1 Korintiye 7
7
Nzaa hwoɗye
1Gəngnə hɨnə ɓa bwe ləməgye a nə shee hwuna dwara a ɗiyi, atɨ ɓə wula ɓwaara a nza ndaa peyə ka meta? 2Shezə, gəkɨlə wule sharawna nə ɓəgəng, ɓə wula nagi ndo murə a ɗɨm mesən a nza kaarə, nagi ndo meti mgban ngga ɗɨm murəngrə a nza kan. 3Mbak-mbak mure a vədə sɨsən ndi ta peyi ka mesən, metə mgban a vədə sɨsə nggi ta peyi ka murəngrə. 4Gə aa metə nə ka gətə a nə sɨsə mba-mba, murəngrə nə ka gətə, sə mgban aa mure nə ka gətə a nə sɨsən mba-mba, mesən nə. 5Anda hwunaa kɨləsə a ɓi bətə gə hiwtə, ɓe hwunaa kwo petə ka sə. Anda hwun ɓi bətə, bətɨngɨn kana pɨrə, hwuna mɨnkasə gə ɓe Shetan aa kanarəwnə ka kadawe gə ɗongə kɨt sɨtə dəwnə. 6Ləməgyee na boyownə kat a nə nzaa hwoɗye ka sa a waka mure ka metə, shalale de nə, aa gɨraha. 7Na hɨma atɨ giɓa nda myee kat nə ɓətɨ hɨn, shezə nagi ndo ma nee ka wule ɗate Həmɨnpwa a ɗarən, manə nə som, marə ndə som.
8Hɨnggi la na dɨ boyə nggamse morye ka nggamse mandye nə atɨ, ɓə wula təna nza she ɓe tənaa yə nzaa hwoɗye, ɓətɨ na gə. 9Anda tənaa dɨ mba kɨr nəngrən gə kadawe, ndɨka təna nzaa hwoɗye, angɨn nə pɨrgə ite atɨ ma a pɨrə vor kadawo sharawne.
10A hakarən tən mye nzaa hwoɗye, gɨrahaa na dɨ vərən nə yang (aa ɓə hɨngginə hɨnggə Həmɨmiye nə), atɨ mbak-mbak ɓe metə aa ɗaka murəngrə a dɨmgən. 11Shezə anda nggi dɨmgə murəngrə, nggi ɓa nza nggaa diyə ɗɨm a murə, naasə ndɨka təna kɨləsə ngga mɨnka murəngrə. Mure mgban mbak-mbak ɓe ndaa dɨmdə mesən a taka nzaa hwoɗye.
12La na dɨ boyə mbiɗiti ɓwaare kat nə yang (angɨn nə hɨnə hɨn dɨ boyi aa gɨraha da Həmɨnpwa nə) atɨ, nzə-nuwotə kana ɗɨm mete aawa koɗə Həmɨnpwa, na metɨngɨn mwa ɓa nza kan, ɓe ndaa omtɨrə a taka nzaa hwoɗye. 13Sə mgban mete nji-kotti ɗɨm mura aawa koɗə Həmɨnpwa, mangɨn kana mwa ɓa nza kaarə, ɓe nggaa dɨmgən a taka nzaa hwoɗye. 14Gə mura aa nzə-kotti kana ɗɨm mete nji-kotti, angɨn ɓa ɗɨkdə mangɨn nda shi gbyel ka Həmɨnpwa gə le da mesən. Sə mgban mete aa nji-kotti kana ɗɨm mura dɨ koɗə Həmɨnpwa, angɨn ɓa ɗɨkdə metɨngɨn ngga shi gbyel ka Həmɨnpwa gə le da murəngrə. Naasə jingəwnə kat 'ye hwuna mwasa ɓa nda gə takɨm, zə niyəm ɓəgəng je dəwnə nə ɗəmɗəm gə ɗɨmsəte a wakasəwnə.
15Shezə mura aa nzə-kotti kana dɨ mwo atɨ nda taka nzaa hwoɗye, a mya ɗakan nda ɗaasə, sə mgban ka mete dɨ mwi ngga dɨmə, gə a nə wule lanə myaa kərə ji-kottə taka nzaa hwoɗye. Hɨm ji-kottə Həmɨnpwa a warəm gə nzaa ɗoltə. 16Na ɗiyə atɨ, hye mete dɨ koɗə Həmɨnpwa, wonə leyi ndəng hye ɓa mba muranga a viriwadən nda ɗɨm mbəta? Ɓə hye mura dɨ koɗə Həmɨnpwa mgban, wonə leyi ndəng hye ɓa mba mesa a viriwadə ngga ɗɨm mbəta?
17Kat ka angɨn nagi ndo ma a pɨrə humwa ka nzate Həmɨmiye a nzadən ka wate Həmɨnpwa a warən. Anə nə gɨraha de zə haka ji-kottə a vəni hiwtə kat. 18Ite Həmɨnpwa a wara a vu mbətə ka myentə, anda a itɨngɨn mye jengda a lakəwne, pɨrə humwa nza ka lakəwne dəw. Anda mgban ite Həmɨnpwa a wara myaa jengda a lakəwne, ɓe mwa a jengə lakəwne. 19Lakəwne aa asə, ɗongə lakəwne mgban aa asə, koddə gɨraha da Həmɨnpwa nə le. 20Nagi ndo ma a pɨrə humwa ka wule nzate nda nza a ite Həmɨnpwa a warən a vor kottə. 21Anda hye kɨsa a ite Həmɨnpwa a wara, ɓe angɨn aa kɨɗa yedinga, anda mgban hye ɗɨm humwatə ɓa dɨmgə kɨsawne, zə dɨmi. 22Gə nagi ndo ma kat gə vor kɨsawne Həmɨnpwa aɓə warən, mangɨn piyagə kɨsawne ɗɨm nəngɨn a haka Həmɨnpwa, ndi aa yə mɨni kɨsa. Sə mgban ma dɨmgə vor kɨsawne mbəə, Həmɨnpwa aɓə warən, mangɨn gəə kɨsa da Ma Həmɨnpwa a Yaɓwarən nə. 23Ka zaambə Yesu mya ɗərtəwnə, ɓe hwunaa mwa a gəə kɨse da imi ɓə. 24Ji-nuwo, hɨnə dɨ səwnə atɨ wule nzate nagi ndo ma a nza vɨratə Həmɨnpwa a ɓə warən, naa mangɨn a pɨrə humwa sə mgban, a vor koddə ləməgye da Həmɨnpwa.
25A nə le da rekye, hɨn tam ka a gɨraha dɨ haka Həmɨmiye Yesu a nəngrən, shezə hɨnə dɨ vədə shalale de a nzashi ma mya mwakan dɨ ha puruta Həmɨmiye. 26Gəkɨlə wule tənətɨnə a vor vɨratə ɓəgəng, na dɨ niyə ɓa wula ɓwaara a nza she ɓətɨya nda gə. 27Anda mgban hye nzaa hwoɗye mbəə, ɓe ɗyenglə taka nzaa hwoɗye. Anda mgban tee nda nzaa hwoɗye, ɓe ɨl metə. 28A hye nzaa hwoɗye aa səhasə, sə mgban rikitə kana nzaa hwoɗye angɨn aa hasə. Kat ka angɨn myee nzaa hwoɗye ɓa peyə ka tənətə som-som, səngɨn ɗa na dɨ ɓərə gə na takəwnə ka wule tənətɨngɨn.
29Ji-nuwo, naarə la na dɨ boyo nə atɨ, nzaasəm a vɨratə ɓa dɨ mbəə. Kɨttə dɨ fəranə ɓəgəng, myee ka mandye a nza ɓətɨ taa mandi kaarən. 30Myee dɨ goni a nza ɓətɨ tənaawa gonə, myee mgban a vor hanɨngtə a nza ɓətɨ taayə hanɨngti də. Myee ka gɨnətə dɨ ɗər shee a nza ɓətɨ taayə asə kaarən. 31Myee mgban dɨ lyeni ka sɨ vɨratə a nza ɓətɨ asə aa yə pedərən ka shingɨn, gə nggaarate vɨratə a dɨ nggaara nee dɨ pɨri kat.
32Mwoshinə atɨ ɓe hwunaa pɨrə ɗyengle a nə shi vɨratə. Gə ma aa nzaa hwoɗye ɗyengle dan nee a nə lyenta Həmɨnpwa, ka wule sa tən ɓa ɗa gə haa nɨngə Həmɨnpwa kaarən. 33Shezə mura nzaa hwoɗye, ɗyengle dan nee a nə shi vɨratɨnə ka wule shee ndi ɓa ɗa gə nzaa hwodan a wula, haa nɨngə mesən kan – 34ɗyengle dan təkə kpe. Hɨnggə nji-rikitə ka mate aa nzaa hwoɗye, ɗyengle darən a nə shee hɨnggə Həmɨnpwa nə, tən ɓa vədə nəngrən a haka Həmɨmiye a vor sɨtə ka pitə. Nggi mete nzaa hwoɗye, ɗyengle darə a nə shi vɨratə təna gə, ka sa nggi ɓa ɗa gə hwodarə a wula, hanɨngə murəngrə kaarə. 35Ləməginə na dɨ boyownə kat gə na gwadəwnə nə, taa bwetɨrən atɨ gə na kərəwnə ɗa sa hwuna dɨ mwo, na boyownə gə hwuna lee sa kana, gə ɓe səɗə-yedye dəwnə aa təkə kpe a nə lyente kana hwuna ɗa Həmɨmiye.
36Ma ka rikite nda tiyagərə, nda dɨ niyə ɓətɨ kote nda kɨttɨrə a nzadə ngga dɨ ɓongə, anda ɓə niyə kadawe nə də, rikitɨngɨn mgban nee dɨ iira, ndɨka nda ɗɨmtɨrə ɓətɨya nda mwo, angɨn aa hasə. Təna nzaa hwoɗye. 37Anda mgban ma tiyagə rikitɨngɨn ɓa ɗɨmtɨrə boyə hubosən atɨ ndaa diyə ɗɨm rikitɨngɨn, aa ama ɗɨkdən nda kwo nzaa hwoɗye a nə mbamtə, nda mwa ɓa kɨt sɨsən taa kadawo də, nda koɗə sa hubosən a bɨlən. Nda nza she ɓe ndaa nzaa hwoɗye, angɨn nee pepe. 38Gə-angɨn, ma ɗɨm rikite nda tiyagərə təna nzaa hwoɗye, ɓə ɗa sə pepeye, ma mgban boyə hubosən atɨ ndaa dɨ ɗɨm rikitɨngɨn, pɨrə ka pepetə.
39Anda murə metə nə də ka myentə, nggi metɨ hwoɗi, nggaa dɨ ɗɨm a murə som. Murəngrə kana yerə, kote ka humwatə ngga ɗɨm mura ngga dɨ mwo, shezə mbak-mbak mangɨn a gəə nzə-kotti dɨ koɗə Həmɨnpwa. 40Hɨnggi na dɨ niyə mate murəngrə a mbɨrə kana nza she nggaa ɗɨm a murə, angɨn nə ɓa pɨrərə ka hanɨngtə ka wulatə. Na byelə sə gə na dɨ niyə ɓətɨ hɨn mgban hɨnə ka Pita Həmɨnpwa dɨ koɗi ke.
S'ha seleccionat:
1 Korintiye 7: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.