Matayo 16
16
Bakana bari Yesu akhole she kamakaanga
(Mako 8.11-13; Luka 12.54-56)
1 #
Mat 12.38; Luka 11.16 Lwanyuma Bafarisaayo ni Basadukaayo beetsa isi Yesu bakana khumureka nga bamuloomba abokesane khabonelo khe kamakaanga khukhwaama mwikulu.
2Naye wabeelamo ari, “Antsye ni buba nga bwilabula, muloma muri, ‘Kane antsye abe akhulayi, lwekhuuba likulu lyabesemile,’ 3ni kumutikhinyi mwaloma muri, ‘Kane abewo ikhuungu shaleelo, lwekhuuba likulu lyabesemile luundi lyamaliyile.’ Inywe mwamanya khuteebelesa likulu ni lifwaana, ne simunyala khuteebelesa bubonelo bwe bifukhu ta. 4#Mat 12.39; Luka 11.29Kumuboolo kumubi kuweentsa khabonelo khe kamakaanga, ne mbaawo khabonelo khe kamakaanga khakhaliweebwa khurusakho khabonelo khe kamakaanga kha Yona.”#16.4 Yona Yona aba munda mwe kunyeeni kuboofu khumalamo bifukhu bitaru, shiilo ni kumuusi. Lwanyuma Yesu waabarurakho waatsya.
Kamamela ke Bafarisaayo ni Basadukaayo
(Mako 8.14-21)
5Nga baakhalisile inyaantsa boolele shanjelekha, baleekelwa baaba beebiliile khuureerayo kimikaati. 6#Luka 12.1Yesu waabaloma ari, “Ni mwiliinde luundi mwiyaye naabi isi kamamela ke Bafarisaayo ni Basadukaayo.”
7Kila baleekelwa barakikha khuukanikhanamo bonyene bari, “Waalomele aryo lwekhuuba khwebiliile khuureerayo kimikaati.”
8Ne Yesu nga waamanyile byoosi byeesi baaba baloma, kila abareeba ari, “Inywe babaali ni khuufukiilila khukyeekhe, lwashiina mwireebana mwenyene muri, simuli ni kimikaati? 9#Mat 14.17-21Mushiili khumanya ta? Simushebulila kimikaati kiraano kyeesi nawa babaandu bikana biraano, bibiipo byeenga byeesi mwabuusanisa? 10#Mat 15.34-38Ni kimikaati musaafu kyeesi nawa babaandu bikana bine, bibiipo byeenga byeesi mwabuusanisa? 11Shiina shishibalobeele khumanya muri, ise simbeele inganikha khu mikaati ta? Ne nimwiliinde kamamela ke Bafarisaayo ni Basadukaayo.” 12Baryo nio lwanyuma bamanya bari, Yesu s'aba nga abalomela khukhwiiliinda kamamela kakaraambisibwa mu mikaati ta, ne isi khuleekela khwe Bafarisaayo ni Basadukaayo.
Yesu ali niye naanu?
(Mako 8.27-30; Luka 9.18-21)
13Lwanyuma nga Yesu wolile mu shaalo she Kayisaliya Filipi, waareeba baleekelwa beewe ari, “Umwaana w'Omuundu babaandu bamulaanga khuuba naanu?”
14 #
Mat 14.1,2; Mako 6.14,15; Luka 9.7,8 Nabo baamwiilamo bari, “Baalala baaloma bari, iwe niye Yokana Umubatisa, babaandi bari iwe niye Eliya,#16.14 Bayudaaya bakali busa basuubila bari Eliya aba ali ni khukhwiitsa khuŋoonela Umuwonesi intsila. ni babaandi bari iwe niye Yeremiya, namwe mutweela khu baŋoosi.”
15Naye Yesu waabaloma ari, “Ne inywe, ise munaanga khuuba naanu?”
16 #
Yok 6.68,69 Simoni Petero waamwiilamo ari, “Iwe uli Kristo, Umwaana wa Wele Umulamu.”
17Yesu waamwiilamo ari, “Simoni, mwaana wa Yona, iwe uli n'ikhabi, lwekhuuba mbaawo umuundu ukhubimbuliile shino ta, ne Paapa wase uli mwikulu. 18Luundi ikhuloma ndi, iwe uli Petero, ni khu lwaanda khuno kane nombekhekho Lisaayilo lyase, ni kamaani ke makoombe shikalilinyala ta. 19#Mat 18.18; Yok 20.23Indikhuwa bifuungo bye Buyiinga bwe mwikulu, shoosi sheesi ubowa khu shiibala shilibowebwa ni mwikulu, ni neesho sheesi ukangulula khu shiibala, shilikangululiwa ni mwikulu.”
20Lwanyuma Yesu waakhoonyakilila baleekelwa beewe balekhe khuboolelakho umuundu yeesi bari niye Kristo ta.
Yesu akanikha khu bye khuutaambisibwa ni khuufwa khweewe
(Mako 8.31—9.1; Luka 9.22-27)
21Khukhwaama khu saawa iyo, Yesu waarakikha khukhwokesanisa baleekelwa beewe mu lubuula ari, niye shimwaakhila khuutsya i Yerusalemu, ataambisiwe bibiindu bikali, mu mikhono kye basakhulu, basaayi bakhulu, ni baleekeli be kamakaambila ka Musa, eribwe, ne lwanyuma khu shifukhu she khataru, alamusiwe.
22Petero waamuyila andulo waamuloma ari, “Taawe Umukasya, Wele s'anyala waalekha shino shaakhukholikha khwiiwe shiryo ta.”
23Yesu waashuukha waaloma Petero ari, “Yiila inyuma wase Sitaani, iwe uli shishituyisa isi ise, lwekhuuba siwaambaasa bya Wele ta, ne ili isaambo yeesi babaandu bambaasamo.”
24 #
Mat 10.38; Luka 14.27 Lwanyuma Yesu waaloma baleekelwa beewe ari, “Noola umuundu yeesi akana khukhuunoondelela, eyikaane umweene, etyuukhe kumusalaba kweewe anoondekho. 25#Mat 10.39; Luka 17.33; Yok 12.25Lwekhuuba buli muundu yeesi ukana khuuwonesa buulamu bweewe, alibukosa, ne buli uyo yeesi ukosa buulamu bweewe khulwase, alibuwonesa. 26Lwekhuuba umuundu shilimuyeeta shiina khuulya shiibala shoosi, ne wafwiila buulamu bweewe? Namwe umuundu aliwaanayo shiina nio bulamu bweewe bumukobosewele? 27#Mat 25.31; Zab 62.12; Roma 2.6Lwekhuuba Umwaana w'Omuundu aliitsila mu shiriifwa sha Paapa we ni bamalayika beewe, nio lwanyuma awe buli muundu khukhwimikha khu buraambi bweewe ni buli. 28Ilala imbaboolela ndi, iliwo batweela khuubo babemikhile ano babaakhalifwa ta, khukhwoolesa ni balibona Umwaana w'Omuundu nga etsila mu Buyiinga bweewe.”
دیاریکراوەکانی ئێستا:
Matayo 16: LPE
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
The Bible in Lumasaaba © Bible Society of Uganda, 2016.