Matayo 18
18
Naanu ufuura bukhulu?
(Mako 9.33-37; Luka 9.46-48)
1 #
Luka 22.24
Mu saawa nyene iyo, baleekelwa beetsa isi Yesu, baamureeba bari, “Naanu ufuura bukhulu mu Buyiinga bwe mwikulu?”
2Yesu walaanga umwaana umufwiiti, waamwimisa akari awe, 3#Mako 10.15; Luka 18.17waaloma ari, “Ilala ise imbaboolela inywe ndi, ni mukhashuukha mwekyela nga babaana bafwiiti, simulinyala khukhwinjila mu Buyiinga bwe mwikulu ta. 4Aso, umuundu yeesi uwihombeekha nga umwaana yuno umufwiiti, niye ufuura bukhulu mu Buyiinga bwe mwikulu. 5Na buli uyo yeesi uwakaanila umwaana umufwiiti nga yuno, mu lisiina lyase, aba wantsakaaniile ise.
Khuukhonjelesa babaandi khuukhola bye bubwoonaki
(Mako 9.42-48; Luka 17.1,2)
6“Ne umuundu yeesi ulikhonjelesa mutweela khu bafwiiti bano babaafukiilila, waabayila mu khwooneka, shiba shilayi umuundu uyo abowebwe lusisi lukali mu milo mweewe, bamutuume esiikhe mu nyaantsa indeeyi naabi. 7Ne nga she kumutaambo isi shiibala lwe bilomo bibireerera babaandu khukhwoneka! Bibiindu bino byaakha biitse, ne she kumutaambo isi uyo ubireera!
8 #
Mat 5.30
“Noola kumukhono kwoowo namwe shikyele shoowo shikhuyila mu khwooneka, shiremekho, ushituume. Lwekhuuba shikhubeela shilayi iwe khukhwinjila mu bulamu bubukhawawo ta nga uli umuleme, namwe nga s'uli ni kumukhono, namwe ni shikyele, khufuura khutuumibwa mu mulilo kukhasima nga uli ni kamakhono kyoowo kyoombi, namwe ni bikyele byoowo byoombi. 9#Mat 5.29Namwe noola imoni yoowo ikhuyila mu khwooneka, kirusemo ukituume aleeyi. Lwekhuuba shikhubeela shilayi iwe khukhwinjila mu bulamu nga uli ni moni ndweela, khufuurisa khutuumibwa mu mulilo kukukhasima ta, nga uli ni tsimoni tsoowo tsoombi.”
Lusimo lwe lisheese lilyakoraana
(Luka 15.3-7)
10 #
Luka 19.10
“Inywe ni mubone muri, simulekelesa mutweela khu bafwiiti bano ta. Lwekhuuba imbaboolela ndi busheele bamalayika baabwe mwikulu babona mu moni mwa Wele mwikulu. 11Lwekhuuba Umwaana w'Omuundu etsa khuwonesa ibo babakoraana.
12“Inywe mwaambaasa muryeena? Umuundu n'aba ni kamasheese keewe shitoondo shitweela, ne litweela khu niko lyakoraanakho, s'alekha kamakhumi syeenda na syeenda khu lukiingi, waatsya nga aweentsa litweela ilyo lilyakoraanile? 13Ne n'alinyoola, ilala imbaboolela ndi, ekhoyela naabi lisheese litweela ilyo, khufuurisa iko kamakhumi syeenda na syeenda kakakhakorere ta. 14Musaambo iyo niyo ndweela, Paapa weenywe uli mwikulu, s'afukiilisa mutweela khu bafwiiti bano khuhela ta.
Nga uwashoowo waakhukholilekho shiibi
15 #
Luka 17.3
“Ne nga umufukiilisi washoowo waakhukholilekho shishoonako, iwe n'utsye is'ali umuboolele buubi bweewe nga muli babili mweembi mwenyene. Nga wakhuwuliile iwe uba waamukobosele is'uli. 16#Maka 19.15Ne naakhuminyaalila, n'utsye n'umuundu ukuundi mutweela namwe babili, nio akile buli shiindu shoosi shihangasiwe ni bujulisi bwe baboni babili namwe bataru. 17Ne ni eloosela khuminyaala, boolela lisaayilo lye bafukiilisi boosi, ne n'aloba khuwulila lisaayilo lyoosi, ari ni mumuyile nga umunaambo namwe nga umubuusanisi we kumusolo.
Khuubowa ni khuukangulula
18 #
Mat 16.19; Yok 20.23 “Ilala imbaboolela ndi, byoosi byeesi mubowa khu shiibala, bilibowebwa ni mwikulu, ni nebyo byeesi mukangulula khu shiibala, bilikangululiwa ni mwikulu. 19Ilala, luundi imbaboolela ndi, nga babili mwiinywe ni bafukiilisana khu shiindu shoosi sheesi baloomba khu shiibala, kane Paapa weenywe uli mwikulu ashibakholele. 20Lwekhuuba isi babili namwe bataru babuusanila mu lisiina lyase, nase imbaawo akari abwe.”
Lusimo lw'omwakaanisi ukheyakhila ta
21 #
Luka 17.3,4 Lwanyuma Petero weetsa isi Yesu, waamureeba ari, “Umukasya, wandaayase nga woonakile isi indi, kane imwiyakhile kimiluundi kyeenga? Niyakhile khukhwoolesa kimiluundi musaafu?”
22 #
Rak 4.24
Yesu waamwiilamo ari, “Akhuba kimiluundi musaafu ta, ne njeeba kamakhumi musaafu kimiluundi musaafu.#18.22 Shishimanyisa ndi kimiluundi kimikali khukhwokesana ndi umufukiilisi mu Kristo aakha khukhwiyakhila nga s'aluwa ta.
23“Ni nashiryo, Buyiinga bwe mwikulu bufwaananisibwa n'umuyiinga mutweela uwakana khukwalaasa bye tsinusu tseewe ni babakaanisi beewe. 24Ne nga n'arakikha khubala, bamureerera umusaani mutweela yeesi aba abaantsa tsinusu kimikaanda liikhumi. 25Ne lwekhuuba umwakaanisi yuno s'anyala khumuliyila ta, umuyiinga walakila ari umusaani bamukulise, n'umukhasi weewe, ni babaana beene, ni bibiindu byeewe byoosi byeesi aba nabyo, bimuliyile likobi. 26Umwakaanisi tsana yuno waafukhama aasi is'ali, waamwikontselela ari, ‘N'untsikhalilikhekho, nase kane ikhuliyile bibyoowo byoosi.’ 27Umuyiinga yuno waamuwaambila shiisa, wamwiyakhila likobi, wamulekhuula.
28“Ne umwakaanisi mweene yuno n'arura waatsya, wakaanana mutweela khu bakaanisi basheewe, esi naye aba abaantsa tsidinari shitoondo shitweela, waamukwa mumilo, waarakikha khuumukoka, nga amuloma ari, ‘N'undiyile bibyase byoosi byeesi ikhubaantsa.’ 29Umwakaanisi washeewe yuno waafukhama aasi, nga amwikontselela ari, ‘N'untsikhalilikhekho, nase kane ikhuliyile.’ 30Ne niye waalekha khushifukiilila ta, waamuyila waamura mu mapuusu ari khukhwoolesa n'akane amuliyile likobi. 31Ne babakaanisi basheewe ni baashibona baryo, bakhalala naabi, nabo baatsya basontsoola umuyiinga waabwe byoosi bibibeelewo. 32Aryo umuyiinga walaanga umwakaanisi tsana yuno, waamuloma ari. ‘Iwe umwakaanisi ukhalimo, ise nakhwiyakhiile likobi lyoowo lyoosi, lwekhuuba waantsikontselela. 33Nawe sishakhwakhiile khuwaambila umwakaanisi uwashoowo shiisa, nga ise ni nakhuwaambiile iwe?’ 34Mu bukhalafu bukali, umuyiinga yuno waamuwaambisa basilikhale bamuwe shitaambiso, khukhwoolesa n'akane amale khumuliyila likobi lyoosi.”
35Yesu waamalilisayo nga aloma ari, “Aryo Paapa wase uwe mwikulu n'alibirisa buli mutweela khus'inywe, akhali nga buli mutweela mu mwoyo kweewe weyakhila wandaaye.”
دیاریکراوەکانی ئێستا:
Matayo 18: LPE
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
The Bible in Lumasaaba © Bible Society of Uganda, 2016.