FULO 18
18
YOOTOORI MUSE TOWATI
1Midiyaami qeesichi Muse balli Yootoori, Maganu Gibitsetenni haa're fushshinsa woyite, Museranna mannisira Israeelete assinonsare baala macciishshe, 2Muse agure ha'rinota galtesi Sephaaranna, 3oososi Gershoominna Aliaazaari haa're abbi. Muse, «Manni gobba manna ikke hee'roommo» yee bayiru beettisira su'ma Gershoomi yee fushshino. 4Hattonni, «Anni'ya Magani Kaaliiqi kaa'linoe; Feriooni angannino gatisinoe» yee layinki beettisi su'ma Elieezeeri#18:4 Elieezeeri yaa Ibiraawootu afiinni Maganu kaa'laancho'yaati yaate. yiino. 5Yootoori Musera, «Ani galtekkinna oosokki danganni hee'noommo» yee balaxe sokka soyino. 6Yootoori Muse galte oososi ledo haa're, baxxisi're noowa halallitte gobba Maganu ilaaliwa kae dayi. 7Museno fule ballisinni xaade, albasiinni heeshshi yii; hakkiino kae sunqe daae yiisi. Mimmitonsa keere haadhuhu gedensaanni dukkanu giddora e'u. 8Muse, Kaaliiqi Israeelete daafira yee Feriooninna Gibitsete manni aana assinore baala kulisi. Qoleno doogote aana xaaddinonsa mitiimmanna hakkiichinnino Kaaliiqi asse gatisinonsa gara hasaawisi. 9Yootoori konne coye baala macciishshita lowo geeshsha tashshi yeennasi, 10«Feriooninna Gibitsootu anganni gatisino'nehu, mannasino borojjimmatenni fushshinohu Kaaliiqi galatamo. 11Gibitsootu aana'ne boo'nitino boo'na lae angansanni gatise fushshino'nena, Kaaliiqi maganna baalanta roorinota xa afummo» yii. 12Hakkunni gedensaanni, Yootoori shilqote kakkalonna wole kakkalono Maganoho qixxeessi. Aarooninna Israeelete geerri baalunku Maganu albaanni Yootoori ledo sagale ittara gamba yitu.
COYE AFANNO MANNA DOORANNO GEDE YOOTOORI MUSE AMAALISI
(Mar 1:9-18)
13Layinki soodo Muse mannaho coye afara ofolli; isino soodonni hawarro geeshsha mannu coye coyi'ranni hosi. 14Yootoorino Muse assinore lae, «Ati hiikkitanni nootto? Mannu soodonni hawarro geeshsha ate doyisse uurre hosanna callikki coyi'rattohu mayiraati?» yiisi. 15Muse ballisira daware, «Maganu hedo xa'mi'rate mannu anewa daanno; 16coyi hee'rannonsa woyiteno anewa dagganno; coyensa afeemmohuno aneeti; Maganu woganna Maganu seerano egensiiseemmonsa» yiisi.
17Yootoorino, «Kuni assatto coyi doogimalete. 18Kuni coyi callikkira bati'rannohe daafira, atino mannuno daafurtinanni; konne baala callikki assattora didandaatto. 19Xa ani amaaleemmohere macciishshi: Maganu ledokki hee'rona, ati mannu daafira Maganu albaanni uurri; coyensano haadhe Maganunniwa shiqqi assi; 20wogasinna seerasino rosiisinsa; heedhanno garanna assitannoreno kulinsa. 21Qolteno, mannu giddonni egenno afidhinore, Magano waajjitannore, addaxxinannirenna hanaaqo gibbannore doori; insa giddonnino 1,000 roorricha, 100 roorricha, 50 roorrichanna 10 roorricha assite wori. 22Insano mannu coyi'ramanno yanna baalantera coye affanno gede assi; atewa qarrisino coye calla haadhe abbitona; shiima coye kayinni insa la'ona; insa kunni garinni beeqqiteenna, atera duhu shotannohe. 23Togo assittoronna tinino Maganu hedo ikkitannoha ikkiro, atino daafurunni gatatto; mannu baalunkuno coyesi tidhe keerunni minisira higanno» yiisi.
24Museno ballisi coye macciishshe, yiinosire baala assi. 25Israeelete giddonnino egenno afi'rino manna doori; doorantinori: 1,000 roorrootaati, 100 roorrootaati, 50 roorrootaatinna 10 roorrootaati. 26Insano wo'manka woyite mannaho coye affannore ikkitu; qarrisinonsaha Musewa haadhe abbitanni, shiimmaadda coye kayinni insanni guddu. 27Muse Yootoori geegiisseenna galagale gobbasi ha'ri.
دیاریکراوەکانی ئێستا:
FULO 18: QulMax
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© The Bible Society of Ethiopia; Sidama Holy Bible BSE-UBS 262 P 2014