Ichedendik 8
8
Asi p'achi ọyagbin atạm wạwọhrọ
1Ma okpe kw'uwa asi kk'ọyagbin achia, wa Ubinọkpaabyi Noa nóbona. Wa itirakpo phyibh ọttạra mkpaten s'ining Noa abẹ k'ọkpaar ẹtaanga nọ́bạra obona. N'ọtọhmọ ibum iguma k'ọyagbin, kw'usi asi awọhrọ. 2Mfhobh-cho s'isisek ikka, amma p'ọrạngkpaang akpa, asi dạk nátebha. 3Asi atạma wạwọhrọ k'ọyagbin. Masẹ n'ottong iwu arạbh asenọfa ukuma jobh o, asi kk'awọhra. 4Ukwu ottonga iwu chikhamfa s'aphye asenọfa, ọkpaar ọta uphyikha k'akpecho p'Ararat. 5Asi awọhrọ oche ngwọ-ngwọ tạrr ukpira k'echedenwu ch'aphye jobh, akpecho ayin.
6Masẹ iwu arạbh afa kk'isenga, Noa ugwunga ufhuma kw'ọkpaar kw'kk'usia. 7Ọtọhm ikpembukha s'n'ikwur, ikpa nnạm, ikwur, ikpa nnạm, tạrr ukpira k'okpe kw'asi kk'akka k'isisek. 8Noa ọbạra ọtọhm ikpua, ọfha osonga de asi kk'akka k'isisek. 9Okhenka, wa ikpua ibyi s'm'ibyạre mfhok nísia, ukwuru s'asi atim aning k'isisek. Asẹ ikwuna itor Noa k'ọkpaar. Noa onemi ọbọhk ọvạkha sẹ oge k'ọkpaar.
10Noa uninga adạkhẹ iwu isenọfa, ọbạra ọtọhm ikpua nnọ iyin k'ọkpaar. 11Masẹ ikpua ikwun itor-ẹ k'echọhkha, itim ikwongutọhng s'oliv s'isen-oseni. Ma wọ Noa osong bẹ́ asi kk'awọhra k'ọyagbin. 12Ukwu uninga adạkhẹ iwu isenọfa, ọbạra ọtọhm sẹ. Okhenka, ikpua nnọ dạk níkwuna.
13K'echedenwu ch'ocheden-phye kw'usi Noa icho enọhna ukuma arạbh jobh ukuma gwạnọ, asi kk'akka k'isisek. Noa ogbe ẹkpacho ch'ọkpaar, okkeri, ose bẹ́ isisek kk'itạma gwugwu. 14K'iwu ẹrạbh ukuma isenọfa s'ophye kw'ottong afa, isisek kk'ikkera igwu.
15Ma wọ Ubinọkpaabyi n'obeni Noa bẹ́, 16“Tima ikwanạng kwọ, ọttạra iva pọ, ọttạra ipanạng p'iva pọ, abạnga ayin k'iyaan. 17Gba tima ọttọhk fidede f'urukhu akpen k'ukhira-k'ukhira, f'uning abọ, ekpo masẹ ọnọhn, ọttạra nten, ọttạra ekpo py'n'esenga k'isisek, ọfha apyẹ ẹmaan ayok ẹnyaamẹ k'ọyagbin, ẹbạra ẹsaabh k'ubhik.”
18Ma wọ Noa uyini k'iyaan ọttạra ajunungva pẹ, ọttạra ikwanạng kwẹ, ọttạra ipanạng p'iva pẹ. 19Nten phyibh s'n'isenga k'isisek, ọttạra ọnọhn phyibh, ọttạra ọttọhk fidede f'n'osenga k'isisek ẹbạra iyin k'ọkpaar ngwọ, fidede k'ukhira kwẹ.
20Ma o, Noa usi ijabyi ọnạng Ọvaar Ubinọkpaabyi, ọtạkha eten k'ajạnẹ-k'ajạnẹ k'nten s'ibaan k'ẹja f'ạfọhnọ, ọttạra ọnọhn f'ọbaan k'ẹja fạfọhnọ, utima usi ẹjafọhna ch'ẹnạnga ẹkkạmachẹ ma ijabyi nnọ. 21Masẹ Ọvaar Ubinọkpaabyi ọbhaang iruk rebhada ch'ẹja njọ, oben kha ettem bẹ́, “Amma kwạna dạkhẹ ọyagbin ẹmma mạ́nnaakhẹ ukwuru usisi kw'oyokhanạng, s'ọbạra ode bẹ́ ettem ch'oyokhanạng ifu ọttạra mpyibha ttotto s'otto. Amma dạkhẹ ekpo py'irukhu akpen mạ́ndimi oche kw'ndimi ma okpe ngwa.
22Tạma mantọmma tạrr ukpira k'ekpongannạmwu ch'ọyagbin,
okpe kw'ekpo tutubh ọttạra okpe kw'iphya,
okpe kw'etebhichẹ ọttạra eyonchẹ,
okpe kw'ẹya ọttạra irungu,
idik nna phyibh ekponga míkhaama, m'ifona ororo ininga tạrr ipimmanitor.”
دیاریکراوەکانی ئێستا:
Ichedendik 8: mfn-x-os
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
©️2025 West Africa Christian Mission