If you would like a copy of this version please contact info@davaraudiobibles.org

Biblia Toba Qom, La&#39;aqtaqa Ñim Lo&#39;onatac &#39;Enauacna © 2013, Sociedad Bíblica Argentina. (Text)
Toba Audio Bible ℗ 2025, Davar Partners International. (Audio)

Biblia Toba Qom 2013

Toba Qom - 2012 Edition (NT) Non Drama

Toba Qom - 2012 Edition (NT) Drama

So Jesús co'ollaq ivireua'a ye Jericó, nache quichiguingui so nỹecpi. Qaq se'eso nỹecpi hueta'a so sallaxanec le'enaxat Zaqueo. Somaye lataxala' nam ỹacootapeeguet ana nsheetenaqte ca nta'a maye netaña ye nỹecpi ye Roma. Qaq somaye nshetaique da ỹauatton So Jesús. Qalaxaye saishet da ỹañoxot da ilo'ot, souaxat somaye da huaxarenaqolec, qataq ỹataqta qalota so shiỹaxauapi. Nache somaye hua'au nqalgoqta, cha'aye nshetaique da ỹauatton So Jesús. Ime, qaq quisheguemec aso qo'oipaq late'erai maye nangui som nqa'aic maye tateuga So Jesús. Qaq So Jesús co'ollaq nlectot aso qo'oipaq maye huetasheguemec somaye, nache ilasheguemec. Nache 'enapega, 'eeta':
–'Am Zaqueo, sa 'anaỹaloxon qome da 'aunotec, cha'aye Aỹem na na'a'q soua'a ca 'arma'.
Nache so Zaqueo ỹataqta sa naỹaloxon da huenotec, nache qalota da ntonaxac da ỹauegueua'a ca lma' So Jesús. Qaq co'ollaq qaỹauaachigui de'era, nache qanayectega, qoỹeeta': «So Jesús qache ishet da taua'a ye lma' so ỹale maye 'etaxaloxoic.» Qaq co'ollaq ime da nquia'axac, nache nachaañi so Zaqueo, nache 'enapega So Jesús, 'eeta':
–'Am Ỹataxala', aỹem qome secolaxatchiguingui na laiñi da isallaxa. Ime, qaq sanem nam choxoraqpi. Qaq da huo'otaq huo'o ca secachiỹot, nache cuatro da she'eguelaxalec da she'eguelaxatot camaye cam secachiỹa.
Nache So Jesús 'enapeco':
–Nagui na na'a'q, 'am qataq 'enauac nam hueta'a na 'arma' qanca'alliiuec, cha'aye nataqa'en maiche 'am llalec so Abraham. Cha'aye Aỹem Shiỹaxaua Llalec, ñanac da ñimitaique qataq ñeca'alaxatec nam shiỹaxauapi maye qaỹoqtaique naqa'en Ñim Lo'onatac 'Enauacna.

Qaq So Jesús co'ollaq mashe saqaỹapeque ye nỹecpi ye Jerusalén. Nache so shiỹaxauapi maye na'axaỹaxaatega Somaye, ipi'itaxaatega da Ñim Lo'onatac 'Enauacna mashe ivita ca laloqo' da ilo'ogue 'enauacna. Nache So Jesús ỹauo'o da daloqnaxana, 'eeta':
–Huo'o so ỹale 'amaqtaqaic, somaye qoỹanagui da nta'a, da ilo'ogue cam hueta'a 'alhua, qaq somaye jec da nqo'ona so lta'a na nta'alpi da yaqto' qoỹanagui da nta'a. Qaq co'ollaq mashe ime da qoỹanagui da nta'a, nache ỹe'eguelaxa cam 'alhua maye chegoqchiguiña da yaqto' ilo'ogue. Qaq co'ollaq yaqta'a da jec, nache iỹaxaneugalo soua diez lo'onataxanaxanaqa. Nache ỹami' ñi 'oonolec soomaye aso alom. Nache 'enapegalo', 'eeta': «Qauo'onataxañiỹa qome ana'ana aỹom, qanmiñiitac, choche ivitta'a qome da ñe'eguelaq.» Qalaxaye so shiỹaxauapi maye lma' se'eso 'alhua, ỹataqta nquiỹa somaye. Nache ỹauo'o so ỹamaq da ica'ataxanaxaalec somaye da yaqto' 'enapega, 'eeta': «Qomi' sa saỹamaxarenaq ne'ena ỹale da qarta'a.» Qalaxaye nache 'ena'am qoỹanagui da nta'a somaye. Ime, nache ñe'eguelaxa so lma'. Qaq co'ollaq mashe nvi', nache damaxasoxoneugalo soua lo'onataxanaxanaqa som ỹanema aso alom, cha'aye nshetaique da ỹaỹaten chaq negue't aca laueque ñi 'oonolec. Nache so la'auaxanec nachaateuo, nache 'eeta': «'Am Ỹataxala', ana 'om ivi' ana diez ana dalaxai laueque.» Nache so nta'a 'enapeco': «Aja', no'on, ỹaỹamaqchiguiñi, ỹataqta 'am no'on no'onataxanaxanec. Qaq cha'aye ỹataqta 'apactelec da 'auo'ot, dam saq 'amaqtaq maye 'am sepataxalec, qaq nagui sanagui da 'am nataxala' da 'aulo'oguelo caua diez nam 'amaqtaqaic nỹecpi.» Qataq anac som nca'attauo, nache 'enapeco': «'Am Ỹataxala', ana 'om ivi' ana cinco ana dalaxai laueque.» Qaq nataqa'en so nta'a 'enapega, 'eeta': «'Am nataqa'en 'am sanagui, nagui da 'am nataxala' da 'aulo'oguelo caua cinco nam 'amaqtaqaic nỹecpi.» Qataq anac som lỹa, nache 'eeta': «'Am Ỹataxala', 'ana ana 'om. Anamaye choche saỹamaxat, sachalec so hualoxolaỹi, cha'aye aỹem huo'o da icolanaxa da qoneta, cha'aye ỹataqta 'am sa qaramchigui da 'auacona ca sa 'aralamaxat, qataq da 'anqat ana ala cam saq 'añiguishec.» Nache som nta'a 'enapeco': «'Am no'onataxanaxanec qauemaic. Da maiche 'ara'aqtac, nachera da sachegoxotchigui da sauo'o ca 'anhuaxanaguec. 'Am 'auaỹateetac mque' da aỹem sa qaramchigui da sacona cam sa ỹalamaxat, qataq da ñeqat ana ala cam saq ỹañiguishec. Qalaq ¿ta'ainco' ye saq 'aroua'a añim laỹe' ana anom, yaqto' saconeguet acam laueque ana aỹom da ivita da ñe'eguelaxa na ima'?» Nache 'enapega nam hueta'a yemaye, 'eeta': «Ña qauacoñiỹa ara'ara anom maye hueto'ot damaye. Ime, qaq qaỹa'añim dam hueto'oto daua diez.» Nache somayepi 'enapeco': «'Am qarataxala', qalaxaye damaye mashe hueto'oto daua diez lca'achole.» Nache som nta'a 'enapeco': «Aỹem qami' shenapegalo da ca huo'o ca qalota hueto'ot, qalaq camaye ỹactec qanqa'en ca qoỹami'; qaq cam qaica ca hueto'ot, qalaq nache 'ena'am ivira'a da qaiuotaxanec cam saq 'amaqtaq maye hueto'ot. Qaq nam aỹem ipa'agueetacpi maye sa ỹaỹamaxaren da aỹem lta'a, qalaq qanaviquiiua'a aỹem. Ime, qaq qaualauache.»


Qaq co'ollaq ime da nasaxauec de'era So Jesús, nache jec da taigue da Jerusalén. Qaq co'ollaq mashe nayeetaua'alo yeua Betfagué qataq ye Betania yem saqaỹapeque añi saqaỹoqotcheguemec 'alhua maye nanqa' ana Olivo. Huaña, nache ỹama'q soua dos lapaxaguenataqa. Nache 'enapegalo', 'eeta':
–Qanqo'oñiỹa qome nam saqaỹapeque saq 'amaqtaq nỹecpiolec. Qaq qom qaviyiỹa, nache qauloỹa'a ca 'ashena qaicoñettai'. Camaye saxanaxa da qanayeelec. Qaq qausoiuec qome, nache Aỹem qanaviquiỹa. Qaq da huo'o ca qami' ina't da chaq ta'ainec da qausoiuec, nache qoñiita qome da qara'aqtaqui: «Ñim Qarataxala' iuen namaye.»
Nache je'c soua lapaxaguenataqa, nache ipacchigui 'enauac dam 'enapec So Jesús. Nache co'ollaq mashe isotrapegue'c so 'ashena, nache ana'c soua lalamaxa't so 'ashena. Nache denataxaata'ape, 'eetra':
–¿Ta'ainco' ye qausoitapeguec na 'ashena?
Nache soomaye 'ena'apo':
–Qomye iuen namaye Ñim Qarataxala'.
Nache qaỹauega somaye So Jesús. Ime, nache ỹasaxaleguete soua lapo'ote soomaye so 'ashena, nache qoỹanaxanaxaalec So Jesús. Nache co'ollaq nayeetaua'a ye Jerusalén So Jesús, nache qalota so shiỹaxauapi lapaxangui na lapo'pi so nqa'aic maye tateua'a Somaye. Qaq co'ollaq mashe saqaỹapeque asom saqaỹoqotcheguemec 'alhua maye nanqa' ana Olivo, co'ollaq mashe quiguingui so ca'amegue soomaye da nqo'ootra ye Jerusalén, nache huaña da 'enauac nam ỹa'amaqteetac Somaye qataq quetague' ỹa'alaqtagui, souaxat da ntonaxac. Nache ỹo'oxoreetac Ñim Lo'onatac 'Enauacna, souaxat 'enauac nam sa qaỹauanapigui maye ỹo'ot So Jesús da ỹauaachigui somayepi. Nache 'eeta':

–¡Ỹataqta ỹo'oxoraq da llecỹaxac na Qarta'a,
maye nactaigui da le'enaxat
Ñim Lo'onatac 'Enauacna!

¡Huo'o qome da nlagaxayec na piguem!

¡Qataq 'enauac da qaỹauatton
da la'añaxac Ñim Lo'onatac 'Enauacna!
Nache nam fariseopi maye ỹalectaigui se'eso shiỹaxauapi, 'eeta':

–'Am Napaxaguenataxanaq, no'on taxa da 'anhuogaxa na 'am ca'attague'pi.

Qalaxaye So Jesús ỹasateguet 'eeta':

–Ỹataqta 'eesa de'era qami' sa'axatema da nañaxaañi ne'enapi, nache na coma'pi ishet da ỹa'alaq.

Qaq co'ollaq mashe nayeetaua'a ye Jerusalén, nache co'ollaq ilaua'a yemaye, nache So Jesús nỹeelec som shiỹaxauapi maye hueta'a yemaye. Nache 'eeta':

–¡Ỹataqta lta'araic da iyaxa, da nagui qami' qauaỹaañi ca naigui da qoviitaigui da qarlagaxayiqui! Qalaxaye qami' saishet da qauaỹaañi. Qalaxaye huo'o qome ca na'a'q, qaq qami' qaviyiỹalo caua na'axa'te maye ỹataqta qauema, qom ca qanpa'aguenaxauai nauaxaỹaxaasheguem ca lpaqtaxanaxat da qami' iconnaxaasopa. Ime, qaq qami' coleesopa, ỹataqta sa ỹauo'o ca qardaqa'ai da qami' iloquiaxa'n. Nache qami' ilaxachiguilo ỹataqta qami' nmatchiyiñi. Saishet da huo'o ca 'oonolec da nachattañi na coma'pi maye qarpaqtaxanaxache. Qataq 'enauac da qoñiita qaullivi, qataq qanque'etaxañiigui 'enauac de'era, cha'aye saishet da qaua'amaqchiñi da Ñim Lo'onatac 'Enauacna Aỹem namaq da qami' ñeca'alaxatrec.


Nache So Jesús inoxonoigui aso no'onaxanaxaqui late'erai. Ime, nache ỹo'orauec 'enauac nam nmeetega'tpi maye huetaigui asomaye. Nache 'enapega, 'eeta':
–Naua ñiyigui'she la'aqtaqa Ñim Lo'onatac 'Enauacna, 'eeta': «Na ima', namaye qouagaxaunaqa';» qalaxaye qami' qauo'ochec namaye da nqañoxotaqa' na cachaxaicpi.
Nache 'enauaque se'esoua na'axa'te So Jesús dapaxaguenataxaatac, huetaigui aso no'onaxanaxaqui late'erai. Qalaxaye nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq nam dapaxaguenataxaatapeguec na namaxasoxonaxacpi, qataq nam lataxala' na judiopi, namayepi ilotaique ca lataxac da ishet da ỹalauat So Jesús. Qalaxaye saishet da ỹanata ca 'eetec, cha'aye 'enauac nam shiỹaxauapi ỹataqta ỹe'emaqtom da na'axaỹaxaatega Somaye.

گوێگرتن لە Lucas 19