2 Ko 5
5
1Naqanaw naq li muheb'aal a'in li nokoohilank wi' sa' ruuchich'och', taa'oso'q; ab'an wank jun li qochoch nachalk rik'in li Yos: a'an li muheb'aal ink'a' uxb'il rik'in uq'ej, ut wank sa' choxa chi junelik. 2Arin nokootz'uyink, q'axal naqarahi naq tootiqib'aaq rik'in li qachoxahil muheb'aal, 3wi relik chi yaal tiqtooqo ut ink'a' tolootawe'q chi t'ust'u.#5,3 A'in naraj naxye: wi relik chi yaal tolootawe'q chi yo'yooqo sa' li xnimal xk'ulunik li Jesus (cf. 1 Ts 4,15). 4Naq toj wanko sa' li muheb'aal a'in, nokootz'uyink chi namaynak li qaanm, xb'aan naq ink'a' naqaj xkanab'ankil li qatz'ejwal, naqaj b'an tootiqib'aaq sa' xb'een li k'aru ak wank chiqix, re naq li k'aru yal re kamk taasache'q xb'aan li yu'am. 5Ut li xkawresink qe cho'q re a'in, a'an ajwi' li Yos, ut a'an xk'ehok qe li Musiq'ej, reetalil naq tixb'aanu li xyeechi'om.
6Jo'kan utan, junelik kaw qach'ool, us ta naqanaw naq jo' najtil wanko sa' li qajunxaqalil, najt wanko rik'in li Qaawa'. 7Li paab'aal nab'eresink qe, ut maji' saqenk nokoo'ilok; 8ab'an kaw li qach'ool ut naqaj raj xkanab'ankil li junxaqalil a'in re naq wanqo rik'in li Qaawa'. 9Jo'kan utan, us ta wanko sa' li qajunxaqalil, us ta najt wanko rik'in, ab'anan naqayal qaq'e chi xsahob'resinkil xch'ool li Qaawa'. 10Xb'aan naq chiqajunilo tento toxqak'ut qib' sa' xraqleb'aal aatin li Kriist re naq li junjunq tixk'ul xq'ajkamunkil, a' yaal chanru li xb'aanuhom, ma us malaj ink'a' us xb'aanu naq xwank sa' ruuchich'och'.
Li qak'anjel cho'q apóstol
11Laa'o naqanaw naq tento roxloq'inkil li Qaawa'. Jo'kan naq naqayal qaq'e chi xq'unb'esinkil xch'ooleb' li tenamit. Li Yos naxnaq k'aru wank sa' qach'ool, ut nawoyb'eni naq laa'ex ajwi' teenaw qu chi us. 12Ma yooko tab'i' chi xnimankil qu cheru laa'ex? Ink'a', ka'aj b'an wi' naqaj naq twanq k'aru teenima wi' eerib' sa' qak'ab'a', re naq texruuq xsumenkileb' li neke'xnima ruheb' rik'in li k'aru nak'utunk ut ink'a' rik'in li wank sa' li ch'oolej. 13Wi xsachk qana'leb', a'an sa' xk'ab'a' li Yos; wi ut tuqtu qana'leb', a'an cho'q eere laa'ex.
14Xb'aan naq li xrahom li Kriist nareechani li qayu'am. Naqanaw chi tz'aqal naq, wi jun chi winq kikamk sa' xk'ab'a' chixjunileb', jo'kan utan chixjunileb' ke'kamk. 15Ut a'an kikamk sa' xk'ab'a' chixjunileb', re naq eb' li yo'yookeb' ink'a' chik yo'yooqeb' yal cho'q reheb', cho'q re b'an li kikamk ut kiwakliik wi' chik sa' xk'ab'a'eb' a'an.
16Chalen ut anaqwan maa'ani chik naqanaw ru yal rik'in ruuchich'och'il k'a'uxl; ut wi junxil xqanaw ru li Kriist rik'in ruuchich'och'il k'a'uxl, anaqwan ink'a' chik naqanaw ru chi jo'kan. 17Jo'kan utan, li ani wank rik'in li Kriist, a'an ak' yoob'tesinb'il chik. Ak xnume'k li k'a'aq re ru q'eel, ut ak' chik chixjunil! 18Ut chixjunil a'in nachalk rik'in li Yos, li kooxk'am wi' chik sa' usilal rik'in sa' xk'ab'a' li Kriist ut kixq'axtesi qe li k'anjel re li k'amok ib' sa' usilal rik'in.
19Li Yos kixk'am wi' chik sa' usilal li ruuchich'och' rik'in, sa' xk'ab'a' li Kriist: ink'a' kixk'e sa' xch'ool li xmaakeb' li tenamit, ut kixq'axtesi qe li aatin chirix li k'amok ib' sa' usilal rik'in. 20Laa'o b'i' li xtaql li Kriist, chanchan naq li Yos yo chi aatinak qab'aan. Sa' xk'ab'a' li Kriist naqatz'aama naqelaji cheru: chek'e wi' chik eerib' chi k'ame'k sa' usilal rik'in li Yos! 21Li Kriist ink'a' xnawom ru li maak, ut A'an kik'ehe'k cho'q maak xb'aan li Yos#5,21 Li Kriist kiriiqani chixjunil li qamaak, kixk'am li xmaak li ruuchich'och' sa' xjunxaqalil chiru krus, re naq too'ach'ab'aaq chiru li tojb'amaak (cf. Ro 8,3; Gal 3,13; 1 P 2,24). sa' qak'ab'a', re naq sa' xk'ab'a' li Kriist toowanq sa' li tiikil ch'oolej nachalk rik'in li Yos.
S'ha seleccionat:
2 Ko 5: QQC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Q'eqchi DC Bible © Bible Society in Guatemala, 2005.