1 Korintiye 2
2
1Ji-nuwo, ite na tiya shitə a hakəwnə, taa shi ka lee byele ka lelə vɨratɨnə gə na boyownə ləməgye da Həmɨnpwa. 2Gə hɨn boyə vor huboshi nzadən atɨ taa mwi atɨ na kəndə asə som a wakasəwnə pɨrgə Yesu Ma Həmɨnpwa a Yaɓwarən ka ɓɨdɨmte mya ɓɨdɨmdən. 3Na shi hakəwnə ka sɨtɨ kpalatə ka waratɨ sɨtə ka wekala kɨr-kɨr. 4Kəndəshe de ka hiwatɨ de a nə ləməgye da Həmɨnpwa, aa ka kuta lee byele. Shezə Pitɨ Ɗəmɗəmtə bɨləwnə gətɨ dan bwang dɨ hake, 5gə ɓe mwadiyale dəwnə aa kangə nə lele da mi vɨratə. Shezə maa mwadiyale dəwnə a kangə nə gəta Həmɨnpwa.
Lele dɨ haka Pitə
6Kat ka angɨn, hin byelə kəndəshe ka lele a waka myee ɓongə vor ləməgi Pitə, shezə aa ka wule lelə vɨra wanetɨnə, aa mgban ka wule hɨnggə yə həmi njiya vɨrangnə, tənə myee ɓa pɨrə ɓaa. 7Ə'ə, hin hina dɨ kəndəshe a bɨldə wule lele da Həmɨnpwa a gə ɓotə kɨnɨnɨng, a wule lela Həmɨnpwa a kəntən gə fukatɨ dam a ite myaa nda kwak vɨratə. 8Tən yə həmi njiya vɨrangnə tam ka wule leləngɨn, gə a tən nda ɗɨm wule leləngɨn, tənaa dɨ nda ɓɨdɨmdə Həmɨmiye ndi ma ka fukatə. 9Ɓətɨya mya doro atɨ,
“Taa ndəng dii gi naarən,
taa kwaki gi kɨli,
taa ndəng ma ɓa səɗə nəngrən,
wule shingɨn nə 'ye Həmɨnpwa a ɗatɨrən
gə myee dɨ mworən.”#2.9 Naasə: Ishaya 64.4.
10Shezə wule shingɨn nə Həmɨnpwa a wunarən a bɨlenə ɓəgəng bwang dɨ haka Pitɨ Ɗəmɗəmtə.
Pitɨngɨn nə pyel nagi ndawulasə, sɨnə pyel Həmɨnpwa kat ka səɗə-yedye dan. 11Wonə ma lee wule sa ɓwaara a dɨ ɗyengə hubosən, naa pita mangɨn nə ɓəmbə? Sə mgban taa ama ɓa lee wule sa Həmɨnpwa a dɨ ɗyengə hubosən, naa Pisən nə ɓəmbə. 12Hɨnggenə, hinaa ga lu itɨ piti som, a wule i vɨratɨnə, hina luu Pitɨ Ɗəmɗəmta Həmɨnpwa, gəkɨlə hin lee wule shee Həmɨnpwa a wulakenə kaarən a venə. 13Wule shingɨn nə 'ye hina dɨ kəndərən, aa ka wule ləməgyee ɓwaare a dɨ kəndəshe kaarən nə, a lelə vɨratə, shezə ka kormyee Pitɨ Ɗəmɗəmtə a bɨlenə, gə hina bɨlə myee a vor pitə kormi ləməgingɨn. 14Ma tam ka Pitɨngɨn, aa dɨ luu wule shee dɨ haka Pita Həmɨnpwa, gəkɨlə wule shingɨn a hakan dɨɗəwnə. Ndaa dɨ lee wule shingɨn gə dɨ haka pitə mya dɨ lee shingɨn. 15Ma kat ka Pitɨ Ɗəmɗəmtə, wule mangɨn a dɨ pyel shee kat a nidərən, ndi mangɨn ka nənəngɨn taa ama dɨ nidən pyeltən, kanarən.
16“Gə wonə lee səɗə-yedye da Həmɨmiye,
baa ɓa kənənshe?”#2.16 Naasə: Ishaya 40.13.
Shezə hɨm nee ka səɗə-yedye da Ma Həmɨnpwa a Yaɓwarən.
S'ha seleccionat:
1 Korintiye 2: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.