Ichedendik 2
2
1Wa Ubinọkpaabyi okker ọtọhm f'ẹrạng ọttạra f'isek sisi, ọttạra ọttọhk fidede f'uning k'ẹtaanga kwabẹ.
2Ottong iwu isenọfa, Ubinọkpaabyi okwok ọyọhng k'ọtọhm f'kk'usia. 3Ubinọkpaabyi odo iwu ch'ettong isenọfa, ochok chẹ masẹ iwu ch'awurada, ukwuru bẹ́, ma iwu njọ jọ ch'okwok ọyọhng k'ọtọhm f'ọyagbin sisi.
Oche kw'uwa Ubinọkpaabyi usi achedennạng
4Maa wọ ode oche kw'uwa Ọvaar Ubinọkpaabyi usi ẹrạng ọttạra isek.
K'okpe kw'Ọvaar Ubinọkpaabyi usi ẹrạng ọttạra isek, 5wa ichi jạnẹ-jạnẹ, tạrr oseng k'isạsaarẹ némena, ukwuru s'Ọvaar Ubinọkpaabyi nạn ọrạngkpang tạm núsia bẹ́, otebh k'isisek, ọttạra bẹ́, wa ọnạng kw'm'utubh isisek kòde. 6Okhenka, asi n'ayin k'isisek, p'asi isisek phyi-phyibh idiri.
7Ma wọ Ọvaar Ubinọkpaabyi utim idọhngọ ọbạnga ujunung, uguma ọyọhng kw'akpen ugiẹ-ẹ k'asungmaang, ujunung nwọ uruk akpen.
8Ọvaar Ubinọkpaabyi ukwu usi owonu k'ukhubha kw'okpebhadudon n'uyin k'Iden. Ọtạkha ujunung nwọ kw'kk'usia, oge ma. 9Ọvaar Ubinọkpaabyi usi isisek imen nchi k'akhira-k'akhira, s'ijibhi k'ichen, ibạra ijibh k'uchiattọhk. Nchi mfa ibe k'ewonuttem, jạnẹ ede ch'akpen, njọkha ede ch'idik-songa ch'ijibha ọttạra ipyibha.
10Ma wọ ọraanga kw'ubin k'Iden ofobhu oseng, ọbạra oge asi ma ewonuttem, ọbạra ọbhaangẹ k'araanga annebung. 11Ọraanga kw'uchi eden okpen Pishọn, kw'ofobhu otena k'isek s'Havila k'ubungu, k'ibyi s'gol uning. 12Gol kw'isek nnọ ode ọkkakwẹ. Wa ibyi nnọ ibạra ikhaama ana p'arebhi iruk, ọttạra ata p'ọniks. 13Ọraanga kw'ottong afa okpen Gihọn kw'uwa ofobhu ọfhạrọ isek s'Kush phyi-phyibh. 14Ọraanga kw'ottong attaan okpen Tigiris kw'uwa ofobhu k'ukhubha kw'okpebhadudon n'uyin k'Asiriya. Ọraanga kw'ottong annebung okpena Yupharetes.
15Ọvaar Ubinọkpaabyi ọtạk ujunung nwọ ochok k'owonu kw'Iden, ọfha odo owonu ngwọ, ọbạra okkeri kwẹ. 16Ọvaar Ubinọkpaabyi ukwu ọnạng ujunung nwọ nkhạkhạma bẹ́, “Kk'ọ ọbọhk nttia bẹ́, achi achidwuk pyidede py'nchi s'ibe ma owonu ngwa. 17De n'ode achidwuk py'ichi ch'idiksonga ch'ijibha ọttạra ipyibha, kàchi o. Iwu ch'achi chẹ, kk'apua e.”
18Ma wọ Ọvaar Ubinọkpaabyi n'obeni bẹ́, “Nújibha bẹ́ ujunung nwọ uninga mạnkkeni, amma m'nsi oyok-ikhaana kw'ọbaan-ẹ, nnạng-ẹ.”
19Node s'Ọvaar Ubinọkpaabyi kk'idọhngọ utima ọbạnga mkpaten phyi-phyibh, ọttạra ọnọhn f'ẹrạng phyi-phyibh. Ọtạkha pyẹ phyibh okkena ujunung nwọ, ọfha ose ache-khira p'm'okpe pyẹ. Eche chidede ch'okpe pyẹ, mạnna wọ apyẹ ekpen. 20Ma wọ ujunung nwọ okpe itirakpo phyibh ache pabẹ, ọttạra mkpaten, ọttạra ọnọhn f'ẹrạng.
Okhenka, node ujunung nwọ, oyok-ikhaana kw'ọbaan-ẹ kòde. 21Ma wọ Ọvaar Ubinọkpaabyi usi ujunung nwọ ọttaabha iwora. Masẹ n'ọttaabha ma o, ọrạbh-ẹ ọtạtaang-kạbhọ wạnọ, ọbạra ọtạkha atennạng p'ujunung nwọ ububha ibyi nnọ s'ọrạbh ọtạtaang-kạbhọ nwọ. 22Ma wọ Ọvaar Ubinọkpaabyi ọtạk ọtạtaang-kạbhọ kw'kk'ọrạbha k'ujunung, usi ikwanạng, ọtạkh-ẹ okkena ujunung.
23Ujunung nwọ ọbẹ́,
“Iyaa! Maa wọ ode ọkhạbhọ kw'akhạbhọ paam,
ọttạra etennạng ch'atennạng paam.
Ẹma, abẹ m'ayer-ẹ, ikwanạng,
ukwuru sabẹ arạbh-ẹ k'ujunung k'ifor.”
24Ẹgwọ usi ujunung m'ubina urik otte ọttạra ọkka, ọgbạkha ifor sẹ ọttạra ikwanạng kwẹ, ọfha abẹma anạng afa ade wạnọ.
25Wa ujunung nwọ ọttạra ikwanạng kwẹ aning irinikhum, mkpạr bẹ nísia.
دیاریکراوەکانی ئێستا:
Ichedendik 2: mfn-x-os
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
©️2025 West Africa Christian Mission