FULO 26
26
KAALIIQI GALANNO DUKKANA SEEKKINANNI GARA
(Ful 36:8-38)
1«Ani galeemmowano fila heqonni gannoonnita bule, xiillittenna duume heqonni 10 dukko seekki; aanaho kirubeeli misilla goonde seekkinona. 2Mitte mittenti dukko mimmito roortukkinni godowa 28 cigilenna hojja 4 cigile ikkitona. 3Onte onte dukko mimmitunniwa xaadinse gombona. 4Onte ontente xaadinsoonni dukko hunda bule heqonni seekkinoonni ilo wori. 5Mittu widiidi dukkora 50 ilo wori; layinkiterano 50 ilo wori; ilo baalanti mimmitoho badhe wodhitona. 6Lamunku widiidi dukko xaadissannota 50 culku qarabba seekki. Kunni garinni xaadinseenna dukkana ikkanno.
7«Dukkana gollannita 11 dukko meu ordanni seekki. 8Mitte mittente dukko hojja 4 cigile, godowa 4 cigile ikkitona; baalunku qooli mimmitu ledo taalo ikkona. 9Onte dukko mitto widoonni, 6 dukko mitto widoonni worte gowi; leelki dukko erte dukkanaho albaanni ledde diwi. 10Mittu widiidi dukko qaccennitera hundaho 50 ilo wori; layinki widiidi qacceterano hundaho 50 ilo wori. 11Ontawu camote qarabba seekkite, ilote giddoonni qolte sayisi; lamenka widiido xaadisse mitto ikkanno gede assi. 12Dukkanu dukkowiinni gatinohu daratu, dukkanaho badheenni rarra"anno gede assi. 13Dukkana dibbanno dukko lamunku widiidita hojja mitte mitte cigile assineenna ka'aanna kawaanni rarra'ona.
14«Dukkanaho aanaanni duumo ge'rechu goganna cuukkinoonni goga diwi.
15«Dukkanu waalchuwano waaccote haqqinni seekki. 16Mittu mittunku waalchi hojja 10 cigile, godowa 1 cigilenna darate ikkona. 17Taale uurranno gede mittu mittunku waalchira 2 qari hee'rosina. Baalunku waalchira hatto assi. 18Dukkanaho wodiidi widoonni 20 waalcho seekki. 19Lemuunku waalchira woroonni 40 birru lekkuwa seekki; mittu mittunku waalchira woroonni xaadissannota 2 lekka wori. 20Dukkanaho layinki widoonni aliyye ragaanni 20 waalcho seekki; 21insarano 40 birru lekkuwa heedhonsana; mittu mittunku waalchira lame lame lekka heedhonsana. 22Dukkanaho badheenni galchimi ragaanni 6 waalcho wori. 23Dukkanaho lamente maddera badheenni 2 waalcho wori. 24Tini maddete waalchuwa hundunni kayisse, umu geeshsha xaaddanno gede assi. 2 madde kalaqinohu lamunku waalchi mittu garinni seekkamona. 25Tonaa lee birru lekkuwa worroonnihu 8 waalchi hee'rona; mittu mittunku waalchira lame lame lekkuwa heedhona.
26-27«Dukkanaho mitto widoonni noo waalchuwara 5 waawanna, layinki widoonni noo waalchuwara 5 waawanna, badheenni galchimi ragaanni noo waalchuwara 5 waawanna waaccote haqqinni seekki. 28Mereeri waawanchi waalchuwate giddoonni hige dukkanaho qaccetenni qaccete geeshsha iillona. 29Waalchuwate culka xalli; waawanna worranni kassa culkunni seekki; waawannateno culka xalli. 30Dukkanano ilaalu aana leellishummohe gede assite qasi.
31«Qullaawu Holgi dukko seekkine suqqinoonnitenni bule, xiillittenna duume shalonni seekki. Kirubeeli misillano goonde seekkinanni gede assite, 32culka xallinoonnitera waaccote tuuqqara suti; qarabbansano culkunnita, shoolenti lekkuwansano birrunni seekkinoonnita ikkitona. 33Dukkono qarabbate aana rarra'ona; Gondooru Taabootano dukkote giddora eessi; dukkono Qullaawa Darganna Qullaawa Holge baddannota ikkitona. 34Maarote barcimano Gondooru Taabooti aana Qullaawa Holge wori. 35Xarapheezza Qullaawu Dargira aliyyeenni, caabbicho worrannihano Qullaawa Darga wodiidi ragaanni wori. 36Dukkanu xullichirano seekkine suqqinoonnitenni bule, xiillittenna duume shalonni seesiinse seekkinoonni dukko wori. 37Dukkoteno 5 waaccote tuuqqa seekkite aanaho culka xalli; qarabbansano culkunni seekkinona; tuuqqateno 5 lekka camotenni seekki.
دیاریکراوەکانی ئێستا:
FULO 26: QulMax
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© The Bible Society of Ethiopia; Sidama Holy Bible BSE-UBS 262 P 2014