FULO 5
5
MUSENNA AAROONI GIBITSETE MOOTE ALBIRA SHIQQU
1Hakkunni gedensaanni Musenna Aarooni Feriooniwa marte, «Israeelete Magani Kaaliiqi, ‹Halalla mare ane ayirrisate jila jilona manna'ya aguri› yiinohe» yitusi.
2Ferioonino, «Isi afummona, Kaaliiqi ayeti? Isi yiinota macciishshe Israeele mayira agureemmo? Ani Kaaliiqa diegennoommo; Israeeleno hadhara diagureemmo» yii.
3Musenna Aaroonino, «Ibiraawootu Magani ninke ledo xaadino; halallira sasu barri doogo ha'ne Maganinke Kaaliiqira kakkalo shiqishi'neemmona agurinke; konne assa hoongummoro, dhibbunninna bagadunni goonfeemmo gede assannonke» yite dawartusi.
4Ferioonino, «Ki'ne Musenna Aarooni, manna loosa mayira hooltinanni? Xa ka'ine konne manna loosoho ha'ranno gede asse! 5Ki'ne kiirotenni Gibitsoota roortinoonni; ki'ne lamunku qoltine manna loosannokki gede assitinanni heedhinoonni!» yiinsa.
6Hakko barranni Feriooni kaajjadda Gibitsoota loosiissannonsa gedenna insara roorroota ikkitanno gede hajajanni: 7«Xuube seekkate albi gede cide ki'ne uyitinoontensa; cide uminsa hasse abbitona. 8Alba seekkitanno xuubewiinni mitteno kiiro xe'ukkinni shiqishshanno gede asse. ‹Ha'ne Maganinkera kakka'li'neemmona agurinke› yitanni qarrissanni nooehu cee'maleeyye ikkitino daafiraati. 9Haafare macciishshitanno yanna heedhukkinni, loosu duu're amadannonsa gede asse» yii.
10Israeele loosiissannori kaajjaddu Gibitsootinna roorrootinsa marte mannaho, «Moote kunni ka'a cide uyinanni'nekki gede hajajino. 11Kunnira, umi'ne hassine abba hasiissanno'ne; kayinnilla seekkitinanni xuube kiiro albitewiinni xe'oonke» yitunsa. 12Mannuno cide hasi'ranni Gibitsete gobba baala tuqi. 13Gadadissanno Gibitsootino, «Barru barrunkunni alba cide shiqinshanna seekkitinanni geeshshi xuube kiiro xe'ukkinni seekkitine shiqishshe» yite gadachitunsa. 14Israeele gadadissanno Gibitsooti, loosiissara worroonnire Israeelete murroota, «Techo albite geeshshi xuube seekkitine shiqisha mayira hoogginoonni?» yitanni gantunsa.
15Loosiissannori Israeelete murrooti mootenniwa marte, «Moote, ninke soqqamaanokki togo mayira assittonke? 16Cide uyininkekkinni xuube seekkineemmo gede hajanjoonninke; kunni aanano gannanni hee'noonninke; tenne beebba assidhannonkeri kayinni ate mannaati» yite ku'litu.
17Feriooni daware, «Ki'ne horonta looso baxxinannikki cee'maleeyyeeti. ‹Ha'ne Kaaliiqira kakka'lineemmona agurinke!› yitinannihu kunniraati. 18Xa ka'e loosunniwa marre! Cide horonta diuyinanni'ne; ikkeennano alba seekkitinanni xuubewiinni kiiro xeissinikkinni shiqisha hasiissanno'ne» yiinsa. 19Israeelete roorrooti, kiiro albitewiinni xe'inokki xuube seekkite shiqisha hasiissannonsata buuxxuhu gedensaanni qarru amadinonsata affu.
20Feriooniwiinni fultanni heedhenni, agarte noonsarinni Musenninna Aarooninni xaaddu. 21Insano Musenna Aarooni, «Feriooninna ledosi gashshaano illete gibbannonke gedenna shitannonke gede assitinoonnita Kaaliiqi afino; tenne isi yoo'ne!» yitunsa.
MUSE KAALIIQA ABBOOSHSHI'RI
22Muse galagale hige Kaaliiqira, «Kaaliiqa, konne manna mayira shetisatto? Aneno kawiira mayira soyittoe? 23Ani ate su'minni coyi'rate Feriooniwa shiqummonkunni mannu aana qarra batisino; atino konne manna gatisate assoottori dino» yii.
دیاریکراوەکانی ئێستا:
FULO 5: QulMax
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© The Bible Society of Ethiopia; Sidama Holy Bible BSE-UBS 262 P 2014