Жаратылыу 18
18
Ибрахимни юч къонагъы
1Бир кюн Раббий Ибрахимге Мамрени эмен тереклерини къатында кёрюннгенди. Ибрахим кюнню къызыу заманында чатырыны эшик аллында олтуруп тура эди. 2Ол кёзлерин кётюрюп къарагъанда, аны туурасында юч киши сюелип тургъанын эслегенди. Аланы кёргенлей, чатырыны эшик аллындан чабып, ала бла тюбеширге баргъанды да, жерге дери ийилип, баш ургъанды.
3– Бийим! – дегенди. – Тилейме, манга ыразы эсенг, къулунга къайтмай кетме. 4Сизге аякъ жууаргъа бираз суу келтирирле. Бу терекни ауанасында олтуруп солугъуз. 5Мен бираз ётмек келтирейим да, сиз ауузланып, жолугъузгъа алай барырсыз. Сиз къулугъузгъа къонакъ болуп келгенсиз.
– Ахшы – дегендиле ала анга, – айтханынгча эт.
6Ибрахим чатыргъа ашыгъып кирди да, Сарагъа:
– Терк окъуна эм иги ундан юч уллу сауут#18:6 Уллу сауут – оригиналда «сеа». 1 сеа = 7,5 литр. ал да, тылы басып, ачымагъан ётмекле эт! – дегенди.
7Сора Ибрахим сюрюуге чабып барып, бир ариу, семиз тананы тутуп, къулуна бергенди, ол да аны терк окъуна союп, биширгенди. 8Ибрахим бишлакъ да, айран да, биширилген тана эт да алып, аланы алларына салгъанды. Ала ашай тургъан заманда кеси аланы къатларында терек тюбюнде сюелип тургъанды.
9Ала анга:
– Къатынынг Сара къайдады? – деп соргъандыла.
– Мында, чатырдады, – деп жууап бергенди Ибрахим.
10Сора аладан бири анга:
– Мен экинчи жыл бу заманда санга энтта келликме, ол заманнга къатынынг Сараны уланы боллукъду, – дегенди.
Сара уа чатырны эшигини артында тынгылап болгъанды. 11Ибрахим бла Сара къартайгъан, жыллары келген адамла эдиле, Сараны хайыз сынагъаны да тохтагъан эди. 12Ол себепден Сара, ичинден кюлюп, кеси-кесине: «Къартайгъанымдан сора, мен бу зауукъну къалай кёрюрме? Мени баш ием да къартды», – дегенди.
13Раббий Ибрахимге былай айтды:
– Сара: «Къартайгъанымдан сора, керти да сабий табармамы», – деп нек кюлдю? 14Раббийге къыйын зат бармыды? Экинчи жыл, айтылгъан заманнга Мен санга къайтырыкъма да, Сараны уланы боллукъду.
15Сара уа, къоркъуп:
– Кюлмегенме, – деп инкяр этгенди#18:15 Инкяр эт – угъай де, унама; орус. отрицать, опровергать..
Раббий а анга:
– Угъай, сен кюлгенсе, – дегенди.
Ибрахим Содом ючюн тилек этеди
16Къонакъла, туруп, алайдан Содомгъа атланнгандыла. Ибрахим а, аланы ашыра, биргелерине тебирегенди.
17Раббий:
– Мен не зат этеригими Ибрахимден жашырып къалай къояйым? – дегенди. – 18Ибрахимден керти да уллу эм кючлю миллет жаратыллыкъды, аны юсю бла да битеу жерни миллетлери алгъышлы боллукъдула. 19Ибрахим сабийлерине да, келлик туудукъларына да тюзлюк эм адыллыкъ#18:19 Адыллыкъ – керексизге жакъ басмаучу къылыкъ, тюзлюк; орус. справедливость. этерге, Раббийни жолу бла жюрюрге осуят этсин деп, Мен аны сайладым. Алай бла Мен, Раббий, анга берген сёзюмю толтурурма.
20Сора Раббий:
– Содомну бла Гомораны юсюнден къаты тарыгъыу этиледи, аланы гюняхлары бек ауурду, – дегенди. – 21Тюшюп бир къарайым, Манга келген тарыгъыу тюзмюдю, тюйюлмюдю, ала бу затланы этемидиле, этмеймидиле, билейим.
22Эки киши андан айланып, Содом таба кетгендиле, Ибрахим а энтта Раббийни аллында тура эди. 23Сора Ибрахим жууукълашып, былай айтханды:
– Сен тюзлюклюню аман адам бла бирге къалай жоярса? 24Бу шахарда элли тюзлюклю бар эсе уа? Аны кертиден жоюпму къоярыкъса? Андагъы элли тюзлюклюню хатеринден ол жерни аямазмыса? 25Эшта-эшта, Сен алай этмезсе! Тюзлюклюню аман адам бла бир болумгъа тюбетип, тюзлюклюню аман адам бла бирге жоймазса. Сен алай этер амалынг жокъду! Битеу жерни Сюдюсю терс сюд этерми?
26Раббий:
– Содом шахарда Мен элли тюзлюклю тапсам, аланы хатеринден битеу бу жерге жазыкъсынып къоярма, – деп жууап къайтаргъанды.
27Ибрахим дагъыда:
– Ма, мен къуру топуракъ эм кюл эсем да, Бийиме айтыргъа таукел болдум, – дегенди. – 28Элли тюзлюклюге бешиси жетмей къалса уа, бешиси жетмегени ючюн Сен битеу шахарны къырыпмы къоярыкъса?
– Анда къыркъ беш тюзлюклю адам тапсам, къырмам, – дегенди Раббий жууапха.
29Ибрахим Аны бла сёзюн бардыра:
– Анда жаланда къыркъ адам табылса уа? – деп соргъанды.
– Аны къыркъысы ючюн да этмем, – деп, жууаплагъанды Раббий.
30– Бийим мен айтырыкъ затха чамланмасын: анда жаланда отуз адам табылса уа? – дегенди Ибрахим.
– Анда отуз адам табылса, этмем, – деп, айтханды Раббий.
31– Ма, мен Бийиме айтыргъа таукел болдум: анда жаланда жыйырма адам табылса уа? – деп, соргъанды Ибрахим.
– Жыйырмасы ючюн да къырмам, – дегенди Раббий.
32– Бийим мен энтта бир кере айтырыкъ затха чамланмасын: анда жаланда он адам табылса уа? – деп, айтханды Ибрахим.
– Онусу ючюн да къырмам, – деп, жууап бергенди Раббий.
33Сора Раббий, Ибрахим бла сёлешгенин къоюп, кетгенди, Ибрахим а кесини жерине къайытханды.
دیاریکراوەکانی ئێستا:
Жаратылыу 18: МалкъСК
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© Институт перевода Библии, 2020-2024