کارا رسولا 4
4
پِطرُس وَ یوحنا دِ بِراوَر شُورایِ یهود
1پِطرُس وَ یوحنا هَنی مشغول صحبت کِردَن وا مَردِم بییِن، که کاهنا وُ فَرماندَه نِگَبانا معبد وُ عده ایی اَ فِرقِۀ صَدوقیا آمان وَرِشو. 2اونا اَ ایکه رسولا وِ مردِم تعلیم مِدان وَ وا اِتکا وِ رَستاخیزِ عیسی، زِنَه شییَنِ مُردِ آنِه اعلام مِکِردَن، سخت خشمگین شوئِن. 3اوسِه اونا نِه گرفتن وُ وِرِ ایکه دَمِ ایوارَه بی، تا صُوا دِ زندان نِیاشو داشتِن. 4اما عده ای اَ اونا که پیغُومِ نِه شِنُفتَه ویِن ایمان اُوُردِن وَ شُمارِ مرداشو رَسِس وِ نَزیکِ پَینش هزار نَفَر.
5صُواش بزرگا قُوم وُ مشایخ وُ معلما تُورات دِ اورشلیم وا هم جمع شوئِن. 6دِ ایی مجلس، حَنّا کاهنِ اعظم وَ قیافا وَ یوحنا وُ اسکندر وُ تمام خانوادَه کاهِنِ اعظم اونچو بییِن. 7اونا پِطرُس وُ یوحنا نِه هَشتِن دِ مینجا،اَزِشو پُرسییِن: «وِ چِه قدرت وَ وِ چِه اسمی ایی کارِ نِه کِردِید؟»
8اوسِه پِطرُس اَ روحالقدُس پر شُد، جُواو دا: «ای بزرگا قُوم وَ مشایخ، 9اَیَر اِمرو وِ خاطر خوئی کِردَن دِ حَقِ مَردِ علیلی اَ اِیما بازخواس مِشَه وَ مِپُرسید او مرد چِجور شفا پیا کِردَ ، 10پَ تمام شما وَ تمام قُومِ اسرائیل بَنِسَواید که وِ اِسمِ عیسی مسیحِ ناصریَ که ایی مرد دِ وَرِ چِشِتو سالم و سِلامت وایسیَ وِ اِسمِ هَمو که شما کَشینِش وِ صلیب اما خدا او نِه اَ مُردآ زِنَّه کِرد. 11ایی عیسی هَمو سنگیَ که تَوَسُطِ شما بَنّاآ رَد شد وُ ایسه سنگ اصلی بَنا شیَ. 12دِ هوشکَه غیرِ او نجات نیسا وِرِ ایکه دِ زیر آسمُو اسمی دیَر وِ آیِمیا دیَه نَشیَ تا توسط او نجات پیا کُنیم.»
13وَختی که جِسارَتِ پِطرُس وُ یوحنا نِه دییِن وُ فَمِسِن که آیِما دَرس نَخُنَه وُ بی سوادی هِسِن تعجب کِردَن وُ پِی بُردِن که اینا هَمو کِساییَن که واردِ عیسی بییِن. 14اما وِرِ ایکه او مرد شفا گِرفتَه دِ وَرِ او دوتا وایسیَ وی نَتُونِسِن چیی بُئَن . 15پَ دستور دان که اَ مجلس بَرَن دَر وُ خُیِشُو نِشِسِن وِ مشورت کِردَن. 16وا همُ گُفتِن: «وا ایی مردا شی کنیم؟ وِرِ ایکه تمام مردمِ اورشلیم مینَن که معجزۀ آشکاری وِ دَسِ اونا انجام شیَ وُ نِمِتُونیم مُنکر بایم. 17اما وِرِ ایکه بیشتَر اَ ایی چِوُ نَفتَه دِ مینِ قُوم، باید وِ ایی مَردا هُشدار بَییم که بعد ایی وا هوشکَه دِبارَ ایی اسم صُوَت نَکُنَن.»
18اوسِه اونا نِه هَنی حِنا کِردَن وُ وِشو دستور دان که هوچ وخت وِ اسم عیسی چیی نُوئَن وُ تعلیمی نییَن. 19اما پِطرُس وُ یوحنا جُواو دان: «شما خُویِتو داوری کنید دِ نظرِ خدا کامی دُرُسَ، اطاعت اَ شما یا اطاعت اَ خدا؟ 20وِرِ ایکه اِیما نِمِتُونیم او چیی که دیی یِیم وُ شِنُفتیم تعریف نَکُنیم.»
21پَ او دوتا نِه بعدِ تهدید زیاد مرخص کِردَن وُ رایی وِرَ مجازاتشُو پیا نَکِردَن وُ تمام مردِم، خدا نِه وِرَ او چیی که انجام شیَ وی شکر مِکِردَن. 22وِرِ اییکه او مرد که وا معجزهَ شفا گرفته وی بالا چِل سال داشت.
دعای ایماندارا
23پِطرُس وُ یوحنا بعدِ مرخص شییَن، وُریشتِن وَرِ دوساشو او چیی که سَران کاهنا وُ مشایخ وِشو گُفتَه وین تعریف کِردَن. 24اوسِه اونا وَختی که ایی نِه شَنُفتِن هم صدا وِ درگا خدا دعا کِردَن، گُفتِن: «ای خداوندِ حاکم وِ تمام کارا، ای آفَرینَندِۀ آسمُونُو زِمینُو دریا وَ هَر چیی که داخلِشونَ، 25تو خُیِت وِ واسطَه روحالقدس اَ زِوونِ بُواِ اِیما داوود که خادِم تو بی، فَرمایِش کِردی:
”چُنَ، قُوما شورش مُکُنَن
وَ قوما دِ دِلِشو نخشَه مِکَشَن.
26پادِشاآ زِمی وا هم هُمدَس وَ هُمقطار مِشَن ،
وُ فرمانروایا جمع مِشَن دورِ هَمدیَر،
وِ ضد خداوند
وَ وِ ضد مسیحِ او.“
27وِ راسی که دِ هَمی شَر، هیرودیس وُ پُنتیوس پیلاتُس واردِ غیرِ یهودیا وُ قُومِ اسرائیل وِ ضد خادم مُقدَسِت عیسی که او نِه مَسح کِردی دَس وِ یکی کِردَن، 28تا او چیی که دَس وُ اِرادِۀ تو اَ قبل مُقَدَر کِردَ وی وِ اَنجام بَرَسُنَن. 29ایسه ای خداوند، سِیل کُ وِ تهدیداشُو وَ لطفی کُ وِ خادِمات تا کَلامِتِ وا دل وُ جُرعتِ بیشتری بوئَن. 30وَ هَمیجور دَسِ خُیتِه وِ شفا دراز کُ وَ وِ نام خادم مُقدَسِت عیسی، نِشونِه آ وُ مِعجِزاتی وِ انجام بَرَسو.»
31بعد دعاشُو، جائی که دِ اونچو جمع شیَ وین اِفتا وِ لَرزَ وَ همه شو اَ روحالقدُس پُر شوئِن، وَ کَلام خدا نِه وا دل وُ جُرعت مِگُفتِن.
مشارکت ایماندارا
32تمام ایماندارا یِه دلُ یِه جُو شوئِن وَ هوشکَه چیی اَ دارائیشِه وِرَ خُیِش نِمِینِس، بَلکه دِ همَه چی وا هم شریک بییِن. 33رسولا وا قدرتِ زیادی وِ زنِّه شیَنِ خداوند عیسی شهادت مِدان وَ فیضِ عظیمی رو همه شو بی. 34کِسی دِ مینِشُو مُحتاج نَوی، وِرِ ایکه هَر کَه زِمی یا خونِهای داشت، مِفُرُخت وُ پولش 35مِدا وِ رسولا تا وِ قد نیاز هَر که مینِشو قسمت بَشَه. 36یوسف هَم که اَ طایفَه لاوی وَ اَهلِ قبرس بی وَ رسولا اسمِ اون بَرنابا یعنی تشویق کُنَندَ هَشتَ وین، 37زِمینی که داشت، فُرُخت وُ پولشِ اُوُرد، هَشتِش وَرِ رسولا.
دیاریکراوەکانی ئێستا:
کارا رسولا 4: NLBB
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2026 Korpu Company