Matayo 25
25
Lusimo lwe bakhaana liikhumi
1 #
Luka 12.35
“Khu shifukhu isho, Buyiinga bwe mwikulu bulifwaananisibwa ni bakhaana liikhumi babaayila tsitaala tsaabwe, baarura khuutsya khukhwakaanila umusaani ukhweele umukhasi. 2Ne baraano khu nibo baaba basilu, ne baraano nga bakyesi. 3Abo babaaba baasilu baasuta tsitaala tsaabwe, ne baalekha khuyila ni kamafura kakaandi ta. 4Ne abo babaaba bakyesi baasuta tsitaala tsaabwe atweela ni kamafura kakaandi mu shiindu. 5Ne umusaani ukhweele n'akyelewa khukhwiitsa, boosi baawungukhila, baakona. 6Ne mu shilo khukari, aabawo khuulaangilila bari, ‘Bona ukhweele woolile, ni murure mu mwakaanile.’ 7Bakhaana boosi benyukha, baŋoonaka tsitaala tsaabwe. 8Ne babaaba baasilu tsana baalomela bakyesi bari, ‘Ni mukhuwekho khu mafura keenywe, lwekhuuba tsitaala tseefwe tsilikho tsisima.’ 9Bakyesi babeelamo bari, ‘Taawe, singene kakhumale ifwe ni nanywe taawe. Khurusakho, ni mutsye isi bakulisila, mwikulile kakeenywe.’ 10Ne ni baaba nga batsya khukula kamafura, ukhweele woola. Ibo babaaba berekefu, benjila ni naye khu mayiiya ke bukhwaale, bekalawo lulwiitsi. 11#Luka 13.25Lwanyumakho bakhaana tsana babaatsya bakobola, baloma bari, ‘Musakhulu, musakhulu, khwikulilewo.’ 12Naye wabeelamo ari, ‘Ilala imbaboolela ndi inywe ise simbamanyakho ta.’
13“Ni nashiryo, ni mube meeso, lwekhuuba simumanya shifukhu namwe isaawa ta.
Lusimo lwe babakaanisi bataru
(Luka 19.11-27)
14 #
Luka 19.11-27
“Luundi ndi Buyiinga bwe mwikulu bulifwaana nga umusaani uwaba atsya lukyeendo lweewe, walaanga babakaanisi beewe, wabalekhela buyiindifu bweewe. 15Isi mutweela wamuwa tsi talanta tsiraano tse tsinusu, ukuundi wamuwa tsi talanta tsibili, ni isi ukuundi wamuwa i talanta indweela. Awa buli mutweela nga bunyali bweewe ni bwaba. Lwanyuma waarura waatsya khu lukyeendo lweewe. 16Khaangukho umusaani uwafuna tsi talanta tsiraano, waatsya waatsisubulamo, waafunamo tsi talanta tsitsiindi tsiraano. 17Ni nooyo naye uwafuna tsi talanta tsibili, waatsisubulamo waafunamo tsitsiindi tsibili. 18Ne umusaani uwafuna i talanta indweela, waatsya waalima lilowo mwiloba, waabisamo i talanta y'omukoosi weewe tsana.
19“Lwanyuma lwe mbuka indeeyikho, umukoosi we babakaanisi tsana waakobola, wekhala khuubalana ni nabo tsinusu tseewe. 20Umusaani uwafuna tsi talanta tsiraano waareera ni tsi talanta tsitsiindi tsiraano, nga aloma ari, ‘Musakhulu, waambikhisa tsi talanta tsiraano, ne bona, naafunilemo tsiraano tsitsiindi.’
21“Umukoosi weewe waamuloma ari, ‘Uryoo! Iwe umwakaanisi umulayi luundi umwiyikinwa, ubeele umwiyikinwa mu biindu bikyeekhe, ari kane ikhubiikhise bibiindu bikali. Yiitsa ukabananile atweela kumwikhoyo kw'omukoosi woowo.’
22“Uyo naye uwafuna tsi talanta tsibili weetsa. Waaloma ari, ‘Musakhulu, waambikhisa tsi talanta tsibili, ne bona naafunilemo tsi talanta tsitsiindi tsibili.’
23“Umukoosi weewe waamuloma ari, ‘Uryoo! Iwe umwakaanisi umulayi luundi umwiyikinwa. Ubeele umwiyikinwa mu biindu bikyeekhe, ne ari kane ikhubiikhise bibiindu bikali. Yiitsa ukabananile atweela kumwikhoyo kw'omukoosi woowo.’
24“Uyo naye uwafuna i talanta ndweela weetsa. Waaloma ari, ‘Musakhulu, nakhumanya ndi uli umusaani umuwaangafu naabi, ukyesela isi ukhaamiitsila ta. Ubuusanisila isi ukhahanyila bumiitso ta. 25Nashiryo, ise narya, naatsya naabisa i talanta yoowo mwilowo. Bona iyishiina, iyoowo inyene.’
26“Umukoosi weewe waamwiilamo ari, ‘Iwe uli umwakaanisi umubi, luundi umutoro! Iwe wamanya uryeena uri ise injesa sheesi ikhaamiitsa ta, luundi nabuusanisa byeesi ise ikhaamiitsa ta? 27Nashiryo, khali waha basuubusi tsinusu tsase, ni khu mbuka yeesi ingobolelemo, naandifunilekho tsitsase tsinyene ni kamafuurisa. 28Ni mumurusekho i talanta nyene, mukiwe uyo uuli ni tsi talanta liikhumi. 29#Mat 13.12; Mako 4.25; Luka 8.18Lwekhuuba buli muundu ulikho ni shishiindu, balimuloselakho, ni naye aliiba ni bikali. Ne uyo ukhalikho nasho ta, ni naakho khakyeekhe kheesi ali nakho, balikhamurusakho. 30#Mat 8.12; 22.13; Luka 13.28Ne umwakaanisi uyo umubi, ni mumutuume ibulafu mu shilima, iyo iliiba khulila ni khukhwilumaka kameeno.’
Khuukhala kumusaango khumalilisi
31 #
Mat 16.27;
Mat 19.28
“Nga Umwaana w'Omuundu wetsiile mu shiriifwa sheewe, ni bamalayika boosi nga bali ni naye, alikhala khu shitsoloŋo sheewe, mu shiriifwa she mwikulu. 32Kamanaambo koosi kalibuusanisibwa mu moni tseewe, ni naye alyawukhanisamo babaandu nga umwaayi n'awulamo kamasheese ni tsimbusi. 33Kamasheese alikara khu mukhono kweewe kumulayi, ni tsimbusi khu mukhono kumunyeletsi.
34“Lwanyuma umuyiinga aliloma abo babaali khu mukhono kweewe kumulayi ari, ‘Yiitsa, inywe beesi Paapa awa tsikhabi. Ni mwinjile mufune Buyiinga bubwaŋoonewaŋoonewa khulweenywe khukhwaama khu khubuumbibwa khwe shiibala. 35Lwekhuuba ise naba intsala, inywe mwaamba she khuulya; naba bulesa inywe mwaamba she khuunywa; naba mukyeni, inywe mwantsakaanila mu ntsu tseenywe. 36Ise naba bukhuna, inywe mwangwarisa; naba mulwaale, mwandolelela bulayi; naba mu mapuusu, mweetsa mwambonakho.’
37“Ne bakwalaafu nabo balimwiilamo bari, ‘Umukasya, khwakhubona liina nga uli ntsala khwakhuwa she khuulya; namwe nga uli bulesa khwakhuwa she khuunywa? 38Khwakhubona liina nga uli umukyeni khwakhwakaanila iweefwe; namwe nga uli bukhuna khwakhukwaarisa? 39Khwakhubona liina nga uli umulwaale, namwe mu mapuusu, khweetsa khukhubona?’ 40Umuyiinga naye alibeelamo ari, ‘Ilala imbaboolela ndi, shoosi sheesi mwakholela mutweela khu bandaayase babafuura bukyeekhe bano, mwashikholela ise.’
41“Lwanyuma aliloma abo babaali khu mukhono kweewe kumunyeletsi ari, ‘Ni mururewo isi indi mutsye, inywe babaatsubiwa, mutsye mu mulilo kukuukhasima ta, kukwaŋoonewaŋoonewa lwa Sitaani ni bamalayika beewe. 42Lwekhuuba ise naba intsala, ne inywe simwaambakho she khuulya ta; naba bulesa, simwaambakho she khuunywa ta. 43Naba mukyeni, ne simwantsakaanila iweenywe ta; naba bukhuna, ne simwaambakho bikwaaro ta; naba mulwaale, luundi nga ndi mu mapuusu, simweetsa mwambonakho ta.’ 44Nabo balimwiilamo bari, ‘Umukasya, khwakhubona liina nga uli intsala, namwe bulesa, namwe umukyeni, namwe bukhuna, namwe mulwaale, namwe mu mapuusu, ifwe khwalekha khukhuyeeta?’
45“Naye alibeelamo ari, ‘Ilala imbaboolela ndi, nga ni mukhaashikholela mutweela khu bano babaafuura bukyeekhe, muryo simwashiikholela ise ta.’ 46#Dan 12.2Ni nabo baryo baliitsya mu shitaambiso shikhawawo ta, ne bakwalaafu baliitsya mu bulamu bubukhawawo ta.”
دیاریکراوەکانی ئێستا:
Matayo 25: LPE
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
The Bible in Lumasaaba © Bible Society of Uganda, 2016.