FULO 36
36
1«Baasilaeeli, Oholiaabinna wolootu Qullaawu Dukkanira hasiisannore seekkitanno gede Kaaliiqi hayyonna ogimma uyinonsari baalu Kaaliiqi hajajinore assitanno» yii.
MANNU UYINO AFANSHI BATINYE
2Muse Baasilaeeli, Oholiaabinna Kaaliiqi ogimma uyinonsarenna loosoho shiqanno gede umisinni kainoha baala woshshi. 3Insano, Israeele Qullaawu Dukkani loosira ikkanno gede abbitinore baala Muse anganni haadhu; mannuno soodo soodontenni agurikkinni afanshansa Musewa haa're abbi. 4Hakkunni gedensaanni, Qullaawa Dukkana seekkitanno ogeeyye baala loossanno looso agurte dagge Musera, 5«Mannu Kaaliiqi hajajino loosira hasiisannohura aleenni bati'ra afansha abbanni no» yite kultusi.
6Museno mannu hakkiinni sayise Qullaawu Dukkanira ikkanno afansha abbannokki gede qacha manna soyi. Mannuno afansha abba uurrisi. 7Abbitino afanshino hendoonni loosira ikke gatannoho.
QULLAAWA DUKKANA SEEKKINOONNI GARA
(Ful 26:1-37)
8Loossannori giddonni egennantino ogeeyye, Qullaawa Dukkana 10 dukko ledo seekkitu; Dukkana seekkitinohuno kirubeeli misile ledo bule, xiillittenna duume shalonniiti. 9Mitte mittenti dukko hojja 28 cigile, godowa 4 cigile ikkitanno; baalanti dukko taalote. 10Onte dukko mitto widoonni, onte mitto widoonni xaadisse gobbu. 11Mittu widiidi dukko handaarira bule shalonni ilo wortu; wolu widiidi dukkorano hatto assitu. 12Xaadinsoonni dukko mittu widiiditera 50 ilo wortu; layinki widiidi dukkorano 50 ilo wortu. 13Lamunku widiidi dukko xaadisannoha 50 culku qarawa seekkitu.
14Meu ordanni dukkana dimbannita 11 dukko seekkitu. 15Baalanti dukko taalte, hojja 30 cigile, godowa 4 cigile ikkitanno. 16Onte dukko mitto widoonni, lee dukko mitto widoonni worte xaadisse gobbu. 17Xaadinsoonni dukko giddonni qaccete dukkora 50 ilo wortu; layinkiterano hattonni assitu. 18Dukko mittowa xaadisate 50 camote qarabba seekkitu. 19Dukkanaho aanaanni dimbanniha duumo ge'rechu goganna, cuukkinoonni goga seekkitu.
20Dukkanaho suwashsho waacconni waalcho seekkitu. 21Baalunku waalchi hojja 10 cigileeti; godowa 1 cigilenna darateho. 22Mittu mittunku waalchi mimmitunni xaadisannoha 2 qara afi'rino. 23Dukkanaho wodiidi ragaanni 20 waalchi no; 24lemoonte waalchuwara woroonni birrunni seekkinoonniti 40 lekkuwa no; mittu mittunku waalchira woroonni lamunku qarira lame lame lekkuwa noonsa. 25Dukkanaho aliyye ragaanni 20 waalchuwa wortu. 26Mittu mittunku waalchira woroonni lame lame lekka worteenna, mitteenni 40 ikkitu. 27Dukkanaho badheenni galchimi ragaanni 6 waalcho wortu. 28Dukkanu madde baalate badheenni lame lame waalchuwa wortu. 29Maddete noo waalchuwa alinni woro geeshsha xaaddinote; lamente maddera noorino hakkuyi garinni seekkinoonnireeti. 30Sette waalchuwara mittu mittunkura lame lame birrunni seekkinoonni lekkuwa noonsa.
31Waaccote haqqinni 15 waawanna seekkitu; kunni garinni mittu widiidi waalchuwara onte waawanna wortu; 32onte wole widoonni noo waalchuwara wortu; onte dukkanaho badheenni galchimi ragaanni noo waalchuwara wortu. 33Mereeri waawanchi waalchuwate hi'ra amade qaccetenni qaccete geeshsha iillanno. 34Waalchuwateno culka xallitu; waawanna giddoonni qolle sayinsanni kassa culkunni seekkite, waawannateno culka xallitu.
35Dukkuwa bule, xiillittenna duume shalonni seekkite, seesiinsoonnita kirubeeli misile aanaho qa'missu. 36Shoole tuuqqa waaccote haqqinni seekkite, aanaho culka xallitu; dukko waalchu ledo xaadinsanni qarabba culkunni seekkite, 4 birru lekkuwa wortunsa. 37Dukkanu xullichira bule, xiillittenna duume heqonni goonde seekkinoonni dukko wortu. 38Onte dawaayye qarabbate ledo wortu; gumayichuwansanna daabbuwansa aana culka xallitu; ontenta lekkuwano camotenni seekkitu.
دیاریکراوەکانی ئێستا:
FULO 36: QulMax
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© The Bible Society of Ethiopia; Sidama Holy Bible BSE-UBS 262 P 2014