شِوُ فرشتِۀ خداوند دَرا زندانِ نِه وا کِرد وُ اُوِردِشُو دَر 20وَ گُفت: «بَرید وَ دِ معبد خدا وایسید وَ تَمام وُ کمال پیغُومِ ایی حیاتِ تازَه نِه وِ مردِم بُویید.»
21اوسِه دَم صُو بَنا وِ اوچی که وِاونا گُفتهَ شیَ وی رفتن وِ معبد وُ شروع کِردَن وِ تعلیم دِیَن وِ مردِم.
وَختی که کاهنِ اعظم وُ هَمکاراش آمان اَهلِ شُورا وَ تمام مشایخِ اسرائیلِ نِه حِنا کِردَن.وَ عده ای نِه فِرسان تا رسولا نِه اَ زندان بیارَن . 22اما هَمی که ماَمورا رفتِن مینِ زندان رسولا نِه پیا نَکِردَن. پَ وُریَشتِن خَوَر دان که 23«دَرا زندان محکم قفل شیَ ویِن وُ نِگَبانا هَم دَم دَرا وایسیَ وین. اما هَمی که دَرا نِه وا کِردیم، هوشکَه نِه دِ زندان نَجُسیم» 24وا شِنُفتَنِ ایی خَوَر، فَرماندَه نِگبانا معبد وُ سَران کاهنا خُشکِشو زا، وُ رفتن دِ فکر که «عاقبت ایی کار چی مِشهَ؟»
25دِ ایی مِوُقَع، یکی آما وُ وِشو خَوَر دا گُفت: «اونایی که اِناختَ وییِن دِ زندان ایسه دِ معبد وایسی یَن وُ مَردِمِ تعلیم مِیَن.» 26پَ فرماندِۀ نِگَبانا معبد وا ماَمورا رفتِن وُ رسولا نِه اُوُردِن، اما نَه وِ زور، وِرِ ایکه مترسِسِن که مردِم سنگ بارُونِشُو کُنن.
27وَختی که رسولا نِه اُوِردِن، اونا نِه هَشتِن دِ بِراوَر شُورا، او وَخت کاهنِ اعظم اَزِشو پُرسی: 28«مَیَر سخت منعتو نَکِردِیم که دیه وا ایی اسم تعلیم نَیید؟ وا ایی حال شما اورشلیمِ نِه وا تعلیماتُو پر کِردِید وُ ماخایید خِوُن ایی مردِ نِه بَنازید گردن اِیما.»
29پِطرُس وَ رسولایِ دیَر جُواو دان: «ایما باید وِ جا انسان خدا نِه اطاعت کنیم. 30خدای بُواِآ ایما، هَمو عیسی نِه که شما کَشیید وِ صلیب وَ کُشتید، اَ مُردآ زِنَّه کِرد. 31وَ او نِه وِ دَسِ راسِ خُیش بُرد بالا، سَروَر وَ نجات دَهَندَه کِرد، تا وِ قُومِ اسرائیل مَجالِ توبَه وَ آمرزشِ گُناآنِ بَیَه 32وَ ایما شاهد ایی چیاییم، همو جور که روحالقدس هَم هِسا که خدا او نِه عطا کِرد وِ اونایی که ازِش اطاعت مُکُنَن.»
33اونا هَمی که ایی چیا نِه شنُفتِن جوری خشمگین شوئِن که قَصد کِردَن اونانِ بَکُشَن. 34امّا مردی اَ فِرقِۀ فَریسی، وِ نام گامالائیل، که معلمِ شریعت بی وَ همَه عِزَتِشه داشتِن، دِ مجلس وُریسا سَرِ پا وَ دستور دا رسولا نِه چَن دَقیقَه بُورَن دَر. 35اوسِه وِ همدساش گُفت: «مردای اسرائیلی، حَواسِتُو با وا ایی مردا ماخایید شی کنید. 36وِرِ ایکه قبلِ ایی روزا مردی وِ نام تِئُوداس وُریسا که ادعا مِکرد شخصِ مُهمیَ وَ نَزیکِ چارصد نَفَر هَم مُریدِش بییِن. اما او کُشتَه بی وُ مُریدآشَم توچِسِن. 37بعد او، یَهودایِ جَلیلی دِ زِمان سَرشماری قیام کِرد وَ عده ایی نِه اِناخت دُمِ خُیِش، اونَم کُشتِن وُ مُریدا اونَم توچِسِن. 38ایسِه وِ ایی خاطر وِتُو سفارش مُکُنِم اَ ایی مردا دَس وُردارید وُ اونانِ بَلید وِ حال خُیِشُو. وِرِ ایکه اَیَر نَخشَه وُ کاراشو اَ انسان با، بی گُمو را وِ جائی نِمُورَه، 39اما اَیَر اَ طرف خدا با، نِمِتُونید اونانِ اَ مین وُردارید، وَ حتی،ممکن هم هسا وِ ضِدِ خدا وُریسائَ واید!»
40پَ اونا قانع شُوئِن، وُ رسولا نِه حِنا کِردَن، شَلاقشُو زان وَ سخت منعشو کِردَن که دیَه وِ اسم عیسی صُوَتی نَکُنَن، اوسِه وِشو اِجازَه دان که بَرَن.
41رسولا وا شادی اَ وَرِ اَهلِ شُورا رفتِن دَر، وِرِ ایکه خُیِشونِه قابل دییِن که وِ خاطر او اسم بیعزت بان. 42وَ هوچ روزی، چِه دِ معبد چِه دِ خونِهآ، اَ تعلیم وُ بشارت دِ بارَه ایکه عیسی هَمو مسیحِ موعود دَس وُرنَشتِن.
دیاریکراوەکانی ئێستا:
کارا رسولا 5: NLBB
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2026 Korpu Company