စံးထီၣ်ပတြၢၤ 73
73
ကစၢ်ယွၤအတၢ်တီတၢ်လိၤ
1ကစၢ်ယွၤန့ၣ်မ့ၢ်တၢ်ဂ့ၤလၢပှၤအတီအလိၤ,
ဒီးပှၤလၢအသးကဆှီတဖၣ်အဂီၢ်နီၢ်နီၢ်န့ၣ်လီၤ.
2မ့မ့ၢ်ယဲဒၣ်ယၤအံၤ, ယခီၣ်ဘူးလၢကဘၣ်တိၢ်
ဒီးယခီၣ်အတၢ်ထွဲတဖၣ်ဘူးတ့ၢ်လံလၢ
ကလီၤတလံာ်န့ၣ်လီၤ.
3အဂ့ၢ်ဒ်အံၤ, ယထံၣ်တ့ၢ်လၢ
ပှၤတတီတလိၤတဖၣ်ဘီၣ်ထီၣ်ညီထီၣ်,
ဒီးယသးက့ၣ်ထီၣ်လၢအဝဲသ့ၣ်လၢ
အတၢ်ပာ်ထီၣ်ထီအသးအဃိန့ၣ်လီၤ.
4အဝဲသ့ၣ်တတူၢ်ဘၣ်တၢ်ဆါဘၣ်.
အဝဲသ့ၣ်အဂံၢ်ဆူၣ်အဘါဆူၣ်ဒီး
အိၣ်ဆူၣ်အိၣ်ချ့ဝဲဒၣ်န့ၣ်လီၤ.
5အဝဲသ့ၣ်တတူၢ်ဘၣ်တၢ်ဒ်ပှၤဂီၢ်မုၢ်အဂၤတူၢ်ဘၣ်ဝဲ,
ဒီးတအိၣ်ဒီးတၢ်ကိၢ်တၢ်ဂီၤဒ်ပှၤဂၤ
အိၣ်ဒီးတၢ်ကိၢ်တၢ်ဂီၤအသိးန့ၣ်ဘၣ်.
6မၤသးဒ်န့ၣ်ဒီးတၢ်ပာ်ထီၣ်ထီသးန့ၣ်မ့ၢ်
အဝဲသ့ၣ်အကိာ်ကွီၤတဖၣ်,
ဒီးတၢ်မၤတၢ်လၢတၢ်စုဆူၣ်ခီၣ်တကးလုၣ်ဘၢ
အဝဲသ့ၣ်ဒ်တၢ်ကူတၢ်ကၤအသိးန့ၣ်လီၤ.
7အဝဲသ့ၣ်အသးတဖၣ်လူလီၤတၢ်အၢတၢ်သီ,
ဒီးအသးအတၢ်ဆိကမိၣ်တဖၣ်အါဝဲဒၣ်လၢ
တၢ်ကူၣ်ထီၣ်ဖးလီၤအအၢအသီတဖၣ်န့ၣ်လီၤ.
8အဝဲသ့ၣ်နံၤဘၣ်ဖၣ်လဲပှၤဂၤဒီး
ကတိၤတၢ်အၢတၢ်သီတဖၣ်လီၤ.
အဝဲသ့ၣ်ပာ်ထီၣ်ထီအသးဒီးကူၣ်ထီၣ်တၢ်လၢ
ကမၤအၢမၤနးပှၤဂၤတဖၣ်န့ၣ်လီၤ.
9အဝဲသ့ၣ်ကတိၤတၢ်အၢလၢကစၢ်ယွၤလၢအအိၣ် လၢမူခိၣ်အဂ့ၢ်
ဒီးဟ့ၣ်လီၤတၢ်မၤလိာ်လၢ
အတၢ်ပာ်ထီၣ်ထီအသးတဖၣ်ဆူ
ပှၤလၢအအိၣ်လၢဟီၣ်ခိၣ်ချၢန့ၣ်လီၤ.
10မၤသးဒ်န့ၣ်ဒီး, ကစၢ်ယွၤအပှၤဂီၢ်မုၢ်ဒၣ်လဲာ်
ဃၣ်အသးဆူအဝဲသ့ၣ်အအိၣ်
ဒီးတၢ်လၢအဝဲသ့ၣ်စံးဝဲန့ၣ်
နာ်ဝဲလၢတၢ်သးဆူၣ်န့ၣ်လီၤ.
11အဝဲသ့ၣ်စံးဝဲ, “ကစၢ်ယွၤတသ့ၣ်ညါဘၣ်,
တၢ်ထီကတၢၢ်တဂၤတထံၣ်န့ၢ်ဝဲဘၣ်.”
12တၢ်န့ၣ်မ့ၢ်တၢ်လၢပှၤတတီတလိၤ
ဘၣ်သူၣ်ဘၣ်သးဝဲန့ၣ်လီၤ.
အဝဲသ့ၣ်အိၣ်ဒီးတၢ်လၢတၢ်ပှဲၤဒီး
ဒိးန့ၢ်အါထီၣ်ဘၣ်တၢ်ထီဘိန့ၣ်လီၤ.
13ယမၤကဆှီယသး, ဒီးသ့စီကွံာ်ယစုလၢ
တၢ်ဒဲးဘးတအိၣ်ဘၣ်အပူၤန့ၣ်
မ့ၢ်ဒၣ်တၢ်ကလီကလီခဲလၢာ်န့ၣ်လီၤ.
14ကစၢ်ယွၤဧၢ, ကိးမုၢ်နံၤဒဲးန့ၣ် နဒုးတူၢ်ဘၣ်ယၤတၢ်,
ကိးမုၢ်ဂီၤဒဲးနစံၣ်ညီၣ်ယၤလီၤ.
15ယမ့ၢ်စံၤတ့ၢ်တၢ်ဒ်န့ၣ်အသိးဒီး
ယကမ့ၢ်ပှၤတဂၤလၢ အတမၤတၢ်
ဒ် နပှၤဂီၢ်မုၢ်အသိးဘၣ်လီၤ.
16ယကျဲးစၢးဆိကမိၣ်တ့ၢ်တၢ်ကီတၢ်ခဲန့ၣ်လီၤ
တံၢ်လီၤဆဲးဘၣ်ဆၣ်
မ့ၢ်တၢ်ကီကဲာ်ဆိး
လၢယကနၢ်ပၢၢ်အီၤအဂီၢ်,
17တချုးဒံးလၢယလဲၤနုာ်ဆူ
နတၢ်လုၢ်ဟံၣ်အပူၤဘၣ်န့ၣ်လီၤ.
အန့ၣ်တစုယနၢ်ပၢၢ်တၢ်လၢ အကဘၣ်ပှၤတတီတလိၤန့ၣ်လီၤ.
18မ့ၢ်မးကနပာ်အဝဲသ့ၣ်လၢတၢ်လီၤတလံာ်အလီၢ်တဖၣ်,
နကဒုးလီၤအဝဲသ့ၣ်ဆူတၢ်ဟးဂူာ်ဟးဂီၤန့ၣ်လီၤ.
19အဝဲသ့ၣ်ဘၣ်တၢ်မၤဟးဂီၤကွံာ်အီၤလၢ
တစိၢ်ဖိအတီၢ်ပူၤ,
ဘၣ်တၢ်စိာ်ကွံာ်အီၤလၢာ်လၢာ်ဆ့ဆ့လၢ
တၢ်လီၤပျံၤလီၤဖုးတဖၣ်န့ၣ်လီၤ.
20အဝဲသ့ၣ်လီၤဂာ်ဒ်တၢ်မံမီၢ်လၢအလဲၤပူၤကွံာ်
လၢမုၢ်ဂီၤအသိးန့ၣ်လီၤ.
ကစၢ်ယွၤဧၢ, တုၤနထိၣ်ဂဲၤထီၣ်နသးန့ၣ်ဒီး
အဝဲသ့ၣ်ဟါမၢ်ကွံာ်ဝဲဒၣ်န့ၣ်လီၤ.
21တုၤယအိၣ်ဒီးတၢ်သးဆါ, တုၤယသးဘၣ်ဆဲးန့ၣ်ဒီး,
22ယမ့ၢ်ပှၤလၢအသးတပှဲၤဒီး တၢ်သ့ၣ်ညါနၢ်ပၢၢ်တအိၣ်,
ယလီၤဂာ်ဒီးဆၣ်ဖိကီၢ်ဖိလၢနမဲာ်ညါလီၤ.
23မ့ၢ်နာ်သက့ဒ်န့ၣ်ဒီး, ယအိၣ်ဘူးဒီးနၤတထံၣ်ဃီ
ဒီးနဟံးထီၣ်ယစုထွဲန့ၣ်လီၤ.
24နဆှၢယၤလၢနတၢ်ကူၣ်ထီၣ်ဖးလီၤ
ဒီးလၢခံက့ၤနကတူၢ်လိာ်ယၤလၢ
တၢ်လၤတၢ်ကပီၤန့ၣ်လီၤ.
25နမ့ၢ်ဒၣ်ပှၤထဲတဂၤဧိၤလၢ
ယဒိးန့ၢ်ဘၣ်လၢမူခိၣ်န့ၣ်လီၤ.
မ့ၢ်လၢယဒိးန့ၢ်ဘၣ်လံနၤအဃိ ယလိၣ်ဘၣ်ဒံး
တၢ်မနုၤတမံၤလၢဟီၣ်ခိၣ်ချၢန့ၣ်လဲၣ်.
26ယသးဒီးယနီၢ်ခိအဂံၢ်အဘါကစၢ်လီၤဝဲ,
ဘၣ်ဆၣ်ကစၢ်ယွၤမ့ၢ်ယဂံၢ်ယဘါလီၤ.
အဝဲမ့ၢ်တၢ်ခဲလၢာ်လၢယန့ၢ်ဘၣ်အီၤ အလီၢ်အိၣ်ထီဘိန့ၣ်လီၤ.
27အဂ့ၢ်ဒ်အံၤ, ကွၢ်ကွၢ်, ပှၤလၢအအိၣ်ယံၤဒီးနၤန့ၣ်
ကတုၤလၢတၢ်ဟးဂီၤလီၤ.
နကမၤဟးဂီၤကွံာ်ပှၤလၢအသးတတီဒီးနၤန့ၣ်လီၤ.
28ဘၣ်ဆၣ်လၢယဂီၢ်တၢ်အိၣ်ဘူးဒီးကစၢ်ယွၤန့ၣ်
မ့ၢ်တၢ်ဂ့ၤလီၤ.
ယပာ်တၢ်စိတၢ်ကမီၤကစၢ်ယွၤ လၢယတၢ်အိၣ်တဒၢအလီၢ်
ဒ်သိးယကစံးဘၣ်တဲဘၣ်
အတၢ်မၤခဲလၢာ်တဖၣ်န့ၣ်လီၤ.
دیاریکراوەکانی ئێستا:
စံးထီၣ်ပတြၢၤ 73: KSWC
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sgaw Karen Common Bible © Bible Society of Myanmar, 1992.