www.gilakmedia.com www.youtube.com/user/GilakMedia

کیتاب مقدّس به گیلکی

عیسی پس از گفتنٚ اَ حرفأن خو شاگردأنٚ اَمرأ به او طرفٚ دره‌یٚ قِدْرون بوشو. در اویه باغی نهَه‌بو و عیسی خو شاگردأنٚ اَمرأ اویه بوشو. امّا یهودا، اونٚ تسلیم‌کوننده، او محلَ شنأختی، چونکی عیسی و اونٚ شاگردأن همیشه در او محل جمَ بوستیدی. پس یهودا گروهی از سربازأن و مأمورأنٚ پیله کاهنأن و فریسیأنَ اوسَده و به اویه بمو، اوشأن چراغ و مشعل و اسلحه اَمرأ اویه فأرسه‌ییدی.
عیسی با اونکی دأنستی چی رخ دهه، جُلُو بوشو و اوشأنَ بوگفته: «کی دونبأل گردیدی؟»
جواب بدَه‌ییدی: «عیسای ناصری دونبأل.»
بوگفته: «منم!» یهودایٚ خائنم اوشأنٚ اَمرأ بو. وختی عیسی بوگفته، «منم» اوشأن عقب عقب بوشوییدی و زیمینٚ رو بکفتیدی. عیسی ایبارٚ دیگرم از اوشأن وَورسه: «کی دونبأل گردیدی؟»
بوگفتیدی: «عیسای ناصری دونبأل.»
جواب بدَه: «شمرَ بوگفتم کی من خودمم. پس اگه مرَ خوأییدی، وئلید اَشأن بیشید.» اَنَ بوگفته تا اونچی کی قبلاً بوگفته‌بو، ثابت ببه کی: «هیچ‌کدام از اوشأنی کی مرَ ببخشه‌یی، از دس ندم.»
او وخت شمعونٚ پطرس شمشیری‌یَ کی دأشتی، بیرون بأورده و ضربه‌یی به خادمٚ کاهنٚ اعظم بزه و اونٚ گوشٚ راستَ وأوِه. اونٚ خادمٚ نام مالخوس بو. عیسی پطرسَ بوگفته: «تی شمشیرَ غلاف بوکون. آیا نبأید او جامَ کی پئر مرَ فدَه، بنوشم؟»

او وخت سربازأن، خوشأنٚ فرمانده و مأمورأنٚ یهودی اَمرأ، عیسایَ دسگیر بوکودیدی و اونٚ دسأنَ دَوستیدی. اوّل اونَ حَنّا ورجه ببردید. حَنّا، قیافا زن پئر بو و او زمان کاهنٚ اعظم بو. قیافا اونی بو کی یهودیأنَ توصیه کودی کی بهتره اینفر بخاطرٚ قوم بیمیره.

شمعونٚ پطرس و ایتأ شاگردٚ دیگر عیسی دونبألسر بوشوییدی. او شاگرد از آشنایأنٚ کاهنٚ اعظم بو. پس عیسی اَمرأ واردٚ حیاطٚ خانه‌یٚ کاهنٚ اعظم بوبوسته. امّا پطرس درٚ پشت بِیسه. او شاگردی کی از آشنایأنٚ کاهنٚ اعظم بو، بیرون بوشو و کنیزٚ اَمرأ کی دربان بو، حرف بزه و پطرسَ به خانه دورون ببرده. او وخت او کنیز پطرسَ بوگفته: «مگر تو از شاگردأنٚ او مرد نی‌یی؟»
پطرس جواب بدَه: «نی‌یم.»
هوا سرد بو. خادمأن و مأمورأن زغالٚ اَمرأ آتشی چأکوده‌بید و اونٚ دور جمَ بوسته‌بید و خوشأنَ گرمَ کودیدی. پطرسم اوشأنٚ اَمرأ ایسَه‌بو و خودشَ گرمَ کودی.

پس کاهنٚ اعظم از عیسی درباره‌یٚ اونٚ شاگردأن و اونٚ تعالیم وَورسه. عیسی جواب بدَه: «من به دونیا آشکارا حرف بزم و همیشه کنیسه و معبدٚ میأن کی یهودیأن اویه جمَ بیدی، تعلیم بدَم و چیزی‌یَ مخفیأنه نوگفتم. چره از من وَورسی؟ از اوشأنی وَورس کی می حرفأنَ بیشنَوستیدی؛ اوشأن بهتر دأنیدی کی من اوشأنَ چی بوگفتم.»
وختی اَنَ بوگفته، ایتأ از قراولأن کی اویه ایسَه‌بو، ایتأ سیلی اونٚ صورتَ بزه و بوگفته: «اَطو کاهنٚ اعظمَ جواب دیهی؟»
عیسی جواب بدَه: «اگه خطا بوگفتم، بر می خطا شهادت بدن، امّا اگه راست بوگفتم، چره مرَ زنی؟»
او وخت حَنّا اونَ با دسٚ دوٚسته اوسه کوده قیافا کاهنٚ اعظمٚ ورجه.

موقعی کی شمعونٚ پطرس ایسَه‌بو و خودشَ گرمَ کودن دوبو، بعضی‌یأن اونَ بوگفتیدی: «مگر تو از اونٚ شاگردأن نی‌یی؟»
اون انکار بوکوده و بوگفته: «نه! نی‌یم.»
ایتأ از خادمأنٚ کاهنٚ اعظم اویه ایسَه‌بو. اون از بستگأنٚ کسی بو کی پطرس اونٚ گوشَ وأوِه بو، بوگفته: «مگر من خودم ترَ اونٚ اَمرأ او باغٚ میأن نیدم؟» پطرس بازم انکار بوکوده. هو لحظه ایتأ خروس بخوأنده.

یهودیأن عیسایَ از قیافا ورجه به کاخٚ فرماندارٚ رومی ببردیدی. وختٚ سحر بو. اوشأن خودشأن واردٚ کاخ نوبوستیدی تا نجستَ نیبید و بتأنید پِسَخَ بوخورید. پس پیلاطس اوشأنٚ ورجه بمو و وَورسه: «اَ مردَ به چی جُرمی متهم کونیدی؟»
جواب بدَه‌ییدی و بوگفتیدی: «اگه جُرمی نأشتی، اونَ به تو تسلیمَ نوکودیم.»
پیلاطس اوشأنَ بوگفته: «شومأن خودتأن اونَ ببرید و طبقٚ شیمی شریعت اونَ محاکمه بوکونید.»
یهودیأن بوگفتیدی: «اَمأن ایجازه نأریم کسی‌یَ اعدام بوکونیم.» به اَ طریق عیسی حرفأن در موردٚ اَنکی چی جور مرگی در اینتظارٚ اونه، ثابتَ به.
پس پیلاطس به کاخ وأگردسته و عیسایَ دوخوأده و اونَ بوگفته: «آیا تو پادشایٚ یهودی؟»
عیسی جواب بدَه: «آیا اَنَ تو خودت گی، یا دیگرأن درباره‌یٚ من ترَ بوگفتیدی؟»
پیلاطس جواب بدَه: «مگر من یهودی‌یم؟ تی قوم و پیله کاهنأن ترَ به من تسلیم بوکودیدی. مگر چی بوکودی؟»
عیسی جواب بدَه: «می پادشایی از اَ دونیا نی‌یه. اگه می پادشایی از اَ دونیا بو، می خادمأن جنگستیدی تا من به دسٚ یهودیأن دستگیرَ نبم. امّا می پادشایی از اَ دونیا نی‌یه.»
پیلاطس اونَ بوگفته: «پس تو پادشایی؟»
عیسی جواب بدَه: «تو خودت گی کی من پادشاهم. من هَنٚ وسی به دونیا بموم تا حقیقتَ شهادت بدم. پس هر کسی کی به حقیقت تعلّق دأره، می صدایَ گوش کونه.»
پیلاطس بوگفته: «حقیقت چیسه؟»

وختی پیلاطس اَنَ بوگفته، بازم بوشو بیرون یهودیأنٚ ورجه و اوشأنَ بوگفته: «من هیچ دلیلی اونٚ محکوم کودنٚ‌ره نیدینم. امّا شومأن ایتأ رسم دأریدی کی در روزٚ پِسَخ ایتأ زندانی‌یَ شِمره آزادَ کونم. آیا خوأییدی کی پادشایٚ یهودَ آزادَ کونم؟»
اوشأن در جواب، داد بزه‌ییدی: «اونَ نه! بلکی بارْاَبّایَ آزادَ کون!» (بارْاَبّا راهزن بو.)

گوێگرتن لە یوحنا ۱۸